AUGUST 20, 2021
RUSSIA

Ŵabali Ŵatatu na Mudumbu Awo Ŵakusungika mu Jele ku Dagestan Ŵawona Umo Yehova Waŵawovwilira

JULANI

Nyengo

Khoti la Kirovksiy ilo lili ku Makhachkala, Republic of Dagestan, sonosono apa lidumurenge mulandu wa Mubali Marat Abdulgalimov, Arsen Abdullaev, Anton Dergalev, na Mudumbu Mariya Karpova. a Wakwimira boma pa milandu wachali wandasankhe chilango icho ŵabali na mudumbu uyu ŵangapika
Pa May 27, 2020

Pati pajumpha mazuŵa 362, Mubali Marat, Arsen, Anton, na Mudumbu Mariya ŵakaŵawuskamo mu jele ilo ŵakaŵasunganga na kuŵaŵika pa jele la panyumba
Pa June 4, 2019

Khoti la Sovetskiy ku Makhachkala likasunga ŵabali na mudumbu withu mu jele
Pa June 1, 2019

Ŵa FSB, na ŵapolisi ŵachisisi ŵa ku Russia ŵakasecha nyumba 13 za Ŵakaboni ŵa Yehova ku Dagestan
Pa May 27, 2019

Ofesi ya ŵa FSB ku Dagestan yikajulira mulandu Mubali Marat, Arsen, Anton, na Mudumbu Mariya

Vyakukhwaskana na Ŵanthu aŵa

Marat Abdulgalimov

Chaka cha kubabikira: 1991 (Makhachkala, ku Republic of Dagestan)

Mbiri yake: Wali na ŵana ŵakwake ŵatatu. Wakutemwa kutimba bola la malundi. Wali kusambira ntchito yakuwotchelera visulo kweniso wakagwiranga ntchito mu sitoro ya skapato

Kwamba wachali muchoko wakutemwa kuŵerenga Baibolo. Wakatemwanga kuchezga na ŵanthu awo ŵakuyezga Khristu kweniso wakutemwa chomene ŵazengezgani ŵawo. Wakabatizika na kuŵa Kaboni wa Yehova mu 2013

Ivyo Wakayowoya

Kasi ntchivichi chikamovwirani kuzizipizga apo ŵakamusunganinge mu jele pafupifupi chaka?

Nkhamba kughanaghanira masuzgo ghane nakuyananiska na masuzgo agho Yosefe wakakumana nagho. Ine panji ningajalirika mu jele kwa vyaka vyambura kujumpha 10. Kweni Yosefe wakakhala mu jele vyaka 13. Nkhuwona kuti na wovwiri wa Yehova, nane ningalutilira kuŵa wakugomezgeka nangauli nkhusangana na masuzgo. Para nawona umo Yehova wakuzgolera malurombo ghane, vikunovwira kuti nimuthulirenge vyose ivyo nkhwenjerwa navyo. Lemba la Salimo 55:22 likunovwira kuzizipizga chiyezgo ichi. Lemba ili likuti usange nkhumuthwikiska Yehova katundu wane, wanovwirenge. So ndivyo nkhuchita nadi.

Arsen Abdullaev

Chaka chakubabikira: 1979 (Kasumkent, ku Republic of Dagestan)

Mbiri yake: Kwamba wachali muchoko, wakutemwa kuseŵera volleyball kweniso kuŵerenga mabuku. Wali na digiri ya masambiro yakupanga vinyo. Mwasonosono apa wagwiranga ntchito ya upulambara

Nangauli ŵapapi ŵake ŵakamususkanga wati wamba waka kusambira Baibolo, kweni wakalutilira ndipo wakabatizika na kuŵa Kaboni wa Yehova mu 2000. Wali kutorana na Suat, ndipo ŵali na mwana musepuka

Ivyo Wakayowoya

Kasi mukachita wuli kuti muleke kugongowa apo ŵakamusunganinge mu jele?

Sumu zithu zikanovwira chomene. Zikanovwira kuti nijipulikenge makora. Nkhajiyimbiranga waka nekha mu mtima. Nkhutemwa chomene sumu nambara 45 yakuti, “Maghanoghano gha Mtima Wane.” Mbunenesko kuti nyengo zinyake nkhagongowanga, nkhakondwanga yayi na chilichose, nkhakwiyanga, kweniso nkhakhumbanga yayi kuchita chilichose. Kweni nkhayezgeskanga kuchitapo kanthu kuti nileke kukhalira waka kujipulika nthena zuŵa lose. Para namba kujipulika mwambura kwenelera, nkhajiphaliranga kuti: ‘Machero para wawuka vyose vizamuŵa makora. Uzamujipulikaso nthena yayi. Uŵe wankhongono, banja lako, kweniso ŵabali na ŵadumbu, wose maso ghali kwa iwe.’

Anton Dergalev

Chaka cha kubabikira: 1985 (Rostov-on-Don, ku Chigaŵa cha Rosto)

Mbiri yake: Anton na mwana wakwake ŵakalereka na amama ŵawo pera. Amama ŵake na agogo ŵake ŵakamusambizga kutemwa fundo za mu Baibolo. Wakagwiranga ntchito ya vyamagesi kweniso kupima malo. Wakabatizika na kuŵa Kaboni wa Yehova mu 2002

Ivyo Wakayowoya

Kasi Yehova wamovwirani wuli pa chiyezgo ichi?

Ŵabali na ŵadumbu ŵachita vinandi kuti ŵalongore kuti ŵakutighanaghanira. Munthu munyake uyo tikaŵira lumoza mu jele wakati nilekenge kupokera katundu kufuma ku ŵanyane ŵakuwaro para pajumpha myezi yichoko waka. Kweni wakazizwa kuwona kuti ŵanyane ŵakalutilira kunitumira vinthu pati pajumpha myezi 6 kweniso kufika pafupifupi chaka!

Kasi mungaŵaphalirako vichi ŵanyake kuti nawo ŵanozgekerenge?

Nkhuŵachiska kuti ŵangalekanga yayi kuchita maungano pamoza na ŵabali na ŵadumbu. Naghasoŵa chomene maungano. Gwiliskirani ntchito mwamahara vyose ivyo Yehova wakupeleka. Lutilirani kukhozga chipulikano chinu kweniso ubwezi winu na Yehova ndipo kopa chilichose yayi. Nyengo zose Yehova wali nase!

Mariya Karpova

Chaka cha kubabikira: 1980 (Magadan, ku Chigaŵa cha Magadan)

Mbiri yake: Wali na ŵadumbu ŵake ŵaŵiri. Wakutemwa kuseŵera mu chiwuvi, kwenda mu malo ghakupambanapambana, kweniso kuŵerenga. Wali na digiri ya vyamunkhwara wa viŵeto

Wakasankha kuŵa Kaboni wa Yehova wati wasanga mazgoro ghakukhorweska kufuma mu Baibolo pa nkhani ya ivyo vichitikenge munthazi. Wakabatizika mu 1998

Ivyo Wakayowoya

Kasi ntchivichi chikamovwirani kuti muleke kwenjerwa chomene apo ŵakamusunganinge mu jele?

Nkhakumbukiranga mavesi ghanandi gha mu Baibolo ndipo nkhaghalemba mu buku lane. Mavesi agha ghakanikhozga kwa myezi yitatu iyo nkhaŵavya Baibolo. Lemba la Ŵafilipi 4:6, 7 likanikhozga chomene. Para namba kwenjerwa na chinthu chinyake, nkhajuranga buku lane lira na kuŵerenga lemba ili, ndipo nkhajiphaliranga kuti: ‘Leka kwenjerwa na chinthu chilichose.’ Paumaliro, nkhajipulikangako makora.

Kasi muli na ukaboni wuli wakumukhorweskani kuti Yehova wamovwirani nadi mu nyengo ya kusuzga iyi?

Nkhuwona kuti Yehova wakanovwira apo nkhapokera uthenga wakuti adada ŵatayika [pa nyengo iyo nkhasungikanga mu jele]. Kweni uwemi wake ngwakuti nkhapokera uthenga uwu kufuma kwa amama m’malo mwakuti munthu munyake ndiyo waniphalire. Kweniso chakukhozga ntchakuti ŵanyane ŵapamtima ŵaŵiri ŵakaluta ku nyifwa ya adada kuti ŵakaŵire lumoza na amama m’malo mwa ine. Iwo ŵakaluta na chilato chakuti ŵakawovwire amama pa nyengo ya visuzgo iyi. Ŵabali na ŵadumbu nawo ŵakaŵaleka ŵekha yayi amama. Ŵakaŵayimbiranga foni, kuŵatumizgira makadi, kweniso kuŵawovwira vyakukhumbikwa vya ku thupi kuti ŵakwaniske kwiza kuzakategherezga mulandu wane.

Tili na chigomezgo chose kuti Yehova Chiuta walutilirenge kuchita vinthu kuyana na zina lake kuti waŵenge icho wasankha kuŵa na chilato chakuti wavikilire na kovwira ŵanthu ŵake.—Ekisodo 3:14.

a Ni nyengo zose yayi apo zuŵa lakupelekera chigamuro likumanyikwirathu.