Malipoti ghakulongora kuti pa July 13, 2020, ŵalaraŵalara ŵaboma ku Russia awo ŵakayegha futi, ŵakasecha nyumba za ŵabali ŵithu 110 ku chigaŵa cha Voronezh. Aka nkhakwamba kuti ŵaseche nyumba zinandi nthena za ŵabali ŵithu pa zuŵa limoza kufuma mu 2017. Ŵabali ŵithu ŵaŵiri Aleksandr Bokov na Dmitrii Katyrov, ŵakaŵatimba na kuŵachitira nkhaza chifukwa chakuti ŵakakana kupeleka pasiwedi ya foni zawo.

Khoti la Leninsky ilo lili ku chigaŵa cha Voronezh ndilo likaŵazomerezga kuti ŵakaseche mu nyumba za ŵabali ŵithu. Ŵalaraŵalara ŵa boma aŵa ŵakasecha mu misumba pafupifupi 7, kweniso mu matawuni na mu mizi ya mu chigaŵa ichi. Ŵabali ŵithu ŵanandi ŵakaŵatora na kuluta nawo ku ofesi kwawo kuti ŵakaŵafumbe mafumbo.

Machero ghake pa July 14, 2020, Khoti la Leninsky likati ŵabali ŵithu 10, ŵaŵasunge mu jele mpaka pa September 3, 2020, apo ŵakulindilira kuti milandu yawo yizakeruzgike. Ŵabali aŵa ni Aleksei Antiukhin wa vyaka 44, Sergey Bayev wa vyaka 47, Iurii Galka wa vyaka 44, Valeriy Gurskiy wa vyaka 56, Vitalii Nerush wa vyaka 41, Stepan Pankratov wa vyaka 24, Igor Popov wa vyaka 54, Evgenii Sokolov wa vyaka 44, Mikhail Veselov wa vyaka 51, na Anatoliy Yagupov wa vyaka 51.

Nangauli lipoti ilo tikapokera likati nyumba 110, ndizo zasecheka kweni pasono tasimikizga kufuma ku mabanja gha Ŵakaboni ŵa Yehova 100 awo ŵakuti nyumba zawo na katundu wawo munyake wakasecheka. Ndipouli chiŵelengero ichi chingakwera. Pasono ntchakusuzga kulumikizana na ŵabali wose awo nyumba zawo zikasecheka chifukwa chakuti ŵali kuŵapoka mafoni na makompyuta ghawo.

Malipoti ghakulongora kuti kumanyuma uku pa February 10, 2020, napo nyumba zinandi za ŵabali ŵithu zikasecheka. Ŵalaraŵalara ŵa boma ŵakasecha nyumba za Ŵakaboni 50 ku chigaŵa cha Transbaikal. Kufuma apo Khoti Likuru likapelekera cheruzgo chake mu 2017, nyumba za ŵabali ŵithu zakujumpha 1,000 zasecheka.

Chifukwa cha uchimi uwo uli mu Baibolo, tikuzizwa yayi kuti ŵabali ŵithu ku Russia na mu vyaru vinyake ŵakusangana na viyezgo vyakofya. Tikulutilira kulombera ŵabali ŵithu chifukwa tikumanya kuti Yehova waŵapenge mzimu utuŵa kuti ŵalutilire kugomezgeka.—1 Petrosi 4:12-14, 19.