Sonosono apa, Khoti la Birobidzhan ilo lili ku Chigaŵa cha Jewish Autonomous leruzgenge mulandu wa Mubali Alam Aliyev, Valeriy Kriger, Sergey Shulyarenko, na Dmitriy Zagulin. a

Alam Aliyev

• Chaka cha kubabikira: 1963 (M’muzi wa Lyaki, ku Azerbaijan)

• Mbiri yake: Wakaŵapo msilikari mu boma la Soviet Union ku Germany. Kufuma apo wakagwirapo ntchito ya ulovi. Wakasamukira ku Khabarovsk, Russia, mu 1989. Pasono wakugwira ntchito ku fakitale yinyake

  Wakamba kusambira Baibolo pati pajumpha nyengo yichoko waka wati wasamira ku Russia. Wakabatizika mu 1991. Wakatorana na muwoli wake, Svetlana, mu 2015. Ŵakutemwa kutembeya

Valeriy Kriger

• Chaka cha kubabikira: 1968 (Chigaŵa cha Jewish Autonomous)

• Mbiri yake: Wakakulira mu banja ilo likasopanga yayi. Apo wakaŵa muchoko, wakatemwanga maseŵero gha acrobatic. Wakasambira vya kunyoloranyolora ŵanthu awo ŵakupulika twakusinasina muthupi panji ŵakusuzgika maghanoghano (massage therapy) ndipo pasono wali na malo ghake ghakuchitirako ntchito iyi. Wakabatizika mu 1994. Wakatorana na muwoli wake, Natalya, mu 2017. Ŵakutemwa kuseŵera volleyball na kutembeya

Sergey Shulyarenko

• Chaka cha kubabikira: 1984 (Khabarovsk)

• Mbiri yake: Apo wakaŵa muchoko wakakhalanga ku Turkmenistan uko adada ŵake ŵakagwiranga ntchito ya usilikari. Wakamba kugwira ntchito ya kunozga mashini. Wakutemwa kudinda vithuzi na kusambira viyowoyero vyakupambanapambana. Wakasambira vya Yehova kufuma kwa amama ŵake. Wakabatizika mu 1997 apo wakaŵa na vyaka 13

Dmitriy Zagulin

• Chaka cha kubabikira: 1973 (ku Khabarovsk)

• Mbiri yake: Apo wakaŵa muchoko, wakakhumbanga kuzakaŵa msilikari. Apo wakagwiranga ntchito ya usilikari, wakasambira kalati ndipo ŵakamusambizga umo wangagwiliskira ntchito parashuti. Pasono wakugwira ntchito ku kampani yakuwona vya njanji (msewu wa sitima ya pamtunda.) Wakamba kusambira Baibolo mu 1991. Wakabatizika mu 1992. Wakatorana na muwoli wake, Tatyana, mu 2012

Pa May 17, 2018, ŵamazaza 150 ku Birobidzhan ŵakasecha nyumba zinandi za ŵabali, ndipo kusecha uku ŵakakuchemanga kuti “Judgment Day”. Mubali Alam Aliyev ŵakamupa mulandu ndipo ŵakamusunga dankha mu jele kwa mazuŵa 8, chifukwa ŵakatenge wakulongozga “milimo ya gulu lakofya.” Mubali Valeriy Kriger, Sergey Shulyarenko, na Dmitriy Zagulin nawo ŵakati ŵali na mulandu. Ŵabali wose ŵanayi aŵa ŵakukanizgika kufuma mu chigaŵa icho ŵakukhala. Padera pa ivi, ŵawoli ŵa Mubali Alam, Valeriy, na Dmitriy nawo ŵakuŵapa milandu yinyake.

Pambere wandakakike, Mubali Alam wakafufuza nkhani yakutambuzgika. Iyo wakaphalirangakoso ŵanyake mu mpingo ivyo wakasambira. Mubali uyu wakuti: “Nkhachiska ŵabali na ŵadumbu kuti ŵaleke kuchita wofi para ŵakutambuzgika. Nakuti ivi vikaŵa vya pa nyengo yake, chifukwa pati pajumpha waka sabata yimoza, nyumba 21 za ŵabali na ŵadumbu mu mpingo mwithu ŵakazisecha.”

Valeriy na muwoli wake Natalya, ŵakatondeka kuluta ku ungano wa chigaŵa wa Ŵakaboni ŵa Yehova ku Seoul, South Korea, chifukwa ŵakaŵakanizga kwenda. Ŵakazomerezgekangaso yayi kuti ŵalute kukawona ŵapapi ŵa Valeriy awo ŵakukhala ku Israel. Chachitima ntchakuti adada ŵake ŵakatayika mu February 2019. Myezi yichoko waka pambere ivi vindachitike, amama ŵake ŵakaŵachita opareshoni ya msana ndipo ŵakakhumbanga munthu wakuti waŵapwelelerenge. Valeriy wakukhorwa kuti Yehova wakaŵawovwira. Nangauli ŵapapi ŵake Mbakaboni yayi, kweni ŵabali na ŵadumbu ku Israel ndiwo ŵakapwelelera amama ŵake. Iyo wakuti: “Tikalomba kwa Yehova na kumuphalira umo vinthu viliri na amama ŵane, ndipo Yehova wakazgora malurombo ghithu. Ŵabali na ŵadumbu ŵithu ku Israel ŵakaŵakhozga kweniso kuŵapembuzga amama. Ŵakalutanga kukaŵawona, kuchezga nawo, na kuŵachemera ku maungano. Nangauli tili kutali na amama, kweni tikuwona woko la Yehova; iyo wakutovwira kwizira mu ŵabali na ŵadumbu.”

Dmitriy wakuwona kuti kutambuzgika kwamovwira kuwona kuti fundo yinyake iyo wakuyimanya kale njaunenesko nadi. Iyo wakuti: “Para chilichose chikwenda waka makora pa umoyo withu, ndipo tikukanizgika yayi kusopa Chiuta withu, chingaŵa chipusu kwamba kuwona mwakupepuka usambazi wauzimu uwo tili nawo ndipo panji tingamba na kusulako wuwo. Kweni para ŵamazaza ŵatilekeska kusopa Chiuta mwawanangwa, ndipo tikuwamo kuti ntchakuzirwa chomene kugwiliskira ntchito mwamahara nyengo yithu kuti tiŵe paubwezi wakukhora na Yehova mwakuti tinozgekere kutambuzgika munthazi. Nakuti vingaŵa makora chomene kuti tigwiliskirenge ntchito wanangwa uwo tili nawo pasono kuti ‘tisunge . . . usambazi kuchanya.’ Ivi vitovwirenge kuti tizizipizge m’paka paumaliro kweniso kuti tilutilire kuŵa na chipulikano chakukhora.”—Mateyu 6:20.

Ntchakuwonekerathu kuti Yehova wakuŵapa ŵabali ŵithu ku Russia “nkhongono zakuluska zakawiro” kuti ŵazizipizge.—2 Ŵakorinte 4:7.