OCTOBER 17, 2022
RUSSIA

Ŵakaboni 13 Ŵakupika Mulandu ku Magadan

JULANI

Khoti la Magadan ilo lili ku Chigaŵa cha Magadan lipelekenge chigamuro chake sonosono apa pa mulandu wa ŵabali na ŵadumbu aŵa: Sergey Agadzhanov, Lyubov Asatryan, Galina Dergacheva, Inna Kardakova, Irina Khvostova, Galina Pechko, Konstantin Petrov, Ivan Puyda, Viktor Revyakin, Mikhail Solntsev, Oksana Solntseva, Sergey Yerkin, na Yevgeniy Zyablov. Wakwimira boma pa milandu wachali wandapemphe chilango icho ŵangapika.

Nyengo

May 30, 2018

Ŵamazaza ŵakajulira mulandu Ivan, Konstantin, Sergey Yerkin, na Yevgeniy wakuti ŵakachitanga milimo ya gulu ilo likuchita vinthu vyakofya
June 1, 2018

Ŵabali wose ŵanayi ŵakaŵatuma ku jele la kusungirako ŵanthu awo mulandu wawo underuzgike
August 3, 2018

Konstantin wakafumiskika ku jele la kusungirako ŵanthu na kutumika pa jele la panyumba
October 5, 2018

Ivan, Sergey Yerkin, na Yevgeniy ŵakafumiskika mu jele na kutumika pa jele la panyumba
March 20, 2019

Ŵamazaza ŵakajulira mulandu Sergey Agadzhanov, Galina Dergacheva, Inna, Irina, Lyubov, Mikhail, Oksana, na Viktor. Wose ŵakakanizgika kufuma mu chigaŵa icho ŵakakhalanga
March 27, 2019

Ivan, Konstantin, Sergey Yerkin, na Yevgeniy ŵakafumiskika pa jele la panyumba ndipo ŵakakanizgika kwenda kufuma mu chigaŵa icho ŵakakhalanga
April 1, 2019

Khoti likasazga pamoza milandu yose
March 2, 2021

Galina Pechko ŵakamukanizga kufuma mu chigaŵa icho wakakhalanga
March 5, 2021

Galina Pechko ŵakamupa mulandu wakuti wakachitangako milimo ya gulu ilo likuchita vinthu vyakofya ndipo mulandu wake ŵakawusazga pamoza na milandu ya ŵabali na ŵadumbu 12
April 25, 2022

Khoti likamba kutegherezga mulandu

Vyakukhwaskana na ŵanthu aŵa

Lyubov Asatryan

Chaka cha kubabikira: 1951 (Ganja, Azerbaijan)

Mbiri yake: Ndiyo nkhwangu pa ŵana 6. Wakagwiranga ntchito ku labu pa famase yinyake

Nyengo zose wakakwenyeleranga na vyachiwawa ivyo wakawonanga. Kweni wakakondwa chomene wati wasambira mu Baibolo kuti Chiuta wazamumazga uheni wose. Wakabatizika mu 1991

Ivyo Wakayowoya

Ntchivichi chikumovwirani kuti mtima winu uŵe m’malo?

Nkhuŵikapo mtima kuti wofi uleke kunijandizga, chifukwa usange ningachita wofi mbwe ningamba kukayika. Nkhumanya kuti nkhwenera kuchita vinthu mwamahara: kulomba nyengo zose, kumuphalira Yehova umo nkhujipulikira nadi, kumugomezga chomene, kweniso kukumbuka kuti wali na nkhongono zakuluska. Usange nalutilira kuchita vinthu ivi, mbwenu nkhugomezga kuti Adada ŵane ŵa kuchanya ŵakondwenge.—Zintharika 27:11.

Inna Kardakova

Chaka cha kubabikira: 1980 (Blagoveshchensk, Chigaŵa cha Amur)

Mbiri yake: Wakugwira ntchito yakupwelelera mabuku

Ŵapapi ŵake ŵakamba kusambira Baibolo na Ŵakaboni ŵa Yehova apo wakaŵa na vyaka 15. Wakabatizika mu 1997

Ivyo Wakayowoya

Kasi kulondezga ulongozgi wa gulu kwamovwirani wuli?

Kakwamba apo nkhapulikanga kuti mu charu chithu muli nthambuzgo, ine vikanikhwaskanga viŵi yayi. Kweni pamanyuma nkhapulika malipoti ghanandi ghakulongosora uwemi wa kuŵazga nkhani mu mabuku ghithu izo zikulongosora ivyo tingachita kuti tinozgekere nthambuzgo. Ndiposo tapokeranga ulongozgi wakovwira wa umo tingachitira pa nkhani ya kunozgekera. Nkhukondwa chomene chifukwa nkhalondezganga masachizgo agha. Pakuti nkhaŵa wakunozgeka mu maghanoghano, mtima ukaŵa m’malo apo ŵakasechanga nyumba yane na kwamba kunifumba mafumbo.

Irina Khvostova

Chaka cha kubabikira: 1992 (Stakhanov)

Mbiri yake: Wakugwira ntchito ya uinjiniya

Wakatengwa mu 2013

Nyengo zose wazizwanga chifukwa icho Chiuta wali kulengera ŵanthu. Wakasanga zgoro chifukwa cha kusambira Baibolo. Wakabatizika mu 2016

Ivyo Wakayowoya

Ni vinthu wuli ivyo mukawona kuti Yehova wakamovwirani chomene?

Nkhalombanga pafupipafupi kwa Yehova kuti wanovwire kuchita vinthu mwakujikora mwakuti vyakuchita vya awo ŵakutiyowoyera mautesi, ŵakutichitira msinjiro, na awo ŵakubinkhiska zina la Ŵakaboni ŵa Yehova vileke kunikhuŵazga. Yehova wakanovwira nadi kuti mtima wane uŵe m’malo, kweni chikuru kuluska apa, wakanipa chimwemwe chikuru. Ivi vikanovwira kukumbuka kuti Yehova wali na mazaza ghakuchitira chilichose. Vilije kanthu kuti ŵakususka ŵayowoye misinjiro ya mtundu wuli ku zina lake, kweni paumaliro zina la Chiuta lizamutuŵiskika.

Viktor Revyakin

Chaka cha kubabikira: 1957 (Novosibirsk, Chigaŵa cha Novosibirsk)

Mbiri yake: Wakugwira ntchito ya usambizgi

Wakamba kuchezga na Ŵakaboni ŵa Yehova wati wazomera kupokera kapepara kakuchemera ŵanthu ku Chikumbusko cha nyifwa ya Khristu. Wakabatizika mu 2002

Wakatorana na Nataliya mu 2013

Ivyo Wakayowoya

Ntchivichi chikumovwirani kuti mulutilire kuwona vinthu mwakwenelera pa nyengo yakusuzga iyi?

Nkhuyezga kuŵa wakutangwanika chomene na milimo ya Fumu, kuchezga na ŵabali na ŵadumbu ŵane, kweniso kughanaghanira viyelezgero viwemi vya ŵateŵeti ŵakugomezgeka awo ŵali mu Baibolo. Kweniso nkhuŵa wakunozgeka kuti pa nyengo ya suzgo nga ni iyi vinovwire kuti niyengeke na kuŵa na makhaliro ghawemi gha Chikhristu. Sono kuŵa paubwezi na Yehova ntchakuzirwa chomene kwa ine, ndipo ubwezi wane na iyo wakhoraso chomene.

Mikhail Solntsev

Chaka cha kubabikira: 1962 (Novosibirsk, Chigaŵa cha Novosibirsk)

Mbiri yake: Wakugwira ntchito ya kulaŵilira umo ndege yingenderanga makora

Wakatorana na Oksana mu 1988

Wakamba kusambira Baibolo ndipo wakakhorwa wati wawona umo likulongosolera vinthu mu ndondomeko yiwemi. Wakabatizika mu 2013

Ivyo Wakayowoya

Kasi ni mazgu wuli ghakukhozga agho ghamovwirani?

Nkhukumbuka fundo iyo mubali wakaniphalira ine na muwoli wane. Wakatifumba usange tili na wofi. Tikamuphalira kuti Yehova wakutovwira kuti mitima yithu yiŵenge m’malo. Ntheura wakatikumbuska kuti Satana na ŵateŵeti ŵake chilato chawo nkhupanda wofi mu mitima yithu. Kweni usange tichitenge wofi yayi para tikutambuzgika, mbwenu ndikuti paumaliro tizamutonda nadi. Nkhutemwa mazgu gha pa Yesaya 44:8: “Mungachitanga wofi chara, mungatenthemanga yayi. . . . Imwe ndimwe ŵakaboni ŵane.”

Sergey Yerkin

Chaka cha kubabikira: 1953 (Vladivostok, Chigaŵa cha Primorye)

Mbiri yake: Wakaŵa injiniya pa mugodi wa kampani yinyake ndipo pasono wali kupumura ntchito

Wakasangana na Ŵakaboni ŵa Yehova kakwamba mu 1998. Pamanyuma wakasambira Baibolo ndipo wakabatizika mu 2007

Ivyo Wakayowoya

Kasi mukachita wuli kuti mulutilire kuŵa ŵakukondwa pa nyengo iyo ŵakamusunganinge dankha mu jele?

Nkhakondwanga chomene para namba kughanaghanira vya mbumba yane yauzimu. Nkhaghanaghanira nyengo iyo nkhaŵira lumoza na ŵabali ŵane mwauzimu apo tikachezganga nkhani ziwemi zakukhwaskana na ivyo nawo ŵasanganapo navyo. Pamanyuma nkhalombanga kwa Yehova, kumuphalira mwakudunjika vya mubali panji mudumbu uyo. Pa chifukwa ichi, chisko chane chikaŵanga cha chimwemwe ndipo nkhakondwanga chomene.

Tikukhozgeka chomene kuwona ŵabali na ŵadumbu ŵithu ŵakulutilira kuŵa ŵakukondwa nangauli ‘ŵakutombozgeka chifukwa cha zina la Khristu chifukwa mzimu wa Chiuta ukukhala pa iwo.’—1 Petrosi 4:14.

a Palije ivyo wakayowoyapo Mubali Sergey Agadzhanov.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI