Sonosono apa, Khoti la Industrial ku Smolensk leruzgenge mulandu wa Mubali Yevgeniy Deshko, Ruslan Korolyov, na Valeriy Shalev. a Wakwimira boma pa milandu wapempha khoti kuti lipeleke chilango chakuti Yevgeniy na Ruslan ŵakagwire jele vyaka 9, ndipo Valeriy vyaka 8. Mubali Viktor Malkov, uyo nayo wakaŵa na mulandu wakuyana waka na ŵabali aŵa, wali kufwa pambere khoti lindapeleke chigamuro chake.

Yevgeniy Deshko

• Chaka cha kubabikira: 1989 (ku Sochi)

• Mbiri yake: Wali kugwirapo ntchito yakunyoloranyolora awo ŵakupulika kusinasina mu thupi panji ŵakusuzgika maghanoghano (massage therapist), ya udilayivara, na ya vya magesi. Wakalereka na ŵapapi awo Mbakaboni. Wati wamba kuchindika fundo za mu Baibolo, wakakana kunjira usilikari. Wakabatizika mu 2012. Kufuma mu 2012 m’paka 2014, wakagwiranga ntchito iyo yikukhwaskana yayi na vyausilikari pa chipatala chinyake

Ruslan Korolyov

• Chaka cha kubabikira: 1982 (ku Smolensk)

• Mbiri yake: Apo wakaŵa muchoko, wakatemwanga kusambira kunozga vinthu nga ni mafoni na vinyake. Kufuma apo wakazakaŵa mekaniki. Wakagwirapo ntchito ya usilikari ku Russia. Wakamba kusambira Baibolo na Ŵakaboni ŵa Yehova ndipo wakakhozgeka chomene na unenesko wa mu Baibolo. Wakabatizika mu 2004

Viktor Malkov

• Chaka cha kubabikira: 1959 (ku Smolensk)

• Mbiri yake: Wakaŵapo mekaniki, kalipentara, kweniso wakakhomanga nyumba. Wakatorana na muwoli wake, Vera, mu 1992. Apo wakaŵa munyamata wakatemwanga kuseŵera bola. Wakawovwirangapo kupwelelera mwana wakwake uyo wali na suzgo la maso

  Wakaŵa munthu wambembe, ivyo vikapangiska kuti ŵamujalire mu jele vyaka 7. Nthengwa yake yikakhala pachoko kumara. Wati wasambira Baibolo na Ŵakaboni ŵa Yehova, wakaŵa munthu wamtende, wakupulikira malango kweniso mfumu muwemi chomene. Wakabatizika mu 2008. Wali kufwa pa April 25, 2020

Valeriy Shalev

• Chaka cha kubabikira: 1977 (ku Yartsevo)

• Mbiri yake: Apo wakaŵa munyamata wakasambira Chingelezi. Wakamalizga sukulu ya usilikari. Wakasamira Kumanjiliro gha Dazi kwa Russia uko wakagwiranga ntchito yakuwona vya ndalama ku usilikari. Wakati waleka usilikari, wakamba kugwira ntchito yakovwira ŵanthu pa nkhani ya vya ndalama. Mu 1999, wakatorana na Svetlana, uyo ŵakasangana ku koleji, ndipo ŵakamba kukhala na mwana munyamata wa vyaka 4 uyo ŵakumutora waka nga ngwawo. Wakutemwa kuseŵera bola na kuchimbira

  Amama ŵake ŵakamba kusambira Baibolo na Ŵakaboni ŵa Yehova ndipo ŵakamuphalirako ivyo ŵakasambiranga. Iyo wakayezga kuŵasuska kuti ivyo ŵakusambira mbunenesko yayi, kweni pamanyuma wakawamo kuti ni unenesko nadi. Wakabatizika mu 2002

Ku Smolensk nthambuzgo yikamba pambere Khoti Likuru la ku Russia lindakanizge milimo ya Ŵakaboni ŵa Yehova mu 2017. Pa December 18, 2016, ŵapolisi 15 awo ŵakayegha futi ŵakatimbanizga maungano ghithu pa Nyumba ya Ufumu yinyake ku Smolensk. Pa maungano agha pakaŵa ŵabali na ŵadumbu pafupifupi 60. Apo ŵapolisi aŵa ŵakasechanga, “ŵakaŵikiramo dala” mabuku ghithu agho boma la Russia likuti ngakukanizgika, pamanyuma na kuyowoya kuti “ŵaghasanga” mwenemumo.

Ivi vyati vyachitika, mu 2018 na 2019, ŵamazaza ŵakalutilira kusecha nyumba za ŵabali na ŵadumbu ŵithu ŵanyake, kuŵakaka, ndipo ŵanyake kuŵasunga mu jele. Pa April 25, 2019, ŵamazaza ŵakasecha nyumba zinandi za ŵabali na kukaka Mubali Ruslan Korolyov, Valeriy Shalev, na Viktor Malkov. Viktor wakaŵafumba ŵamazaza aŵa kuti: “Nkhajalirika mu jele vyaka 7 chifukwa cha mbembe, kweni pasono ndine Kaboni wa Yehova. Mbwenu sono mukukhumba kunijalira mu jele chifukwa cha . . . kupharazga makani ghawemi?”

Mubali Yevgeniy Deshko wakakakika na kusungika mu jele pati pajumpha tumazuŵa kufuma apo ŵakakakikira ŵabali ŵanyake. Yevgeniy wakuti: “Chifukwa chakuti nkhamanyanga kuti naneso vinganichitikira, nkhaŵa wakunozgeka kukumana na chiyezgo ichi.” Iyo wakulutilira kukhozgeka na mazgu gha Yehova agho wakaphalira Joshuwa kuti: “Khwima mtima na kuŵa wankhongono. Ungatenthemanga yayi panji kopa, chifukwa Yehova Chiuta wako wali nawe kulikose uko ukuya.” (Joshuwa 1:9) Yevgeniy wakulongosora kuti: “Mu vesi ili Yehova wakutiphalira kuti tikhwime mtima, kweniso wakutilayizga kuti watovwirenge.”

Ruslan wakuti apo wakaŵa mu jele, wakaghanaghanirangapo mazgu gha Yesu gha pa Mateyu 6:34. M’malo mwa kufipa mtima na ivyo vingachitika, Ruslan wakuti: “Nkhatangwanikanga na kulemba makalata, kuŵerenga Baibolo, na kuphalirako awo tikaŵira lumoza mu jele vyakukhwaskana na unenesko wa mu Baibolo. Nkhaŵavyanga nyengo yakuti nenjerwenge chomene.”

Mu March 2020, G. P. Bezrukov uyo ngwakufufuza milandu wa Federal Security Service (FSB), wakachepeskako vinthu ivyo ŵabali ŵanayi aŵa ŵakakanizgika kuchita ndipo ŵakafuma pa jele la panyumba ilo ŵakaŵa. Ŵakaŵa kuti ŵakhala pafupifupi chaka chimoza mu jele kweniso pa jele la panyumba. Ivi vikachitika chifukwa chakuti ŵabali ŵithu ŵakalutilira kugomezgeka, kweniso kupulikira ivyo ŵakaphalirikanga na ŵamazaza apo ŵakajalirika mu jele. Wakufufuza milandu uyu wakaŵa na chigomezgo chose kuti para ŵabali aŵa ŵangapika wanangwa wakusazgikira vitimbanizgenge yayi ntchito yake yakuŵafufuza mulandu, kweniso kusuzga para ŵakufumbika mafumbo.

Chachitima ntchakuti, pati pajumpha nyengo yichoko waka, Viktor wakafwa. Vikupulikikwa kuti umoyo wakusuzga wa mu jele na kusuzgika maghanoghano chifukwa cha nthambuzgo iyi, ndivyo vyapangiska kuti wafwe mwaluŵiro.

Ruslan, Valeriy, na Yevgeniy ŵaŵikapo mtima kulondezga chiyelezgero cha Viktor na ŵabali ŵanyake ŵanandi awo ŵakalutilira kugomezgeka m’paka nyifwa. Chifukwa cha kuŵa paubwezi wakukhora na Yehova, vyawovwira kuti ŵalutilire kuzizipizga, ndipo mbakukondwa.

Valeriy wakuti: “Chifukwa chakuti nkhajalirika mu jele, nkhawonanga kuti Yehova wali nane pafupi chomene. Kakaŵa kakwamba kuti nijipulike nthena. Nyengo zose nkhuŵerenganga Baibolo. Mbunenesko kuti ku jele nkhwakukondweska yayi kukhalako, kweni ŵanthu ŵakufiska kukhala kwambura wovwiri wa Yehova. Ntheura kuli wuli para tili na wovwiri wa Yehova!”

Yevgeniy wakuti pasono wakhorwa nadi kuti Yehova wakutovwira. Yevgeniy wakuyowoya kuti: “Nkhugomezga kuti Adada ŵithu ŵakutovwira, chomenechomene para tikusangana na viyezgo vikuru. Nakuti pasono nkhufipa mtima chomene yayi na viyezgo ivyo vingiza kunthazi uku.”

Vilije kanthu kuti kwali khoti lizamupeleka chigamuro wuli, Yevgeniy wakuti: “Naŵikapo mtima kuchita chilichose kuti nizizipizge viyezgo vyose ivi na kulutilira kuŵa wakugomezgeka.”

Na wovwiri wa Yehova, tikumanya kuti ŵabali aŵa na mbumba zawo, ŵalutilirenge kuzizipizga mwachimwemwe apo ŵakujumpha mu nyengo zakusuzga izi.—2 Ŵatesalonika 3:5.