Khoti la Sychyovskiy la ku Chigaŵa cha Smolensk lipelekenge chigamuro chake sonosono apa pa mulandu wa Mudumbu Nataliya Sorokina na Mariya Troshina. a Uyo wakwimira boma pa milandu wachali wandapemphe chilango icho khoti likwenera kuŵapa.

Nataliya Sorokina

• Chaka cha kubabikira: 1975 (Dresden, Germany)

• Mbiri yake: Wakasamuka ku Germany, kuluta ku Saint Petersburg kufuma apo ku Sychyovka mu Chigaŵa cha Smolensk. Ni nesi. Wakutemwa kuluka vinthu kweniso kusambira viyowoyero vyakupambanapambana kuti wapharazgirenge makora ŵanthu ŵanandi. Wakamba kusambira Baibolo na Ŵakaboni ŵa Yehova. Wakakhorwa na ivyo wakasambira vyakukhwaskana na chilengiwa na chigomezgo cha munthazi. Ivi vikamupangiska kuti waŵe na khumbo la kuteŵetera Chiuta. Wakabatizika mu August 1994

Mariya Troshina

• Chaka cha kubabikira: 1977 (Saint Petersburg)

• Mbiri yake: Kufuma apo wakaŵa muchoko wakatemwanga kusambira vya mbiri yakale. Wakagwirapo ntchito yakulongora ŵalendo malo. Wakutemwa kusambira viyowoyero vinyake kuti wapharazgire ŵanthu ŵanandi

  Wakamba kusambira Baibolo na Ŵakaboni ŵa Yehova. Wakakhorwa wakati wamanya kuti nyengo zose Baibolo likuyowoya unenesko kweniso likuneneska pa nkhani ya sayansi. Wakajipeleka kwa Yehova Chiuta mu July 1991. Amama ŵake, awo pasono ŵali kufwa, nawo ŵakasambira Baibolo na kubatizika

Pa October 7, 2018, ŵa Federal Security Service (FSB) pamoza na ŵapolisi ŵakasecha nyumba zinayi ku Sychyovka. Ŵa FSB ŵakapoka vinthu vya ŵabali na ŵadumbu 17, kusazgapo na ŵana wuwo. Mudumbu Nataliya Sorokina na Mariya Troshina ŵakakakika na kusungika dankha mu jele.

Pakuyowoya ivyo vikachitika apo ŵakasechanga nyumba za ku malo uku, Mariya wakuti kuŵerenga nkhani zakulongosora umoyo wa Ŵakaboni ŵanyake awo ŵakakakika chifukwa cha chipulikano chawo kukamovwira kuŵa wakunozgeka. Iyo wakuti: “Pa zuŵa ilo ŵakasecheranga mu nyumba kweniso kunikaka, mtima wane ukaŵa m’malo. Nkhamanyanga yayi kuti ningaŵa na mtende nthena mu mtima. Nakuti nkhumanya kuti ntchifukwa cha mzimu utuŵa wa Chiuta lekani nkhaŵa na mtende wa mu mtima.”

Pati pajumpha mazuŵa ghaŵiri kufuma apo ŵakasechera nyumba, Khoti la Leninskiy ilo lili mu msumba wa Smolensk likadumura kuti ŵadumbu ŵithu aŵa ŵasungike mu jele, ndipo ŵakakhalamo mazuŵa 191. Kufuma apo ŵakakhala pa jele la panyumba kwa myezi yakujumpha 6.

Ŵadumbu wose ŵaŵiri aŵa ŵakuyowoya kuti ŵakakwaniska kuzizipizga viyezgo chifukwa cha kuŵa pa ubwezi wakukhora na Yehova pambere ŵandasangane na viyezgo. Nataliya wakuti ntchiwemi chomene kuwona vinthu nga ni umo Yehova wakuviwonera. Iyo wakuti para tikutambuzgika, ntchakuzirwa chomene kukumbuka uyo wakupangiska. Mudumbu uyu wakumalizga kuyowoya kuti: “Kufuma kale Satana ndiyo wakupangiska kuti ŵanthu ŵa Chiuta ŵatambuzgikenge, ndipo waliyose wa ise wangalongora kuti ngwakugomezgeka kwa Chiuta.”

Mariya wakusazgirapo kuti: “Ubwezi withu na Yehova ukukhozgeka zuŵa na zuŵa, ntheura ntchakuzirwa chomene kuti tiwonenge woko la Yehova kweniso kumanya kuti wakutighanaghanira chomene. Mukwenera kuthemba Yehova pa chilichose. Ŵikanipo mtima kuti mutemwenge kuŵerenga Baibolo zuŵa lililose, na kusunga pamtima ivyo mukuŵerenga kweniso mavesi agho mukughatemwa.”

Chipulikano kweniso kuzizipizga uko ŵadumbu ŵithu ŵalongora, ntchiyelezgero chiwemi chomene kwa ise tose chifukwa ŵakulutilira ‘kuthemba Yehova uyo ni movwiri kweniso chiskango chawo.’—Salimo 115:11.