FEBRUARY 13, 2024
RUSSIA

Ŵakaŵikapo Mtima Pakuteŵetera Yehova

JULANI

Khoti la Vyselkovskiy ilo lili mu chigaŵa cha Krasnodar ku Russia, sonosono apa lipelekenge chigamuro chake pa milandu ya Ŵabali aŵa: Yevgeniy Bochko, Vladimir Kolesnikov, Aleksey Shubnikov, Vitaliy Ushakov na Valeriy Vechkayev. Wakwimira boma pa milandu wachali wandapemphe chilango icho ŵabali aŵa ŵangapika.

Vyakukhwaskana na ŵanthu aŵa

Yevgeniy Bochko

Chaka chakubabikira: 1975 (Novoberezansky ku chigaŵa cha Krasnodar)

Mbiri yake: Wakagwiranga ntchito ya kunozga vinthu

Wakalomba kwa Yehova kuti wamovwire kusanga chisopa chaunenesko. Wakabatizika na kuŵa yumoza wa Ŵakaboni ŵa Yehova mu 1998

Wakatorana na Anna mu 2009

Wakasangika na nthenda yakuchemeka multiple sclerosis

Ivyo Wakayowoya

Kasi chakuzirwa chomene kwa imwe chikaŵa chivichi apo ŵakamupaninge mulandu?

Nyengo yose iyi, ine na muwoli wane tikalombanga kuti tilumbe zina la Yehova. Tikaŵa nawo mwaŵi uwu. Apo yumoza wa awo ŵakatifumbanga mafumbo wakawonanga mafayelo ya milandu yithu, wakatifumba vinandi chomene vyakukhwaskana na Ŵakaboni ŵa Yehova. Pali mafayelo ghakurughakuru 17 ghakukhwaskana na mulandu withu, ndipo fayelo yiliyose yili na mapeji pakati pa 100 na 350. Pafupifupi pa peji lililose pali zina la Yehova. Ni mwaŵi ukuru kumanyiska ŵanthu zina la Yehova.

Vladimir Kolesnikov

Chaka chakubabikira: 1946 (Ukraine)

Mbiri yake: Wakaŵa msilikari. Pamanyuma wakamba kugwira ku migodi

Wakatorana na Zinaida mu 1979. Ŵali na ŵana ŵasungwana ŵaŵiri na munyamata yumoza. Zinaida wali kutayika mu 2020

Ŵakasambira Baibolo na Ŵakaboni ŵa Yehova. Wose ŵakabatizika mu 1995

Ivyo Wakayowoya

Kasi ntchivichi chamovwirani kuti mulutilire kuwona vinthu mwakwenelera nangauli mukukumana na viyezgo?

Ntchipusu yayi kulimbana na masuzgo ghanandi agho nkhukumana nagho. Nangauli nyengo zinyake nkhugongowa, kweni nasambira umo ningamazgira suzgo ili. Nkhulomba na kugwiliskira ntchito mabuku gha gulu agho nili nagho. Pasono nkhuwona kuti Mazgu gha Chiuta ngakuzirwa chomene, ndipo nasambira kuti ntchakuzirwa chomene kuphalira Yehova chilichose mu lurombo. Para nkhukumbuka, kumanyuma uku nkhayezgapo kulimbana nagho nekha masuzgo. Kweni pasono nkhukhorwa na umoyo para namuphalira Yehova umo nkhujipulikira, ivyo nkhufipa navyo mtima kweniso ivyo nkhukondwa navyo.

Aleksey Shubnikov

Chaka chakubabikira: 1982 (Nizhnevartovsk mu Chigaŵa cha Tyumen)

Mbiri yake: Wakachita ngozi apo wakaŵa na vyaka 16 ndipo wakugwiliskira ntchito njinga ya ŵanthu ŵakupendera. Wakakondwa na ivyo Baibolo likulongosora pa nkhani ya masuzgo agho tikukumana nagho

Wakabatizika mu 2008

Ivyo Wakayowoya

Kasi mwasambirapo vichi pa masuzgo ghose agho mwasangana nagho?

Nkhazizwanga chomene para naŵerenga nkhani za ŵabali na ŵadumbu awo ŵakaŵanga pa mtende para ŵasangana na masuzgo. Ndipo nkhajifumbanga kuti, ‘Kasi ivi vingachitika wuli?’ Kweni nkhazizwa kuti nkhaŵa na mtende ŵapolisi wakati ŵasecha nyumba yane, kunifumba mafumbo kweniso nati naluta ku khoti kukazgora mulandu. Ivi vikulongora kuti Yehova wakanovwiranga kweniso kuti ntchamachitiko munthu kuŵa wakukondwa panyengo ya masuzgo. Nkhuwonga chomene Yehova chifukwa cha wovwiri wake ndipo nkhuwona kuti ni mwaŵi ukuru kumuteŵetera.

Vitaliy Ushakov

Chaka chakubabikira: 1980 (Khatukay, mu chigaŵa cha Adygeya)

Mbiri yake: Wakaŵa makanika. Wakasambira unenesko kufuma kwa amama ŵake. Wakakondwa chomene na layizgo la mu Baibolo lakuti umoyo uzamuŵa makora chomene kunthazi. Wakabatizika mu 1995

Wakatorana na Irina mu 2006 ndipo ŵali na ŵana ŵaŵiri ŵanyamata

Ivyo Wakayowoya

Kasi ntchivichi chikamovwirani apo mukaŵa ku jele lakulindilirako mulandu?

Mu mwezi wakwamba uwo nkhaŵa mu jele lakulindilirako mulandu nkhaŵavya Baibolo. Ntheura nkhalemba Malemba agho nkhaghakumbukanga mu buku lane, na ivyo nkhamanyanga vyakukhwaskana na lemba ilo. Ivi vikanovwira chomene pa nyengo iyo nkhajalirika mu jele lanekha chifukwa vikanovwira kuti nilutilire kuwona vinthu mwakwenelera. Sono nkhujipulika kuti nili pafupi chomene na Yehova ndipo naŵikapo mtima kulondezga fundo zake.

Valeriy Vechkayev

Chaka chakubabikira: 1973 (Vyselki, mu chigaŵa cha Krasnodar)

Mbiri yake: Wakugwira ntchito yakumalizgiska vinthu vinyake mukati mwa nyumba izo zazengeka waka. Wakakondwa kumanya fundo zapachanya za mu Baibolo kweniso kuwona umo Ŵakaboni ŵa Yehova ŵakulondezgera fundo izi. Wakabatizika mu 1999

Wakatorana na Irina mu 1996. Ŵali na ŵana ŵanyamata ŵaŵiri na msungwana yumoza

Ivyo Wakayowoya

Kasi Yehova wakumovwirani wuli kulimbana na viyezgo ivi?

Yehova wakovwira munthowa zinandi. Ŵabali na ŵadumbu ŵakunilombera nyengo zose kweniso ŵakunovwira. Kweniso pakuti vinandi ivyo Baibolo likuyowoya vikuchitika, Yehova wakutovwira kumanya kuti pasono charu chiphya chili pafupi. Ivi vyanovwira kuti niwonenge masuzgo agho nkhukumana nagho sono nga ni mabingu. Ghakwiza mu kawonekero na ukuru wakupambanapambana kweni ghakuchedwa yayi kuzgeŵelekera. Nkhuwonga chomene Yehova kuti pasono wakunipa nkhongono zakuzizipizgira.

Tili na chigomezgo chose kuti Yehova walutilirenge kupeleka chimwemwe na nkhongono ku ŵabali aŵa kweniso na wose awo ŵakulutilira kulaŵiska kwa iyo kuti waŵawovwire.—Salimo 141:8.

Nyengo

February 11, 2022

Mubali Yevgeniy, Aleksey, Vitaliy, na Valeriy ŵakaŵajulira mulandu
February 13, 2022

Ŵakasecha nyumba zawo. Mubali Yevgeniy, Aleksey, na Vitaliy ŵakafumbika mafumbo. Vitaliy ŵakamuŵika mu jele la kulindilirako mulandu
February 15, 2022

Vitaliy ŵakamujalira mu jele la kulindilirako mulandu
February 16, 2022

Yevgeniy na Aleksey ŵakakanizgika kwenda kuluta ku vigaŵa vinyake
February 18, 2022

Valeriy wakakanizgika kuluta ku vigaŵa vinyake
February 21, 2022

Mubali Vladimir ŵakamujulira mulandu
March 15, 2022

Vladimir wakakanizgika kuluta ku vigaŵa vinyake. Mulandu wake ŵakawusazga kuŵa umoza
September 8, 2022

Vitaliy ŵakafumiskika mu jele lakulindilirako mulandu, ndipo ŵakamuŵika mu jele la panyumba
October 10, 2022

Vitaliy ŵakamufumiska pa jele la panyumba kweni ŵakamukanizga kuluta ku vigaŵa vinyake
May 31, 2023

Khoti likamba kutegherezga mulandu wawo

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI