JANUARY 20, 2022
RUSSIA

Ŵabali 7 ku Russia Ŵakusanga Nkhongono mwa Mlengi Wawo

JULANI

Khoti la Pechora ilo lili ku Komi lipelekenge chigamuro chake sonosono apa pa mulandu wa Mubali Nikolay Anufriyev, Eduard Merinkov, Gennadiy Polyakevich, Aleksandr Prilepskiy, Viktor Shchannikov, Gennadiy Skutelets, na Aleksandr Vorontsov. Uyo wakwimira boma pa milandu wachali wandapemphe chilango icho ŵangapika.

Nyengo

January 28, 2020

Ŵamazaza ŵakasecha nyumba 12 za Ŵakaboni ŵa Yehova ku Komi Republic. Mubali Polyakevich na Skutelets ŵakaŵajulira mulandu
January 30, 2020

Gennadiy Polyakevich wakatumizgika ku jele lakusungirako ŵanthu, ndipo Gennadiy Skutelets wakatumika pa jele la panyumba
May 20-25, 2020

Ŵamazaza ŵakafumba mafumbo Ŵakaboni ŵa Yehova ŵakufuma ku Pechora kuti ŵaŵe ŵakaboni pa mulandu uwu. Mubali munyake wakalwara sitiroku chifukwa cha kofyeka na uyo wakafufuzanga mulandu. Pasono wali makora
June 26, 2020

Nyengo yakumusungira mu jele Gennadiy Polyakevich ŵakasazgirako. Mweruzgi wakati Gennadiy Polyakevich wali na “mulandu ukuru wakuchita kuwukhumbira dala,” kusazgapo kuyowoya vyakukhwaskana na “khumbo lake la kulutilira kuteŵetera Yehova nanga wangatambuzgika na ŵamazaza”
August 24, 2020

Ŵamazaza ŵakasecha nyumba zinyakeso 12 za Ŵakaboni ŵa Yehova
November 10, 2020

Ŵamazaza ŵakajulira mulandu Aleksandr Prilepskiy, Aleksandr Vorontsov, Eduard, Nikolay, na Viktor. Mulandu uwu ŵakawusazga na mulandu uwo ŵakapa Gennadiy Polyakevich na Gennadiy Skutelets
November 25, 2020

Wati wakhala mazuŵa 300 mu jele lakusungirako ŵanthu pambere mulandu underuzgike, Gennadiy Polyakevich wakafumiskika na kutumika pa jele la panyumba
January 27, 2021

Gennadiy Skutelets wakafumiskika pa jele la panyumba, wati wakhalapo mazuŵa 363

Vyakukhwaskana na ŵanthu aŵa

Eduard Merinkov

Chaka cha kubabikira: 1975 (Pechora)

Mbiri yake: Kufuma waka pa wana, wakutemwa kuchita vinthu kuwaro kwa nyumba yake, nga kwendeska boti mu Mlonga wa Pechora. Wakugwira ntchito ku kampani yakuwona vya njanji. Wakabatizika mu 1993. Wakatorana na muwoli wake Valentina, mu 1997. Ŵali na mwana yumoza mwanakazi, zina lake Iolanta

Ivyo Wakayowoya

Kasi ndondomeko yinu yakuchitira vinthu vyauzimu yili wuli, ndipo yikumovwirani wuli kuti muzizipizge?

Chinthu chimoza icho nkhutemwa ndipo nkhukondwa nacho . . . nkhusunga pa mtima sumu za mu [JW Broadcasting]. Zikunovwira kujipulika kuti Yehova wakunovwira. Nkhwimba sumu izi palipose waka—kwali mphanyumba, mu galimoto, nanga kungaŵa ku ntchito! Nkhutemwaso lemba la Salimo 27 ndipo nkhuliŵazga mwakuwerezgawerezga.

Ntchivichi chikumovwirani kuti muleke kuthera?

Kumanya fundo yakuti Mlengi wa chilengiwa chose wakukhumba kuti niŵe mubwezi wake, kukunipa chimwemwe chikuru chomene. Vilije kanthu kuti kwali nisanganenge na viyezgo wuli, kweni nkhukhumba kuteŵetera Yehova umoyo wane wose. Naŵikapo mtima kulutilira kuŵa wakugomezgeka kwa Yehova m’paka paumaliro!

Aleksandr Prilepskiy

Chaka cha kubabikira: 1964 (Pechora)

Mbiri yake: Apo wakaŵa mwana wakatemwanga kuseŵera tennis. Wakulizga gitara. Wakabatizika mu 1994. Wakatorana na muwoli Vera, mu 1990. Wali na mwana yumoza mwanakazi na ŵazukuru ŵaŵiri

Ivyo Wakayowoya

Kasi ntchivichi chikumovwirani kuti mulutilire kuzizipizga?

Chitemwa cha Yehova kweniso chilindizga chiwemi cha munthazi chikunovwira kuti nilutilire kuyezga Khristu. Kuwona chilengiwa icho Adada ŵakuchanya ŵali kutipa nacho chikunikhozga chomene.

Kasi mungaŵaphalirako vichi ŵanyinu awo ŵakunozgekera nthambuzgo munthazi?

Nkhugomezga kuti ŵabali na ŵadumbu ŵakulutilira kugwiliskira ntchito mwakukwana vinthu vyose vyauzimu ivyo tili navyo. Para ŵakuchita nthena viŵawovwirenge kuti ŵalutilire kuŵa maso kweniso kutemwa Chiuta na makhaliro ghake ghapadera. Viŵawovwirengeso kuti ŵatemwanenge, na kuŵikapo mtima kupulikiskana, kweniso kugowokerana.

Viktor Shchannikov

Chaka cha kubabikira: 1961 (Beryozovka)

Mbiri yake: Apo wakaŵa muchoko wakatemwanga kudinda vithuzi na kupanga vinthu vyaluso. Kusambira fundo za mu Baibolo kukamovwira kuti waleke kumwa chomene moŵa. Wakabatizika mu 1990. Wakatorana na muwoli wake Viktoria, mu 2003. Ŵali na mwana munyamata wa vyaka 15

Ivyo Wakayowoya

Kasi ntchivichi icho mwachita kuti mbumba yinu yitemwanenge chomene kweniso kutemwa Yehova?

Tamba kumuthemba chomene Yehova, ndipo malurombo ghithu ghamba kuŵa ghakudunjika. Tikumalira nyengo yinandi pakuchezgera lumoza, ivyo vyatovwira kuti titemwanenge chomene. Nkhuŵikapo mtima kusambira makhaliro gha Yehova ndipo nkhuyezga kulondezga ivyo nasambira pa nkhani ya umo nkhuchitira vinthu na ŵamumbumba yane. Nakutiso wovwiri uwo muwoli wane wakunipa, wapangiska kuti nimutemwenge chomene.

Gennadiy Skutelets

Chaka cha kubabikira: 1976 (Pechora)

Mbiri yake: Apo wakaŵa muchoko wakatemwanga kuchita maseŵera ghakupambanapambana. Wakugwira ntchito ya kupwelelera malo. Wakakhorwa na kufiskika kwa uchimi wa mu Baibolo. Wakabatizika mu 2003

Ivyo Wakayowoya

Kasi mungatiphalirako chakuchitika chinyake icho chikamupangiskani kuwona kuti Yehova wakumovwirani mu nthowa yapadera?

Nkhati nafika ku jele lakusungirako ŵanthu awo mulandu wawo underuzgike, wachiŵiri kwa mulara wa jele wakazizwa chomene kuwona kuti mtima wane ukaŵa m’malo ndipo wakanifumba kuti, “Ukuneneska kuti nkhakwamba kwiza kuno nthena?” Ndipouli, namweneko nkhakatamiranga chifukwa cha kwenjerwa. Kufuma apo, nati nafika mu selo iyo ŵakaniŵika, nkhajipulika kuti nili pafupi chomene na Yehova. Yehova wanipa nkhongono [izo nkhukhumbikwira kuti mtima wane ulutilire kuŵa m’malo nangauli nkhusangana na masuzgo].

Aleksandr Vorontsov

Chaka cha kubabikira: 1984 (Pechora)

Mbiri yake: Kufuma apo wakaŵa mwana wakasambira vyakukhwaskana na Yehova kufuma ku ŵa mu mbumba yake kweniso ŵabwezi. Wakagwiranga ntchito ya ukalipentara. Wakabatizika mu 2012. Wakatorana na muwoli wake Yelena, mu 2016

Ivyo Wakayowoya

Kasi chilipo icho mubali panji mudumbu wali kumuphaliranipo ndipo chikamukhozgani na kumovwirani kuzizipizga?

Khoti lati lategherezga kakwamba mulandu wane, mubali munyake wakaniphalira kuti wakanilomberanga pambere khoti lindategherezge mulandu wane kweniso pamanyuma pakuti lategherezga. Chiyelezgero chake chikanikumbuska vya Nehemiya. Nane nkhachita mwakuyana waka ulendo wakulondezgapo apo khoti likategherezganga mulandu wane, nkhalombanga cha mu mtima nyengo yose iyo nkhaŵira mu khoti.—Nehemiya 2:4.

Kasi ni nkhani wuli ya mu Baibolo iyo yikamovwirani kuti muzizipizge?

Chiyelezgero cha Esitere chikunikhozga chomene. Nayo wakakhalanga mu nyengo iyo ŵanthu ŵakwake ŵakatambuzgikanga. Wakakhumbikwanga chikanga kuti wachitepo kanthu kuvikilira ŵanthu ŵakwake. Nane nkhajitora nga kuti ndine Esitere ndipo nkhujumpha mu masuzgo ghakuyana na ghake, ndipo ivi vikunovwira para nkhwimilira panthazi pa khoti kuvikilira Ŵakhristu ŵanyane.

Tili na chigomezgo chose kuti ŵabali ŵithu ŵasangenge vitumbiko sono m’paka munthazi chifukwa cha kulongora chipulikano mu uwemi wa Yehova.—Salimo 27:13.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI