Khoti la Leninskiy ilo lili mu Msumba wa Smolensk lipelekenge chigamuro chake sonosono apa pa mulandu wa Mudumbu Tatyana Galkevich na Valentina Vladimirova. Uyo wakwimira boma pa milandu wachali wandapemphe chilango icho ŵangapika.

1. May 14, 2019

   Ŵamazaza ŵakamba kufufuza mulandu wa Tatyana na Valentina. Ŵapolisi ŵakasecha nyumba ya ŵadumbu wose ŵaŵiri na kuŵakaka kweniso kuŵafumba mafumbo kwa maora ghakujumpha 48. Nangauli wose ŵali na masuzgo ghakuru muthupi, kweni ŵakaŵasunga dankha mu jele

2. November 22, 2019

   Pamanyuma pa myezi yakujumpha 6, Tatyana na Valentina ŵakafumiskika mu jele na kutumika pa jele la panyumba

3. December 31, 2019

   Valentina ŵakaluta nayo ku chipatala chifukwa wakalwara chomene

4. August 6, 2020

   Pamanyuma pa myezi pafupifupi 8, Tatyana wakafumiskika pa jele la panyumba ndipo wakakanizgika kufuma mu chigaŵa icho wakakhalanga. Valentina wachali pa jele la panyumba, ndipo wakuzomerezgeka kuyowoyeskana na wachibali wapafupi chomene na loya wake mbwenu

5. October 2, 2020

   Ŵamazaza ŵakati Tatyana na Valentina ŵali na mulandu uwo ŵakawulemba mu chikalata cha mapeji 400. Chikalata ichi chikatenge ŵadumbu aŵa ŵakakolerana kuti “ŵabise milimo ya gulu ilo likuchita vinthu vyakofya”

6. October 14, 2020

   Apo khoti likategherezganga mulandu wawo kakwamba, mweruzgi wakati mulandu uwu uwelere ku ofesi ya wakwimira boma pa milandu chifukwa ukaŵavya ukaboni wakukwana. Nangauli Valentina wakatondekanga kwimilira apo khoti likategherezganga mulandu wawo chifukwa cha ulwari, kweni khoti likakana kuti wafumiskike pa jele la panyumba

7. February 25, 2021

   Khoti la apilu likakana vyakuti mulandu uwu uwelere ku ofesi ya wakwimira boma pa milandu, ndipo likazomerezga kuti ulutilire kweruzgika

Tikulomba kuti mphanyi Yehova walutilira kuŵa ‘nkhongono na chiskango’ kwa Valentina, Tatyana, na ŵabali na ŵadumbu ŵithu wose awo ŵakutambuzgika ku Russia na Crimea.—Salimo 28:7.