Ŵamazaza ŵa ku Europe na ku United States ŵakulutilira kususka ivyo boma la Russia likuchita pa kutambuzga Ŵakaboni ŵa Yehova.

Mu kalata iyo ŵakayifumiska pa October 27, 2020, Gayle Manchin uyo ni mulara wa wupu wa USCIRF, wakati: “Wupu wa USCIRF uli na chitima chomene chifukwa cha ivyo boma la likuchita pa kutambuzga Dennis Christensen. Vikuwonekerathu kuti boma ili likumutinkha waka mwanalume uyu, ndipo likumupa mulandu chifukwa waka chakuti wakachitanga vinthu vyakukhwaskana na kusopa mwamtende. M’malo mwakuti boma limulongore lusungu, likumuchitira nkhaza nga kuti wali kupalamura mulandu wakofya chomene. Ivyo boma la Russia likuchita, mburunji yayi.”

A Manchin ŵakulutilira kukhozgera fundo yakuti Mubali Christensen walije mulandu kwizira mu wupu wa USCIRF uwo ukuwonaso vya ŵanthu awo ŵajalirika mu jele chifukwa cha njuŵi yawo. Wupu uwu wasuskapo kanandi waka chigamuro icho makhoti ghakapeleka kuti Mubali Christensen wakagwire jele vyaka 6.

Mu kalata iyo wupu wa USCIRF ukalemba, ukatiso ukukolerana yayi na ivyo boma la Russia likachita pakukana kuti Mubali Christensen wafumiskike luŵiro mu jele. Wupu uwu ukati “Christensen wakapika mwaŵi wakuti wangafuma luŵiro mu jele pa June 23, [2020,] kweni loya wakwimira boma pa milandu wakaluta ku khoti kukakana kuti ivi vileke kuchitika. M’malo mwa kumufumiska, ŵakamupusikizgira kuti waswa malango ghanyake gha jele ndipo ŵakamuŵika mu selo iyo mukunjira mphepo zakukwana yayi.”

Wupu wa USCIRF ukamalizga kalata yake na fundo iyo yikaŵa mu Lipoti lake Lapachaka la 2020. Lipoti ili likasuska ivyo boma la Russia likuchita “pakuchitira nkhaza Ŵakaboni, na kuswa wanangwa wawo wakusopa.” Lipoti ili likati boma la United States lipeleke chilango ku boma la Russia na kuliŵika mu gulu la vyaru ivyo “vikuswa malango gha wanangwa wakusopa.”

Ŵalaraŵalara 8 awo ŵali na maudindo ghakurughakuru mu wupu wa United Nations Human Rights Council, nawo ŵakalembera kalata wupu wa Permanent Mission of the Russian Federation, pa ivyo boma la Russia likuchita “pakulutilira kutambuzga Ŵakaboni ŵa Yehova, kupoka ofesi yawo yikuru mu msumba wa St. Petersburg, na kukanizga mawupu ghawo ghakukwana 395 agho ghakaŵa mu charu ichi.” Ŵamazaza aŵa, ŵakususkaso boma la Russia chifukwa cha kuzerezga ivyo ŵanthu na mawupu ghakupambanapambana pa charu chose chapasi ghakuyowoya, kuti lileke kutambuzga Ŵakaboni ŵa Yehova.

Ŵalaraŵalara ŵa UN aŵa ŵakayowoyaso kuti boma la Russia likubisamirako waka ku malango ghakukhwaskana na kuchita vinthu mwakutalulira na chilato chakuti “ŵakanizge Ŵakaboni ŵa Yehova kuchita vinthu vyakukhwaskana na kusopa, kuŵapangiska kukhala mwawofi, ŵanjilirengepo pa nkhani zawo zachisisi na kusecha mu nyumba zawo, kuŵakaka na kuluta nawo ku polisi kukaŵafumba mafumbo, kuŵapusikizgira milandu, ndiposo ŵanyake kuŵajalira mu jele.”

Ŵalaraŵalara aŵa ŵakayowoyaso kuti: “Dango 18 (1) la malango gha ICCPR *, likupeleka wanangwa wakuchita vinthu vyakukhwaskana na kusopa ku Ŵakaboni ŵa Yehova.” Ntheura iwo ŵakupempha charu cha Russia kuti “chiwoneseske kuti Malango gha Charu cha Russia Ghakukhwaskana na Kuchita Vinthu Mwakutalulira gha mu 2002, ghaleke kuswa wanangwa wa ŵanthu nga ni wanangwa wakuyowoya, wanangwa wakupulikira njuŵi yako, na wanangwa wakusopa panji kugomezga vinthu vinyake.”

Kalata iyi yikuvumburaso nkhaza zinyake izo ŵabali ŵithu ŵakukumana nazo. Mwachiyelezgero, yikulongosora umo Ŵakaboni ŵa Yehova 5 ŵa ku Saratov ŵakatimbikira mwankhaza pa February 6, 2020. Kalata iyi yikuyowoya kuti: “Ŵakaboni ŵa Yehova ŵakuŵikika mu malo ghaheni chomene para ŵali mu jele, ŵakuŵachitira nkhaza ndipo ŵanyake ŵakusuzgika chomene maghanoghano, chifukwa waka cha ivyo ŵakugomezga.”

Kalata iyi yikuyowoyaso umo boma la Russia likatambuzgira Mubali Vadim Kutsenko pa February 10, 2020. Kweni boma la Russia likukana kuti likamuchitira nkhaza Mubali Kutsenko. Ŵalaraŵalara ŵa wupu wa UN ŵakati mbachitima chomene na umo “boma la Russia likuŵikirapo mtima kutambuzga Ŵakaboni ŵa Yehova chifukwa waka cha milimo yawo ya kusopa mwamtende.”

Boma la Russia likati lakanizga waka mulimo withu mu 2017, wupu wa Council of Europe’s Committee of Ministers *, ukaŵa maso chomene kuti uwone umo boma la Russia lichitirenge na ivyo Khoti Lakuvikilira Wanangwa wa Ŵanthu mu Europe likadumura pa nkhani yakuti boma la Russia laswa wanangwa wa Ŵakaboni ŵa Yehova. * Ntheura pa October 1 2020, wupu uwu ukalemba maghanoghano ghake, ndipo ukati “ukufipa mtima chomene na ivyo vikuchitikira Ŵakaboni ŵa Yehova kufuma waka apo boma likakanizgira mulimo wawo mu 2017 . . . ndipo ivi vyapangiska kuti ŵalutilire kukakika, kutambuzgika, na kujalirika mu jele chifukwa cha kuchita mwamtende ivyo ŵakugomezga.”

Kuti vyanthena ivi vileke kulutilira waka, wupu uwu ukukhumba kuti boma la Russia liwoneso makora malango ghake chomene agho “ghakukhwaskana na kuchita vinthu mwakutalulira, chifukwa ndigho ghakupangiska kuti Ŵakaboni ŵa Yehova ŵalutilire kutambuzgika kweniso kuti mulimo wawo ukanizgike mu charu ichi.” Chinyake ntchakuti, boma la Russia likwenera “kuzomerezga kuti Ŵakaboni ŵa Yehova ŵambireso kusopa mwakufwatuka kweniso limazge milandu ya Ŵakaboni awo ŵakapika milandu chifukwa waka cha kuchita mwamtende ivyo ŵakugomezga.” Mu 2021, wupu uwu uzamuwona usange boma la Russia lachitapo kanthu pa nkhani iyi panji yayi.

Kufuma waka mu 2017, ŵabali na ŵadumbu ŵithu ŵakujumpha 400 ku Russia na Crimea, ŵali kuŵapusikizgirapo kuti ŵakuchita vinthu mwakutalulira. Ŵakaboni ŵa Yehova ŵakujumpha 210 ŵali kujalirikapo mu jele mu misumba yakujumpha 70 mu charu ichi.

Tilutilirenge ‘kuchema pa zina la Yehova Chiuta withu’ kuti waŵawovwirenge ŵabali na ŵadumbu ŵithu ku Russia kuti ŵalutilire kuzizipizga.—Salimo 20:2, 7.