Pa March 12, 2020, vyaru vyakujumpha 30 ku Europe, vikasuska chomene boma la Russia chifukwa chakutambuzga Ŵakaboni ŵa Yehova. Ŵakayowoya ivi pa ungano wa wupu wakuchemeka Organization for Security and Co-operation in Europe (OSCE) Permanent Council. Yimoza mwa ntchito izo wupu wa OSCE ukuchita, nkhuvikilira wanangwa wa ŵanthu.

Vyaru 27 ivyo vili mu wupu wa European Union kweniso vyaru vinyake 6 ivyo vili mu wupu uwu yayi, vikakolerana na kuyowoya ku wupu wa OSCE kuti: “Wupu wa European Union ngwakukhwaskika chomene na ivyo vikuchitikira Ŵakaboni ŵa Yehova ku Russia. Ŵakaboni ŵa Yehova ŵakulutilira kutambuzgika, ndipo ŵakusecha nyumba zawo mwakuŵachichizga, kuŵakora na kuŵasunga kwambura mulandu, kuŵapa milandu ya uchigeŵenga kweniso kuŵajalira mu jele ndipo ŵanyake m’paka vyaka 7. Kweniso tili na chitima chomene na malipoti agho tapokera mwasonosono apa ghakukhwaskana na nkhaza izo ŵalinda ŵa jele panji ŵapolisi ŵakuchitira Ŵakaboni ŵa Yehova pambere ŵandaŵajalire na para ŵaŵajalira mu jele.”

Kazembe wa United Kingdom ku wupu wa OSCE, zina lake Neil Bush, wakayowoya kuti: “Ivyo Khoti Likuru ku Russia likeruzga pa July 2017, kukolerana na ivyo khoti lichoko likeruzga kuti Ŵakaboni ŵa Yehova ‘ŵakuchita vinthu mwakutalulira,’ vyapangiska kuti Ŵakaboni ŵa Yehova ŵakukwana 175,000 ŵaŵavye wanangwa wakusopa ndipo ŵakuŵapa mulandu usange ŵasangika ŵakusopa. Kweniso khoti lili kuŵapoka ŵanangwa wawo wakusopa, ivyo vikupambana na ivyo vili mu malango ghakendeskero ka charu cha Russia kweniso mu OSCE.” Iyo wakatiso: “Kufuma waka apo ŵakeruzgira, tikuwona kuti chiŵelengero cha Ŵakaboni ŵa Yehova awo ŵakutambuzgika ku Russia chikukwelerakwelera. Nase tikukhwaskika chomene pakuwona nkhaza kweniso nthambuzgo izo Ŵakaboni ŵa Yehova ŵakukumana nazo.”

Vinyake ivyo ŵalara ŵa wupu wa EU ŵakayowoyapo, ni ivyo vikachitika pa February 6, 2020, apo Ŵakaboni ŵa Yehova ŵankhondi ŵakaŵatimba. Ŵalinda ŵa jele ŵakatimba Mubali Aleksey Budenchuk, Gennadiy German, Roman Gridasov, Feliks Makhammadiyev, na Mubali Aleksey Miretskiy. Mwimiliri wa wupu wa EU wakati: “Wose ŵakapwetekeka chomene ndipo yumoza [Feliks Makhammadiyev] wakakhumbikwiranga wovwiri wa chipatala. Kweniso pa February 10, 2020, Vadim Kutsenko ŵakamutimba kweniso kumotcha na moto wa magesi apo ŵakamuchichizganga kuti wawulure vya Ŵakaboni ŵanyake pambere ŵandamujalire mu jele.”

Mwimiliri wa wupu wa EU wakati “kulanga kwa nthena uku kweniso kumuchitira nkhaza za mtundu uliwose munthu, nkhwananga kukuru chomene, chifukwa nkhuswa wanangwa wa munthu, nakuti munthu waliyose wakwenera kuchindikika. Kutambuzga munthu nkhuswa malango gha mawupu gha kuwona vya wanangwa wa ŵanthu pa charu chose, chomene phangano ilo vyaru vikakolerana pa nkhani ya wanangwa wa munthu. Nkhuswa malango gha ungano ukuru uwo vyaru vya ku Europe vikakolerana pa nkhani ya wanangwa wa munthu. Kweniso nkhuswa malango gha ungano ukuru uwo wupu wa UN ukachitiska pa nkhani ya kutambuzga munthu na nkhaza zinyake zakofya, zauchinyama, panji kulanga munthu mwankhaza. Ndipo pa maungano ghose agha, Boma la Russia likazomera kuti lilondezgenge ivyo ŵakolerana.”

Kweniso ŵalongozgi ŵa ku Europe ŵakati kuchitira nkhaza Ŵakaboni ŵa Yehova kukulongora kuti boma la Russia likutondeka kulondezga ivyo ŵakayowoya ku Permanent Council kuti ŵabali na ŵadumbu ŵithu mbanangwa kusopa mu charu ichi.

Mwimiliri wa wupu wa EU wakayowoyaso kuti: “Pa April 20, 2017, Khoti Likuru ku Russia likajara Ofesi Yikuru ya Ŵakaboni ŵa Yehova, na mawupu ghose agho Ŵakaboni ŵa Yehova ŵakagwiliskiranga ntchito, ndipo khoti likati ŵachita ivi pa chifukwa chakuti Ŵakaboni ‘ŵakuchita vinthu mwakutalulira.’ Ivi vyati vyachitika, tikapulika kanandi waka Boma la Russia likuyowoya kuti Ŵakaboni ŵa Yehova ŵalutilirenge kusopa ndipo mbanangwa kuchita chilichose chakukhwaskana na kusopa. Kweni tichali kupulika malipoti ghanandi kuti Ŵakaboni ŵa Yehova ŵakuwukilika mu nyumba zawo, kuŵajalira, kweniso kuŵapa milandu ya uchigeŵenga.”

Ŵa EU ŵakati “kufuma waka apo boma la Russia likakanizgira ntchito za Ŵakaboni ŵa Yehova, nyumba 869 ŵakazisecha, ŵanthu 26 ŵali kujalirika, 23 wali pa jele la pa nyumba, 316 ŵali kuŵakaka, ndipo 29 ŵali kuŵeruzga kuti ŵali na mulandu.”

Kazembe Bush wakati: “Mwakuyana na vyose ivyo tawona, vikulongora kuti Ŵakaboni ŵa Yehova para ŵachita chilichose chakukhwaskana na kusopa, ŵapolisi ŵakusecha nyumba zawo, kuŵajalira kwa nyengo yitali, kuŵazenga milandu ya uchigeŵenga, kweniso kuŵajalira mu jele. Umo ŵapolisi ŵakusechera nyumba za Ŵakaboni ŵa Yehova, kweniso umo ŵakuchitira nawo, vikulongora kuti chilato chawo ntchakuti Ŵakaboni ŵa Yehova ŵatambuzgike.”

Ŵakaswiri ŵanandi pa nkhani ya chisopa nawo ŵakususka ivyo boma la Russia likuchitira Ŵakaboni ŵa Yehova. Mwachiyelezgero, pakusazgirapo pa ivyo ŵa EU ŵakayowoya, Dr. Gudrun Kugler, uyo ni Loya ku Austria, wa ndyali, kweniso Kaswiri wa Chikatolika wakati: “Sono vinthu vili kuhenipirathu kufuma waka apo Ŵakaboni ŵa Yehova ku Russia ŵakakanizgikira kuchita milimo yawo yakukhwaskana na kusopa mu April 2017. . . . Ŵakaboni ŵa Yehova ŵakusuzgika chifukwa ŵali kuŵapa mulandu wakuti ŵakuchita vinthu mwakutalulira. Kweni mawupu ghakuwona vya wanangwa wa ŵanthu, ghakususka kuti dango ili likumanyikwa makora yayi, kweniso ndisani. Para ŵamanya waka kuti munthu ni Kaboni wa Yehova ndipo wakuchita milimo yakukhwaskana na kusopa, mbwenu ntchifukwa chakukwana chakulutira ku jele mwakuyana na dango 282.2. . . . Boma la Russia likwenera kulekerathu kutambuzga Ŵakaboni ŵa Yehova!”

Mwimiliri wa wupu wa EU wakati, boma la Russia kweniso vyaru ivyo ni mamembala gha wupu wa OSCE “ŵakwenera kuchitapo kanthu kuti ŵanthu ŵaleke kutambuzga ŵanyawo kweniso kuŵajalira mu jele kwambura chifukwa. Kweniso kuti ŵanthu awo ŵatambuzgika kwambura chifukwa ŵakwenera kuŵalipira mwakwenelera.” Ŵa EU ŵakatiso: “Boma la Russia likwenera kuchitapo kanthu mwaluŵiro, kufufuza kuti lisange awo ŵakutambuzga ŵanyawo kuti ŵapike chilango. . . . Tikupempha ŵalara ŵa boma kuti ŵamazge milandu yose ku ŵanthu awo ŵakuchita vinthu mwakuyana na wanangwa wawo. Kweniso tikupempha Boma la Russia kuti lichite ivyo likalayizga pamaso pa vyaru vinyake, kuti livikilirenge na kuchindika wanangwa wa ŵanthu. Wanangwa wakuyowoya, kuwungana pamoza, kusopa kweniso kuchita vinthu vinyake mwamtende.”

Kwali boma la Russia lipulikirenge ivyo mawupu agha ghakuyowoya panji yayi, Kweni tikumanya kuti Yehova walutilirenge kovwira ŵabali na ŵadumbu ŵithu ku Russia kuti ŵalutilire kuzizipizga mpaka apo urunji uzamumanyikwira.—Salimo 10:18.