JANUARY 20, 2022
RUSSIA

Ŵabali Ŵithu mu Msumba wa Karpinsk, Ŵakuthemba Yehova Kuti Ŵaŵe na Chipulikano Chakukhora

JULANI

KKhoti la Karpinsk ilo lili ku Chigaŵa cha Sverdlovsk lipelekenge chigamuro chake sonosono apa pa mulandu wa Mudumbu Darya Dulova, Venera Dulova, Mubali Aleksandr Prianikov na muwoli wake Anastasiya Prianikova, na Mudumbu Svetlana Zalyaeva. Uyo wakwimira boma pa milandu wachali wandapemphe chilango icho ŵangapika

Nyengo

January 27, 2020

Khoti likati Aleksandr, Darya, na Venera ŵali na mulandu, pa mulandu uwo ŵakapika pakwamba
February 2020

Ŵamazaza ŵakajulira Aleksandr, Darya, na Venera mulandu wachiŵiri
March 30, 2020

Ŵamazaza ŵakasecha nyumba za ŵabali awo ŵakapika mulandu ndipo ŵakaŵapoka mafoni, matabuleti na malaputopu
May 19, 2020

Anastasiya na Svetlana nawo ŵakasazgika ku mulandu uwu. Wose ŵakakanizgika kufuma mu chigaŵa icho ŵakakhalanga
April 29, 2021

Khoti likamba kutegherezga mulandu

Vyakukhwaskana na ŵanthu aŵa

Venera Dulova

Chaka cha kubabikira: 1968 (Karpinsk, Chigaŵa cha Sverdlovsk)

Mbiri yake: Wakalereka na amama kweniso abuya ŵake. Wakutemwa kuluka, kuŵazga, na kusambira. Amama na abuya ŵake ŵakafwa pambere wandakwaniske vyaka 17. Wakatengwa mu 1990. Wali na ŵana ŵatatu

Wakajifumbanga chifukwa icho taŵanthu tikufwira kweniso umo vinthu vizamuŵira ku ŵana ŵake kunthazi. Wakamba kusambira Baibolo na Ŵakaboni ŵa Yehova apo wakaŵa na vyaka 28. Wakabatizika mu 1998

Ivyo Wakayowoya

Kasi Yehova wamovwirani mu nthowa wuli mu nyengo yakusuzga iyi?

Ŵachibali ŵane awo pakwamba ŵakanisuskanga kweniso mfumu wane, pasono ŵakulongora kuti ŵakutifipira mtima. Mfumu wane wakunilumba ndipo wakunichiska kuti nileke kuthera. . . . Yehova wakutovwiraso kwizira mu mazgu ghalusungu agho ŵabali na ŵadumbu ŵithu ŵakutiphalira.

Apo ŵakasecha kakwamba nyumba yane, chinthu chakwamba icho chikiza mu maghanoghano ghane chikaŵa chakuti: ‘Nadi, ŵakuti ine nili na mulandu? Ivi vingachitika cha! Nkhulota waka kwali!’ Kweni mubwezi wane wakanichiska kuti nighanaghanenge kuti, ‘Ndine wakutonda—nga ni umo wakachitira Yesu.’

Aleksandr Prianikov

Chaka cha kubabikira: 1987 (Udinsk, Chigaŵa cha Khabarovsk)

Mbiri yake: Wakutemwa sumu. Wakulizga chikediyoni. Wakagwiranga ntchito ya vyamagesi pa fakitale yinyake. Pasono wakupanga matayilosi

Kwamba kale wakugomezga kuti kuli Chiuta. Wakakhwaskika chomene na layizgo la Chiuta lakuti ŵanthu ŵazamukhala kwamuyirayira kwambura kufwa. Wakabatizika mu 2004. Wakatorana na muwoli wake Anastasiya, mu 2011

Ivyo Wakayowoya

Kasi ŵabali ŵamukhozgani wuli mu nyengo yakusuzga iyi?

Mubali munyake wakatichiska kuti tighanaghanirepo lemba la Salimo 139:1. Iyo wakati “Yehova wakumutemwani chomene mwakuti wakumanya makora ivyo mukughanaghana, umo mukujipulikira, ivyo mukuyowoya, na ivyo mukuchita. . . . Themba Davide likamanyanga umo Yehova wakupwelelera waliyose wa ise payekha. . . . Yehova wakusanda makora ivyo vikutichitikira pa umoyo withu kweniso umo ise tiliri nadi. Ntheura tingaghanaghananga kuti tili tekha yayi.” Mazgu agha ghakanifika pa mtima chomene. Zuŵa lililose nkhuwona kuti Yehova wali nane pafupi.

Anastasiya Prianikova

Chaka cha kubabikira: 1987 (Karpinsk, Chigaŵa cha Sverdlovsk)

Mbiri yake: Iyo na mudumbu wake mulara ŵakalereka na amama ŵawo. Wakutemwa kwimba na kusona

Wakakhorwa na layizgo la mu Baibolo lakuti kunthazi kuzamuŵa mtende. Wakawamo kuti mu Baibolo muli fundo za vinjeru na zakovwira chomene. Wakabatizika mu 2002. Wakatengwa kwa Aleksandr mu 2011

Ivyo Wakayowoya

Kasi ubwezi winu na Yehova wakhora wuli mu nyengo yakusuzga iyi?

Mu vyaka pafupifupi vitatu ivyo ŵakuti nili na mulandu, chipulikano chane chakhora chomene. Pasono nkhuthemba chomene Yehova. Nkhumanya kuti nyengo zose Yehova wakupwelelera ŵanthu ŵake. Nyengo zinyake vingawoneka nga kuti palije icho ungachita, kweni Yehova wakutovwira kuti tizizipizge. Nawonaso kuti para nkhutambuzgika chomene, ndiposo khumbo lakuti nimuchitire vinandi Yehova likukura.

Apo ŵabali na ŵadumbu ŵithu ŵakulutilira kutambuzgika ku Russia, tikukhozgeka chomene kuwona umo Yehova wakuŵatemwera kweniso kuŵawovwira ŵabali ŵithu ŵakutemweka aŵa. Kuyezgeka kwa chipulikano chawo kwapangiska kuti zina la Yehova lipike “malumbo na uchindami na ntchindi.”—1 Petrosi 1:7.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI