Charu cha United States pamoza na vyaru vinyake 30 vya ku Europe, vyasuska chomene ivyo ŵamazaza ŵa boma la Russia ŵakuchita pa kutambuzga Ŵakaboni ŵa Yehova. Ŵakayowoya ivi pa ungano uwo wupu wakuchemeka Organization for Security and Co-operation in Europe (OSCE) Permanent Council * ukachitiska pa July 23, 2020.

Pakuyowoyapo pa ungano uwu, Lane Darnell Bahl, uyo wakovwira pa kupeleka ulongozgi mu wupu wa OSCE ku U.S., wakati: “Nga umo charu cha United States na vyaru vinyake vinandi vyayowoyera kale, tilutilirenge kususka ivyo boma la Russia likuchita. Mwachiyelezgero, vinthu nga malipoti agho tikupokera ghakukhwaskana na ivyo ŵamazaza ŵakuchita pakusecha mwakuchichizga nyumba za Ŵakaboni ŵa Yehova, kuŵakaka na kuŵasunga mu jele kwambura chifukwa, kuŵajalira mu jele m’paka vyaka 6, kweniso kuŵachitira nkhaza zakupambanapambana.”

Ŵamazaza aŵa ŵakakhwaskika chomene na malipoti ghasonosono apa ghakuti ŵamazaza ŵa boma la Russia ku Chigaŵa cha Voronezh ŵakasecha nyumba za Ŵakaboni ŵa Yehova zakujumpha 100. Bahl wakati: “Tikuzizwa chomene kuti boma ili likuchitira nkhaza zakofya nthena gulu la chisopa ilo likuchita vinthu mwamtende.”

Wachiŵiri kwa mwimiliri wa ku United Kingdom (UK), Nicola Murray, nayo wakati wakufipa mtima chomene chifukwa cha “kukwera kwa chiŵelengero cha nyumba izo zikusecheka, kweniso nthowa iyo ŵakusechera nyumba izi, ivyo vikulongora kuti ŵakuchita kukolerana kuti ŵatambuzgenge Ŵakaboni ŵa Yehova.” Murray wakalutizga kuti: “Ŵakaboni ŵanyake ŵakuŵapa milandu chifukwa chakuti ŵakachitako waka vinthu vyakukhwaskana na kusopa.”

Bahl wakasuskaso ivyo ŵamazaza ŵa ku Voronezh ŵakayowoya pakukhwaskana na Ŵakaboni awo ŵakaŵakaka kuti ŵakaŵa na mulandu wakuti ŵakukhumba “kuchita vinthu vyakofya.” Ŵamazaza aŵa ŵakati Ŵakaboni ŵa Yehova ŵakasunganga malipoti na vinthu vinyake mu ma kompyuta na nthowa zinyake, kwambiska tumagulu, na kugwiliskira ntchito mapulogiramu ghanyake gha pa kompyuta kuti ŵachite maungano. Bahl wakati vifukwa vyose ivyo ŵamazaza ŵa ku Russia ŵakapeleka ivi “ni vyambura kupulikikwa kweniso ni vyakulengeska.” Wakatiso: “Nane nkhugwiliskira ntchito nthowa zenezizi kuti nisunge vinthu vyane kweniso kuti nichite vinthu vinyake.” Iyo wakatiso mbwenu awo ŵakimiranga boma la Russia pa ungano uwu ndipo ŵakachita kujoyina kwizira pa mapulogiramu ghanyake gha pa kompyuta ndikuti nawo ŵali na “mulandu wakuyana waka chifukwa chakuchita nthena.”

Mu ivyo vikalembeka * na vyaru 27 ivyo vili mu wupu wa European Union (EU) mukaŵa mazgu ghakuti: “Tikupulika kanandi waka ivyo awo ŵakwimira boma la Russia ŵakuyowoya pa ungano uwu kuti Ŵakaboni ŵa Yehova ŵakusopa mwawanangwa, ndipo ŵalutilirenge kuchita nthena, nakuti wanangwa uwu ngwakuzomerezgeka mu boma la Russia. Kweni tikulutilira kupulika malipoti ghakuti ŵamazaza ŵa boma ili ŵakusecha nyumba kweniso kuŵapa milandu yakupambanapambana Ŵakaboni ŵa Yehova. Ivi vikupambana chomene na ivyo ŵakutiphalira awo ŵakwimira boma la Russia.”

Mwimiliri wa EU wakatiso: “Ŵanthu wose, na Ŵakaboni ŵa Yehova wuwo, ŵakwenera kuŵa na wanangwa, kusazgapo wanangwa wa kusopa, wanangwa wa kuchezga na ŵanji kweniso kuwungana pamoza mwamtende, na wanangwa wakuphalirako ŵanji ivyo ukugomezga, ndipo ivi vikwenera kuchitika kwambura kutemwera gulu linyake, kuyana na ivyo vili mu Dango la boma la Russia [na] malango agho boma la Russia likakolerana na wupu wa OSCE.”

Murray wakamalizga na mazgu ghakuti boma la Russia likwenera kulekerathu kutambuzga Ŵakaboni ŵa Yehova.

Bahl wakachiska boma la Russia kuti: (1) likwenera kuleka kuŵapa milandu Ŵakaboni ŵa Yehova, (2) liŵawezgere Ŵakaboni ŵa Yehova ofesi yawo yikuru iyo yili kupokeka ku Russia, na (3) lifumiske mwaluŵiro Ŵakaboni ŵa Yehova wose awo ŵali mu jele.

Aka nkhakwamba yayi kuti mawupu ghasuske boma la Russia chifukwa cha kuchitira nkhaza ŵabali ŵithu. Boma la Russia lachenjezgeka—ndipo charu chose chikumanya kuti boma ili likuchitira nkhaza zakofya ŵabali na ŵadumbu ŵithu. Kweni chakuzirwa chomene ntchakuti tikumanya kuti Yehova wakuwona vyose ivyo ŵabali na ŵadumbu ŵithu ku Russia ŵakukumana navyo. (Salimo 37:18) Adada ŵithu ŵakuchanya awo ŵakutitemwa, ŵalutilirenge kuŵatumbika ŵabali ŵithu chifukwa cha kugomezgeka, chikanga, kweniso kuzizipizga kwawo.—Salimo 37:5, 28, 34.