OCTOBER 1, 2021
RUSSIA

Ŵabali 5 Ŵaŵikapo Mtima Kulutilira Kuzizipizga Nangauli Ŵakutambuzgika

JULANI

Nyengo

Khoti la Industrialniy ilo lili ku Orenburg lipelekenge chigamuro chake sonosono apa pa mulandu wa Mubali Vladimir Kochnev, Vladislav Kolbanov, Pavel Lekontsev, Sergey Logunov, na Nikolay Zhugin. a Uyo wakwimira boma pa milandu wachali wandapemphe chilango icho ŵangapika
March 1, 2021

Pati pajumpha chaka na myezi kufuma apo mulandu wawo ukawelera ku ofesi ya wakwimira boma pa milandu, Khoti la Industrialniy ku Orenburg likambaso kutegherezga mulandu wawo
January 14, 2020

Mulandu ŵakawuwezgera ku ofesi ya wakwimira boma pa milandu chifukwa vifukwa ivyo vikapelekeka vikaŵa vyambura kupulikikwa
August 3, 2018

Vladimir wafumiskika mu jele ilo wakasungika kwa mazuŵa 79, na kutumika pa jele la panyumba
May 16, 2018

Ŵamazaza ŵakasecha nyumba za mbumba 19 ku Chigaŵa cha Orenburg. Vladimir na Vladislav ŵakaluta nawo kukaŵasunga dankha mu jele. Vladislav wakatumika pa jele la panyumba pati pajumpha mazuŵa ghatatu
May 14, 2018

Komiti Yakufufuza Milandu ku Russia ya ku Chigaŵa cha Orenburg yikajulira mulandu ŵabali 5

Vyakukhwaskana na ŵanthu aŵa

Vladimir Kochnev

Chaka cha kubabikira: 1979 (Orenburg)

Mbiri yake: Apo wakaŵa mwana wakatemwanga kuŵeja somba na kuseŵera bola la malundi. Wagwiranga ntchito yakupanga visulo kweniso kunozga ma TV na mawayilesi. Wakabatizika na kuŵa Kaboni wa Yehova mu 1993. Wakatorana na muwoli wake Galina mu 2003

Ivyo Wakayowoya

Kasi ubwezi winu na Yehova wakhora wuli chifukwa cha chiyezgo ichi?

Kuyowoya unenesko, nyengo iyo nanguŵa mu jele umo ŵanisunganga, yanguŵa nyengo yapadera chomene pa nkhani ya ubwezi wane na Chiuta. Nkhasambira kumuthemba chomene Yehova chifukwa nkhaŵa kwanekha ndipo pakaŵavya chakuti nichite kuti vinthu visinthe.

Kasi mungaŵaphalirako vichi ŵanyinu pa nkhani ya kunozgekera nthambuzgo munthazi?

Unenesko ngwakuti nthambuzgo ndiyo yikusintha munthu yayi. M’malo mwake, yikuvumbura waka wunthu wakubisika wa munthu waliyose. Para tikulutilira kulondezga ndondomeko yiwemi ya kuchitira vinthu vyauzimu, mbwenu chipulikano chithu chingalopwa yayi. Nakuti ghangaŵa mahara yayi kuti tichite kulindilira dankha kuti tizakasange nyengo yiwemi yakukhozgera ubwezi withu na Yehova. Mwachiyelezgero, tikwenera yayi kuchita kulindilira dankha chakuchitika chapadera kuti tambe kuŵerenga Baibolo zuŵa lililose panji kulomba pafupipafupi kwa Chiuta.

Vladislav Kolbanov

Chaka cha kubabikira: 1992 (Orenburg)

Mbiri yake: Amama ŵake ŵakamba kusambira Baibolo apo iyo wakaŵa na vyaka 6. Wakabatizika na kuŵa Kaboni wa Yehova mu 2008. Apo wakaŵa na vyaka 18, wakapempha kugwira ntchito yinyake padera pa usilikari. Ŵakamupa ntchito yakupwelelera ŵachekuru pa nyumba yinyake yakusungirako ŵachekuru

Ivyo Wakayowoya

Ni mwawuli umo chiyezgo ichi chamovwilirani kuti muŵikepo mtima kuteŵetera Yehova?

Ŵanyake ŵakutemwa kunifumba kuti, viŵenge kuti napika mwaŵi wakusankha, kasi nthena nawugwentha waka mulandu uwu? Mu mtima nkhujizgoranga kuti, nkhumanya kuti palije na chifukwa cha kudandawulira na ivyo vikunichitikira. . . . Nkhujiwonera nekha kuti Yehova wakunovwira pa umoyo wane, ndipo ŵabali na ŵadumbu nawo ŵakunovwira chomene.

Nkhumanya kuti munthu ungaŵa wakuzizipizga pekha para ukusangana na viyezgo, kweniso ndipo chipulikano chako mwa Yehova chikukhora ndiposo ukumutemwa chomene.

Pavel Lekontsev

Chaka cha kubabikira: 1981 (Kytat, Chigaŵa cha Krasnoyarsk)

Mbiri yake: Kufuma waka pa wana, wakutemwa chilengiwa. Wakutemwa kutembeya, kuŵeja somba, na kupenja wowa. Wagwirapo ntchito yakukhwaskana na vyakuzenga. Wakamba kusambira Baibolo na Ŵakaboni ŵa Yehova kuumaliro kwa ma 1990. Wakawamo kuti munthu wakuŵa wakukondwa para wakulondezga fundo za mu Baibolo pa umoyo wake. Wakabatizika mu 1999. Wakatorana na muwoli wake Oksana mu 2017

Ivyo Wakayowoya

Kasi mukajipulika wuli apo ŵakasechanga nyumba yinu, kumufumbani mafumbo na kumutambuzgani?

Apo ŵapolisi ŵakanjira mu nyumba mwane mwakuchichizga, nkhazizwa kuwona umo Yehova wakazgolera lurombo lwane lufupi chomene ndipo kakaŵa kakwamba pa umoyo wane kulomba lurombo lufupi nthena. Nkhalomba kuti wanovwire mtima uŵe m’malo. Lurombo ulu lukazgoreka mu masekondi ghachoko waka. Mtima ukaŵa m’malo ndipo nkhaghanaghananga makora waka.

Kasi mwaŵikapo mtima kuchita vichi vilije kanthu kuti kwali khoti lidumurenge wuli mulandu winu?

Ntchakusuzga kumanya chilango icho khoti lipelekenge. Kweni nili na chigomezgo chose kuti Yehova walutilirenge kunipa nkhongono. Nakuti vilije kanthu kuti kwali khoti lidumurenge vichi, ise ndise ŵakutonda kale! Nanga chiyezgo chingaŵa chikuru wuli, Yehova wakutovwira na mzimu wake. Ivi ndivyo nkhujiwonera nekha pa nyengo yose iyo nkhumuteŵetera Yehova! Ntheura naŵikapo mtima kuchimbira pa chiphalizgano m’paka kuumaliro.—2 Timote 4:7.

Sergey Logunov

Chaka cha kubabikira: 1962 (Orenburg)

Mbiri yake:Wakasambira kugwiliskira ntchito mashini ghanyake. Wati wagwirapo ku usilikari, wakamba kugwira ntchito ya kujambura vithuzi. Mwasonosono apa wangwamba kugwira ntchito ya kupwelelera maluŵa. Wachali kujambura vithuzi chifukwa ndivyo wakutemwa. Wakulizgaso gitara. Wakamba kusambira Baibolo na Ŵakaboni ŵa Yehova kukwambilira kwa ma 1990. Wakabatizika mu 1992. Wakatorana na muwoli wake Larisa mu 1994

Ivyo Wakayowoya

Kasi mungaŵaphalirako vichi ŵanyinu pa nkhani ya kunozgekera nthambuzgo munthazi?

Unenesko ngwakuti para tasangana na masuzgo ndipo tikulongora usange ndise ŵakugomezgeka nadi panji yayi. Kuti tinozgekere masuzgo munthazi, tikwenera kwambirathu sono nthena kukhozga ubwezi withu na Yehova kweniso Yesu Khristu. Vili nga ni umo lukuŵira lupanga. Kuti luŵe lakukhora na kuleka kuphyoka ku nkhondo, ŵakuwoneseska kuti chisulo icho ŵafura ntchakukhora chomene. Para msilikari wali na lupanga lwakukhora, wakujigomezga para wali ku nkhondo. Yesu wakati “uyo ngwakugomezgeka mu vichoko, ngwakugomezgeka na mu vinandi.” (Luka 16:10) Ntheura para munthu wakujisambizga kupulikira Chiuta mu vinthu vyose sono, mbwenu chizamuŵa chakusuzga yayi kulutilira kugomezgeka kwa Chiuta mu nyengo ya nthambuzgo.

Nikolay Zhugin

Chaka cha kubabikira: 1976 (Kazakhstan)

Mbiri yake: Apo wakaŵa mwana wakatemwanga kuchita maseŵera ghakupambanapambana. Wakugwira ntchito ya kotchelera visulo. Wakamba kusambira Baibolo na Ŵakaboni ŵa Yehova mukatikati mwa ma 1990. Wakabatizika mu 1996. Nangauli muwoli wake Galina, ni Kaboni wa Yehova yayi, kweni ŵali na mbumba yakukondwa ndipo ŵali na mwana mwanalume na mwanakazi

Ivyo Wakayowoya

Kasi mukamupempha vichi Yehova pa nyengo yakusuzga iyi?

Yehova wangativikilira yayi ku masuzgo ghose panji nthambuzgo zose. Iyo wakuzomerezga kuti ŵateŵeti ŵake ŵakumane na vinthu ivi. Ndipouli, nkhalomba kwa Yehova ndipo nichali kumupempha kuti wanovwire na mzimu wake utuŵa kuti nilutilire kuzizipizga viyezgo vyose ivi. Nkhuwona kuti Yehova wanovwiranga kale pa nyengo iyo ŵafufuzanga kweniso kutegherezga mulandu wane kuti nilutilire kuŵa wakukondwa. Nakuti kwambura Yehova, nthena palije icho nachitapo!

Nangauli pajumpha vyaka vitatu na myezi, kweni mulandu wa ŵabali aŵa uchali kulutilira, ntchakuwonekerathu kuti ŵabali ŵithu ŵakutemweka aŵa ŵaŵikapo mtima kulutilira kugomezgeka kwa Yehova. Nakutiso vikulongolerathu kuti Yehova wakuchita nawo mwakugomezgeka.—2 Samuyeli 22:26.

a Ni nyengo zose yayi apo deti ilo khoti lizamupelekera chigamuro chake likumanyikwirathu.