Mamembara ghaŵiri gha mphara ya malango ya ku United States, iyo ntchigaŵa cha boma la charu ichi, ghalembera chikalata cha vyamalango, boma la Russia. Mu chikalata icho mamembara agha ghalemba, ghakususka boma la Russia chifukwa cha kujalira mubali Dennis Christensen mu jele pa vifukwa vyambura kupulikikwa. Ichi ntchikalata icho chalembeka mwasonosono chakususka boma la Russia pa nkhani yakutambuzga ŵabali na ŵadumbu ŵithu chifukwa cha ivyo ŵakugomezga.

Mubali Christensen, ŵakamukaka na kumujalira mu jele mu May 2017, chifukwa chakuti waka wakachitangako maungano Ghakhristu gha Ŵakaboni ŵa Yehova. Eliot L. Engel na Michael T. McCaul ŵakalemba chikalata pa May 8, 2020, kupempha boma la Russia kuti lifumiske mwaluŵiro Mubali Christensen, mu jele.

Chikalata ichi chikuti: “Pa February 6, 2019, Dennis Christensen, uyo njumoza wa Ŵakaboni ŵa Yehova ndipo ni mwenekaya wa ku Danmark, wakeruzgika kuti wakagwire jele vyaka 6. Wupu wa United States Commission on International Religious Freedom ukususka ivyo khoti likadumura apa,” ndipo ukuwona kuti uwu “mbukaboni wakuti boma la Russia likuyuzga panji kulekelera ŵanthu ŵanyake kuti ŵaswenge wanangwa wa ŵanyawo wa kusopa.”

Kufika pa May 25, 2020, Mubali Christensen waŵenge kuti wakhala vyaka vitatu mu jele. Mubali uyu njumoza mwa ŵabali na ŵadumbu ŵithu 32 awo ŵali kujalirika mu jele ku Russia, 9 ŵali kuŵasanga na mulandu, ndipo 23 ŵakuŵasunga ku jele kulindilira kuti ŵeruzgike. Ŵakaboni ŵanyake 18 ŵali pa jele la pa nyumba. Kwamba mu 2017, boma la Russia lasecha nyumba za ŵakaboni wa Yehova mwakuchichizga pafupifupi maulendo 900. Ivi vyapangiska kuti boma ili liti Ŵakaboni ŵa Yehova 331 ŵali na mulandu.

Ŵalaraŵalara ŵa boma ku United States na Europe, ŵalisuska chomene boma la Russia chifukwa cha kutambuzga Ŵakaboni ŵa Yehova.

Tikumanya yayi ivyo vichitikenge chifukwa cha chikalata ichi, kweni icho tikumanya ntchakuti Yehova walutilirenge kovwira ŵabali na ŵadumbu ŵithu kuzizipizga na chimwemwe. Tikulindilira nyengo iyo Yehova wazamumarana na ŵanthu wose awo ‘ŵakwata suzgo mu zina la dango.’—Salimo 94:20-23.