FEBRUARY 9, 2024
RUSSIA

Ŵali na Chikanga Ndipo Ŵakugomezga Yehova pa Nyengo ya Masuzgo

JULANI

Khoti la Blagoveshchensk mu chigaŵa cha Amur sonosono apa lipelekenge chigamuro chake pa mulandu wakukhwaskana na ŵadumbu aŵa: Kristina Golik, Yekaterina Olshevskaya, Mariya Myasnikova na Valentina Yermilova. Wakwimira boma pa milandu wachali wandapemphe chilango icho ŵadumbu aŵa ŵangapika.

Vyakukhwaskana na ŵanthu aŵa

Kristina Golik

Chaka chakubabikira: 1992 (Ukraine)

Mbiri yake: Wakasambira vya kujambura vithuzi kweniso kupanga mawebusayiti

Ngwa muwiro wa nambara 5 wa Ŵakaboni ŵa Yehova. Wakabatizika mu 2006

Wakatorana na Dmitriy mu 2012. Ŵakamusanga na mulandu mu June 2021 ndipo wakugwira chilango ku jele cha vyaka 6 na myezi yiŵiri

Ivyo Wakayowoya

Kasi lilipo lemba mu Baibolo ilo likumovwirani kuti mulutilire kuŵa wakukondwa?

Apo Dmitriy na ine ŵakatilekaniska kakwamba, nkhamanyanga yayi kuti ningachita vichi na vinthu vyambura urunji ivi. Nkhamusoŵa chomene chifukwa ndiyo wakanovwiranga na kunipembuzga para nasanga na masuzgo. Nkhalomba Yehova kuti wanovwire. Apo nkhaŵerenganga Baibolo, nkhawona lemba la Salimo 17. Nkhakhwaskika chomene na vesi 15 ilo likuti “Kweni ine, niwonenge chisko chinu mu urunji. Nkhukhorwa kuwuka pamaso pinu.” Sono para nkhuwuka zuŵa lililose mulenji, nkhujikumbuska kuti Yehova Chiuta withu wakumanya makora umo wanganisanguluskira na kunikhozga kuluska munthu munyake waliyose. Nangauli nkhukumana na masuzgo, kweni nyengo zose nkhuŵa na chifukwa chakuŵira wakukondwa.

Yekaterina Olshevskaya

Chaka chakubabikira: 1984 (Blagoveshchensk)

Mbiri yake: Wakatorana na Anton mu 2010. Ŵali na mwana msepuka wa vyaka 4

Anton na adada ŵa Yekaterina, Sergey Afanasiyev, ŵakaŵasanga na mulandu mu December 2022 ndipo ŵali kupika chilango cha kugwira jele kwa vyaka vyakujumpha 6

Ivyo Wakayowoya

Kasi ubwezi winu na Yehova wakhora wuli mu nyengo yose ya viyezgo iyi?

Kwa vyaka 5 ivyo vyajumpha, nkhavuka chomene kwendendeka kukategherezga milandu ya adada, mfumu wane, ndipo sono chawira ine. Pasono nyengo yiliyose ningatumizgika ku jele ndipo mwana wane wa vyaka 4 wazamulekeka payekha kwambura ŵapapi ŵake. Nangauli vili nthena, nkhujipulika nga umo munthu murunji Yobu wakajipulikiranga pa lemba la Yobu 42:5 apo wakati: “Makutu ghane ghakapulikanga waka vya imwe, kweni sono namuwonani na maso ghane.” Nangauli nkhukumana na masuzgo agha kweniso mfumu wane uyo wanganovwira palije, nkhuwona kuti Yehova wali nane pafupi chomene kuluska kumanyuma kose. Mfumu wane Anton kumanyuma uku wakayowoyapo kuti: “Nanga ni para nazajalirika mu jele na kutondeka kukovwira, uzamujiwonera wekha umo Yehova waliri mutu wambumba muwemi. Wazamukukupwelelera.” Ndipo Yehova wakunipwelelera nadi. Iyo wakutilengera waka lusungu yayi kweni wakuchitapo kanthu. Nyengo zose iyo wakunovwira para nkhusuzgika nanga ni para nindamupemphe.

Mariya Myasnikova

Chaka chakubabikira: 1994 (Chernigovka mu chigaŵa cha Amur)

Mbiri yake: Wakaŵa bwana mulara pa ofesi

Wakasambira Baibolo na amama ŵake. Wakakondwanga chomene na kufiskika kwa ma uchimi gha mu Baibolo kweniso chigomezgo chakuti kuzamuŵa umoyo wamuyirayira. Wakabatizika mu 2006

Wakatorana na Nikolay mu 2021

Ivyo Wakayowoya

Kasi ntchivichi chikumovwirani kuti mughanaghanenge mwakwenelera nangauli mukukumana na masuzgo ghanandi?

Nangauli munthu wakukondwa yayi na masuzgo, kweni ku chigaŵa chinyake ghakunovwira kuti niŵe na mikhaliro yiwemi Yachikhristu. Golide wakwengeka para wajumpha pamoto wakotcha chomene. Masuzgo agho nkhukumana nagho sono ghakunovwira kuti niŵe na mikhaliro yiwemi iyo Yehova wakukondwa nayo kweniso iyo yingazakanovwira munthazi. Nkhukumbukira ivyo vili pa lemba la 1 Yohane 2:17 ilo likuti: “Charu na makhumbiro ghake vikuluta, kweni uyo wakuchita khumbo la Chiuta wakukhalilira muyirayira.” Vyose ivyo vikuchitika sono ni vyakanyengo kachoko waka. Kumanya fundo iyi kukunipa nkhongono kuti nilutilire kuteŵetera Yehova.

Valentina Yermilova

Chaka chakubabikira:1970 (Shimanovsk, Chigaŵa cha Amur)

Mbiri yake: Wakagwiranga ntchito ku laboratory

Wakatorana na Sergey mu 1995. Wali na mwana munyamata yumoza

Wakakondwa chomene kumanya layizgo lakuti Yehova wazamuwuska ŵanthu awo ŵali kufwa. Wakabatizika mu 2009

Sergey wakajalirika mu December 2022 ndipo wakugwira chilango ku jele cha vyaka 6 na myezi yitatu

Ivyo Wakayowoya

Kasi mwasambirapo vichi panyengo zakusuzga izo mwajumphamo?

Nasambira uwemi wakuleka kudodoliska chomene pa masuzgo agho nkhukumana nagho. M’malo mwake nkhujikumbuska kuti chakuzirwa chomene nkhupeleka uchindami kwa Yehova. Ŵanthu ŵanandi ŵakuwona kuti ntchakuzirwa chomene kufwira charu chawo. Ntheura nane nkhujipulika makora chomene kuvikilira zina la Yehova. Nkhukhumba kumupa viwemi chomene Yehova na kumupa uchindami. Ndipo nkhumanya kuti Yehova wanilekengepo yayi napachoko.

Tikuwonga chomene ŵadumbu aŵa chifukwa ŵalongora kuti ŵakugomezga chomene Yehova. Ndipo tikumanya kuti Yehova walutilirenge kuŵapwelelera na kuŵatumbika.—Salimo 27:3.

Nyengo

July 20, 2018

Ŵakasecha nyumba zawo
July 22, 2021

Ŵadumbu wose 4 ŵakasangika na mulandu
July 27, 2021

Kristina na Mariya ŵakakanizgika kuluta ku vigaŵa vinyake
August 3, 2021

Yakaterina wakakanizgika kuluta ku vigaŵa vinyake
August 4, 2021

Valentina wakakanizgika kuluta ku vigaŵa vinyake
May 26, 2023

Khoti likamba kutegherezga mulandu wawo

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI