Khoti la Leninskiy ku Rostov-on-Don lipelekenge chigamuro chake sonosono apa pa mulandu wa Mubali Arsen Avanesov, Vilen Avanesov, na Aleksandr Parkov. a

Arsen Avanesov

• Chaka cha kubabikira: 1983 (ku Baku, Azerbaijan)

• Mbiri yake: Wakasambira vya uinjiniya ndipo wakagwiranga ntchito ya vyakuzenga. Apo wakaŵa muchoko wakatemwanga kuseŵera maseŵera gha rugby. Wali kusambira Chingelezi na Chifurenchi

  Ŵapapi ŵake ŵakamovwira kuti wambe kutemwa Baibolo. Wakabatizika na kuŵa Kaboni wa Yehova mu 2005

Vilen Avanesov

• Chaka cha kubabikira: 1952 (ku Baku, Azerbaijan)

• Mbiri yake: Wakagwiranga ntchito ya vya magesi kweniso ya kuzenga. Wakutemwa vyakuphikaphika na kuŵerenga. Baibolo ndilo likaŵa buku lake la pamtima apo wakaŵa munyamata

  Wakatorana na muwoli wake Stella mu 1980. Ŵali na mwana mwanalume zina lake Arsen, na mwana mwanakazi zina lake Elina. Banja lawo likasamira ku Armenia mu 1988. Mu chaka chenechichi, ku Yerevan, Armenia, kukachitika chindindindi kweniso chuma chikanjira pasi chomene, ivyo vikapangiska banja ili kusamaso. Ŵakasamira ku Rostov-on-Don, Russia. Wakabatizika mu 2006

Aleksandr Parkov

• Chaka cha kubabikira: 1967 (ku Spassk, Chigaŵa cha Kemerovo)

• Mbiri yake: Kufuma apo wakaŵa muchoko, wakasambira kulimbikira ntchito ndipo wakapweleleranga munda kweniso kuliska viŵeto. Wakagwiranga ntchito ya kwendeska thirakitara kweniso yakupanga vinthu kufuma ku mkuŵa

  Wakatorana na muwoli wake Galina mu 1990. Ŵakamba kusambira Baibolo lumoza. Wakabatizika mu 1992. Ŵali na ŵana ŵanakazi ŵatatu kweniso ŵazukuru ŵaŵiri

Pa May 22, 2019, ŵamazaza ŵakasecha nyumba zinandi za Ŵakaboni ŵa Yehova ku Rostov-on-Don. Mubali Vilen Avanesov na mwana wake Arsen, pamoza na Mubali Aleksandr Parkov ŵakaŵatora na kuluta nawo kukaŵajalira mu selo, ndipo ŵakaŵasunga kwa vyaka pafupifupi viŵiri. Mu March 2021, ŵabali wose ŵatatu aŵa ŵakaŵasamuskira ku jele linyake.

Stella uyo ni muwoli wa Vilen, wakukanizgika kuluta kukamuwona mfumu wake na mwana wake. Nakuti wakusuzgika chomene kuti wasange ndalama payekha. Galina uyo ni muwoli wa Aleksandr, nayo wakapika mulandu chifukwa cha chipulikano chake. Khoti likati wali na mulandu ndipo wakhale vyaka viŵiri na myezi yitatu kwambura kusangikaso na mulandu.

Tose tikukhwaskika chomene na vinthu vyambura urunji ivyo vikuchitikira ŵabali ŵithu aŵa. Tilutilirenge ‘kukumbuka awo ŵali mu jele, nga ni para nase takakika pamoza nawo.’—Ŵahebere 13:3.