NOVEMBER 29, 2023
RUSSIA

Ŵabali 5 Ŵasangika na Mulandu na Khoti la Russia ilo Liri ku Chigaŵa cha Saratov

JULANI

Pa November 23, 2023, khoti la Balakovskiy ilo lili mu chigaŵa cha Saratov ku Russia likapeleka chigamuro chake chakukhwaskana na ŵabali aŵa: Aleksey Bogatov, Yevgeniy Fomashin, Vladimir Mavrin, Andrey Murych, na Sergey Tyurin. Ŵabali wose aŵa ŵali kusangika na milandu. Mubali Aleksey na Mubali Vladimir ŵali kuphalirika kuti ŵakwenera yayi kusangikaso na mulandu uliwose kwa vyaka 6. Mubali Andrey, Sergey na Mubali Yevgeniy ŵali kuŵalipiska ndalama zakukwana 300,000 rubles (iyo yikuyana waka na ndalama za ku America madola 3,362). Palije yumoza mwa ŵabali aŵa uyo wakukhumbikwira kuluta ku jele pasono.

Vyakukhwaskana na Ŵabali Aŵa

Aleksey Bogatov

Chaka chakubabikira: 1960 (Baklushi, Chigaŵa cha Ulyanovsk)

Mbiri yake: Wakagwiranga ntchito yakwendeska ambulasi

Wakatorana na Lyubov mu 1982. Wali na ŵana ŵatatu

Wakati wasambira Baibolo na ŵakaboni ŵa Yehova vikamovwira kupulikiska umo Ufumu wa Chiuta uzamwiziskira urunji wanadi ku ŵanthu wose. Wakabatizika mu 1994

Ivyo Wakayowoya

Kasi Yehova wakamovwirani wuli apo mukaŵa ku jele lakulindilirako?

Nkhaŵavya Baibolo mu mwezi wakwamba uwo ŵakanijalira, kweni nkhaŵa na chakulembera na buku. Nkhalombanga kwa Yehova zuŵa lililose kuti wanovwire kukumbukira malemba. Paumaliro wa mwezi, nkhaŵa kuti nakumbukira ma vesi ghakukwana 112. Uwu ukaŵa ukaboni kwa ine wakuti usange nkhuŵerenga Baibolo mwakukhazikika na kughanaghanirapo, Yehova wakugwiliskira ntchito mzimu wake utuŵa kuti unovwire kukumbukira. Nkhamuwonga chomene Yehova pakunovwira.

Yevgeniy Fomashin

Chaka chakubabikira: 1977 (Balakovo)

Mbiri yake: Wakagwiranga ntchito ya vyamagesi

Wakukondwa chomene na ivyo Baibolo likulayizga vyakukhwaskana na mtende kweniso kuti ŵanthu ŵazamukhala mwakukolerana pa charu chose chapasi. Wakabatizika mu 2013. Wakasambira chiyowoyero chamawoko kuti wawovwire ŵanthu ŵambura kupulika mu chikaya chawo

Ivyo Wakayowoya

Kasi viyelezgero vya ŵabali awo ŵakajalirikapo vikamovwirani wuli?

Apo nkhaŵa mu jele lakulindilirako, nkhaghanaghanira za ŵabali nga Konstantin Bazhenov, Aleksey Budenchuk, Gennadiy German, Roman Gridasov, Feliks Makhammadiyev, na Aleksey Miretskiy, awo nawo ŵakajalirika mu jele lenelili mu 2018 mpaka 2019. Chipulikano chawo chikanikhozga chomene. Ndipo nkhulutilira kukhozgeka na ŵabali kweniso ŵadumbu pa charu chose chapasi awo ŵakulutilira kugomezgeka nangauli ŵakukumana na masuzgo ghanandi. Vikuŵa nga kuti tose tikukumana na viyezgo.

Andrey Murych

Chaka chakubabikira: 1991 (Balakovo)

Mbiri yake: Wakugwira ntchito ku kamupani yakupanga visulo

Wakasambira Baibolo kakwamba kufuma kwa abuya ŵake. Wakazizikika chomene na kufiskika kwa mauchimi gha mu Baibolo ndipo wakabatizika mu 2007.

Wakatorana na Anastasiya mu 2009. Ndipo ŵali na mwana yumoza msungwana

Ivyo Wakayowoya

Kasi ntchivichi chikamovwirani kuti muzizipizge masuzgo agho mukakumananga nagho apo mukaŵa mu jele lakulindilirako?

Kwa ine, chinthu chakusuzga chomene chikaŵa kulutilira kuŵa wakukondwa chomenechomene myezi yakwambilira yiŵiri. Chinthu chimoza icho chikanovwira ndicho kughanaghanirapo umo kachitiro kane nangauli yikaŵa nyengo ya masuzgo kangalongolera kuti nichali kuwonga Yehova pa vyose ivyo wanichitira. Kulutilira kuŵa wakugomezgeka kwa Yehova kweniso kulutilira kuŵa wakukondwa ndiyo nthowa yiwemi chomene yakulongolera kuwonga. Kweniso nkhakhorwa chomene kuti na wovwiri wa Yehova, ningatonda suzgo lililose. Yehova wanganipa mtende pa suzgo lililose ilo ningasangana nalo.

Sergey Tyurin

Chaka chakubabikira: 1994 (Balakovo)

Mbiri yake: Wakagwiranga ntchito ya vyamagesi

Wakasambizgika vya Baibolo na abuya ŵake. Wakakhorwa kuti munthu wakuŵa na umoyo uwemi para wakulondezga fundo za mu Baibolo. Wakabatizika mu 2012

Wakatorana na Yelizaveta mu 2018

Ivyo wakayowoya

Kasi mwasambirapo vichi pakutambuzgika chifukwa cha chipulikano chinu?

Nasambirapo vinthu vitatu. Chakwamba, nyengo zose Yehova walipo kuti wanovwire. Wakumanya ivyo nkhukhumbikwira nadi, kweniso nyengo yiwemi yakunovwilira. Chachiŵiri, nkhuwona kuti chigomezgo mu ivyo Yehova watilayizga ntchinthu chakukhumbikwa chomene kwa ine kuti niŵe na mtende wa mumtima. Nangauli nthambuzgo ntchinthu chipusu yayi, kweni njakanyengo waka pakuyaniska na vitumbiko vyamuyirayira ivyo tizamusanga munthazi. Sonosono apa, nizamukumbukiraso yayi masuzgo ghose agha. Ndipo chachitatu ntchakuti, kukolerana uko kulipo mu gulu la Yehova nkhwakuzirwa chomene. Kukovwira kuti chiŵe chipusu kuzizipizga masuzgo, ndipo kukolerana uku kukwenera yayi kutimbanizgika.

Viyelezgero vya ŵabali ŵakugomezgeka 5 aŵa vikutikumbuska kuti para tikugomezga nkhongono za Chiuta, tingazizipizga masuzgo chifukwa cha makani ghawemi.—2 Timote 1:8.

Nyengo

February 11, 2022

Mulandu ukambika
March 23, 2022

Ŵapolisi ŵa FSB ŵakasecha nyumba za ŵabali wose 5. Wose ŵakaŵafumba mafumbo na kuŵatumizga ku malo ghakusungirako awo ŵakuŵaghanaghanira kuti ŵali na mulandu kwa nyengo yichoko
March 25, 2022

Ŵabali ŵakajalirika mu jele la awo ŵakulindilira chigamuro cha khoti
January 23, 2023

Ŵabali ŵakafumiskika mu jele ndipo ŵakakanizgika kuluta ku vigaŵa vinyake
July 21, 2023

Khoti likamba kutegherezga mulandu wawo
November 23, 2023

Ŵakasangika na mulandu

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI