Khoti la Sovetskiy ilo lili ku Chigaŵa cha Lipetsk sonosono apa lipelekenge chigamuro pa mulandu wa Mubali Viktor Bachurin, Aleksandr Kostrov, na Artur Netreba. a

Viktor Bachurin

• Chaka cha kubabikira: 1962 (ku Pavlovsky Posad, Chigaŵa cha Moscow)

• Mbiri yake: Wali kutora, wali na ŵana ŵaŵiri kweniso muzukuru yumoza. Wakamba kusambira Baibolo na Ŵakaboni ŵa Yehova cha m’ma 1990 ndipo wakabatizika mu 1992. Pasono, ndiyo yekha mu banja lake uyo ni Kaboni

Aleksandr Kostrov

• Chaka cha kubabikira: 1961 (ku Sortavala, Republic of Karelia)

• Mbiri yake: Wali kugwirapo ntchito yakwendeska ndege, yakotchelera visulo, kweniso wali kugwirapo ntchito ya vya magesi. Wakatorana na muwoli wake, Larisa, mu 1997. Ŵali na ŵana ŵaŵiri. Pasono wali kupumura ntchito ndipo wakutemwa kuŵeja somba. Wakabatizika mu 2002 pamanyuma pakuti wawamo kuti wakukhala umoyo uwemi chifukwa cha kulondezga ivyo Baibolo likuyowoya

Artur Netreba

• Chaka cha kubabikira: 1978 (ku Glodeni, Moldova)

• Mbiri yake: Wakatorana na Svetlana mu 1995 ndipo ŵali na mwana yumoza msungwana. Ŵakasamukira ku Lipetsk chifukwa cha kupenja ntchito. Wakugwira ntchito ya umanejara ku kampani yinyake ya kuguliska vinthu. Wakakhorwa kuti kulondezga fundo za mu Baibolo kukovwira munthu kuŵa wakukondwa. Wakabatizika mu 2000

Pa December 2, 2019, ŵamazaza ku Chigaŵa cha Lipetsk ŵakasecha nyumba 7. Mubali Viktor Bachurin, Aleksandr Kostrov, na Artur Netreba ŵakakakika. Ŵa Federal Security Service (FSB), ŵakati ŵabali aŵa “ŵapalamura milandu yikuru chomene iyo yikususkana na dango” chifukwa cha kuchita maungano gha mpingo kweniso vinthu vinyake vyakukhwaskana na kusopa kwawo. Ŵabali aŵa ŵakasungika mu jele umo ŵakakhalamo mazuŵa 331.

Aleksandr wakuwona kuti ubwezi wake na Yehova ukakhora chomene apo wakaŵa ku jele uko ŵakamusunganga. Iyo wakuti: “Panyengo ya viyezgo nga ni ivi, ukumanya kuti wovwiri ukuru ukufuma kwa Yehova.”

Artur wakulongosora ivyo waŵikapo mtima kuchita. Iyo wakuti: “Naŵikapo mtima kuti nileke kutaya chimwemwe chane. Nkhujikumbuska kuti viyezgo ivi ni vyakanyengo ndipo Adada ŵane ŵazamunipembuzga. Chikuru pasangika m’pata, nkhuyowoya za Chiuta withu mutuŵa, Yehova.”

Viktor wakuti: “Yehova wakalongora kuti ni mubwezi wane wanadi apo nkhasangananga na masuzgo ghakupambanapambana. Kanandi nkhajipulikanga kuti Yehova wakunitemwa.”

Viktor wakuwonga chomene ŵabali na ŵadumbu wose awo ŵakawovwira muwoli wake uyo ni Kaboni wa Yehova yayi apo wakaŵa ku jele. Viktor wakati: “Muwoli wane wakakondwa chomene na umo ŵadumbu ŵanyake ŵakamovwilira. Nkhugomezga kuti ŵa mu banja lane ŵakajiwonera ŵekha chitemwa icho chili pakati pa ŵanthu ŵa Yehova.”

Tikumanya kuti Yehova walutilirenge kusanguluska ŵabali ŵithu wose awo ŵakutambuzgika ku Russia na mu vyaru vinyake.—Yesaya 51:12.