Khoti la Volgograd Traktorozavodsky lipelekenge chigamuro chake sonosono apa pa mulandu wa Mubali Sergey Melnik, Valeriy Rogozin, na Igor Yegozaryan. a Uyo wakwimira boma pa milandu wachali wandapemphe chilango icho khoti likwenera kuŵapa ŵabali aŵa.

Sergey Melnik

• Chaka cha kubabikira: 1972 (Volgograd, Chigaŵa cha Volgograd)

• Mbiri yake: Wakasambira vya umakaniki ku koleji yinyake. Pasono wakugwira ntchito ya kukhoma nyumba. Wakatorana na Anna mu 1993. Ŵali na ŵana ŵanalume ŵatatu. Mbumba yake yikutemwa kutembeya na kukondwa na chilengiwa

  Anna ndiyo wakamba kusambira Baibolo na Ŵakaboni ŵa Yehova. Sergey wati wawona umo mwanakazi wake wakasinthira nkharo yake, nayo wakamba kusambira Baibolo. Wakabatizika mu 1999

Valeriy Rogozin

• Chaka cha kubabikira: 1962 (Krasnokamsk, Chigaŵa cha Perm)

• Mbiri yake: Wakagwira ntchito yakwendeska ndege ya ŵasilikari kwa vyaka 12, kufuma apo wakapumura na kwamba kugwira ntchito ya vya uinjiniya. Wakatorana na Marina mu 1984. Ŵali na ŵana ŵanalume ŵaŵiri

  Wakamba kusambira Baibolo cha m’ma 1990. Wakabatizika mu 1998

Igor Yegozaryan

• Chaka cha kubabikira: 1965 (Volgograd, Chigaŵa cha Volgograd)

• Mbiri yake: Wakugwira ntchito yakusona skapato kweniso ntchito ya vya magesi kuti wasange sopo na mchere. Wakamba kutemwa sumu apo wakaŵa wachali muchoko. Wakulizga gitara. Wakatorana na Yevgeniya mu 2002. Ŵali na mwana yumoza

  Amama ŵake ndiwo ŵakamba kumuphalira uthenga uwemi wakukhwaskana na Ufumu wa Chiuta. Wakakhorwa na unenesko wa mu Baibolo uwo ngupusu na wakupulikikwa makora. Wakabatizika mu 1992

Pa May 16, 2019, ŵapolisi na ŵa Federal Security Service (FSB) ŵakasecha nyumba 7 za ku Chigaŵa cha Volgograd ku Russia. Pati pajumpha mazuŵa ghaŵiri, mweruzgi wa khoti la mu boma ili wakadumura kuti Mubali Melnik, Rogozin, na Yegozaryan ŵasungike mu jele. Ŵabali ŵatatu aŵa ŵakasungika mu jele kwa myezi 7.

Nangauli pasono ŵabali aŵa ŵaliso lumoza na mbumba zawo, kweni ŵakukumana na masuzgo apo ŵakulindilira cheruzgo icho khoti lipelekenge pa mulandu wawo. Mwachiyelezgero, Valeriy wali kuŵikika mu gulu la ŵanthu awo wupu wa Federal Financial Monitoring Service of the Russian Federation ukuŵafufuza. Valeriy wakuti: “Ŵali kunikanira kugwiliskira ntchito ma akaunti yane yose gha ku banki, ndipo ŵali kunikanizgaso kugwiliskira ntchito foni na Intaneti. Pasono ntchito yane yili kumara chifukwa yikakhumbikwanga vinthu vyenevivi kuti nigwire makora.” Iyo na muwoli wake ŵakugwiliskira ntchito ndalama za penshoni kuti ŵalipilire vinthu vyakukhumbikwa pa umoyo wawo wa zuŵa na zuŵa. Iwo ŵakwenera kusintha vinthu vinandi pa umoyo wawo.

Sergey na Igor nawo ŵakutondeka kusanga ntchito chifukwa chakuti khoti lili kuŵakanizga kuchita vinthu vinyake. Sergey wakuti chifukwa wakuluta kukategherezga mulandu wake ku khoti kaŵirikaŵiri, vyatimbanizga chomene umo wakagwiliranga ntchito yake kumasinda uku. Iyo wakuti: “Nkhugwira ntchito ya kukhoma nyumba, ntheura pasono nkhugwira waka ntchito zichokozichoko mwakuti nimalizge mwaluŵiro pambere nindalute kukategherezga mulandu wane ku khoti.”

Igor wali na suzgo linyake mu thupi ndipo wakwenera kuluta ku chipatala pafupipafupi kukapokera wovwiri. Iyo wakuti : “Chifukwa cha mulandu uwo ŵakunipa, ntchakusuzga kuti nisange ntchito.” Iyo wakulutizga kuyowoya kuti apo wali na suzgo la mu thupi ili kweniso la vya ndalama “Yehova watipa mbumba yikuru ya ŵabali na ŵadumbu awo ŵandatilekepo mu nyengo yakusuzga iyi.”

Ntchakuwonekerathu kuti ŵabali ŵithu na mbumba zawo ŵakusangana na masuzgo pa nkhani ya vya chuma chifukwa cha kukanizgika kuchita vinthu vinyake. Tikugomezga kuti ŵabali na ŵadumbu ŵithu wose ku Russia ŵalutilirenge kuŵa ŵakukhora mu nyengo yakusuzga iyi, pakumanya kuti Yehova walutilirenge kuŵapa vyakukhumbikwa vyawo vyose.—Mateyu 6:33.