Pa Monday, October 4, 2021, ŵamazaza awo ŵakayegha futi ŵakuchemeka Russian OMON a ŵakatimba na kuchitira nkhaza Mubali na Mudumbu Anatoly na Greta Razdobarov kweniso Mubali na Mudumbu Nikolay na Liliya Merinov. Vinthu vyakuchitiska chitima ivi vikachitika apo kagulu ka ŵamazaza aŵa kakasecha nyumba 12 za Ŵakaboni ŵa Yehova mu msumba wa Irkutsk. Ŵamazaza aŵa ŵakakaka ŵabali ŵanandi pa zuŵa ilo ŵakasecheranga.

Apo nyengo yikakwananga 6 koloko mulenji, ŵamazaza aŵa ŵakanjira mwakuchichizga mu nyumba ya Mubali Anatoly na muwoli wake Greta. Ŵamazaza aŵa ŵakamuguguza Greta uku ŵakora waka sisi zake na kuluta nayo ku chipinda chinyake, ŵakamukaka na simbi uku mawoko ghake ŵaghaŵika ku musana wake, na kumutimba kwa yengo yitali.

Apo ivi vikachitikanga ndikuti Anatoly ŵamuwiskira pasi, ŵamukaka na simbi uku mawoko ghake ŵaghaŵika ku musana wake, na kwamba kumutimba ku mutu na mu nthumbo. Ŵamazaza aŵa ŵakakora mawoko ghake ghakukakika na simbi na kumunyamura muchanya. Anatoly wakapulika vyakuŵinya chomene apo ŵakamunyamura chifukwa uzito wa thupi lake lose ukapwetekanga viŵegha vyake. Ŵamazaza aŵa ŵakamutimbanga mu mawoko uku ŵakumuchichizga kuti wazomere kuti wapalamura mulandu kweniso waŵaphalire vinthu vyakukhwaskana na ŵabali. Ŵamazaza ŵakamuchitiraso nkhaza zinyake ziheni chomene apo ŵakalimbananga na kuti ŵamunjizge botolo la gilasi pakukhalira. Ŵakatora maora ghakujumpha 8 ŵachali kusecha nyumba ya Mubali na Mudumbu Razdobarov.

Apo ŵamazaza ŵakanjira mwakuchichizga mu nyumba ya Mubali Nikolay na muwoli wake Liliya Merinov, chakwamba ŵakamutimba Nikolay kumaso na chinthu chinyake chizito. Wakawa pasi na kufenta. Apo wakasisipukanga, wakasanga kuti wamazaza wakhala pachanya pa iyo uku wakumutimba. Wamazaza uyu wakabonthora jino la panthazi la Nikolay. Liliya ŵakamuguguza pa bedi apo wakaŵa uku ŵakora waka sisi zake na kumukaka na simbi. Ŵamazaza aŵa ŵakamutimba kwa nyengo yitali pambere ŵandamuzomerezge kuti wavware vyakuvwara vyakulongosoka.

Kuyana na Malango gha boma la Russia, kugwiliskira ntchito mazaza mu nthowa iyi na kuchitira nkhaza ŵanthu nkhwakukanizgika ndipo ni mulandu. Kweniso boma la Russia lili pasi pa mawupu gha pa charu chose ghakupambanapambana agho ghakuvikilira ŵanthu ku nkhaza. Ntheura mabanja ghaŵiri agha, ghalutenge na nkhani iyi ku makhoti gha ku Russia na makhoti ghanyake ghakurughakuru gha pa charu chose kuti urunji uwoneke pa ivyo ŵali kuŵachitira.

Pati pajumpha mazuŵa ghaŵiri kufuma apo ŵamazaza ŵakasecha nyumba za Ŵakaboni, khoti likati ŵabali 6 ŵakasungike dankha mu jele kulindilira kuti mulandu wawo weruzgike. Ŵabali aŵa ni: Mubali Yaroslav Kalin, Sergey Kosteev, Nikolay Martynov, Mikhail Moish, Aleksey Solnechny, na Andrey Tolmachev. Ŵabali na ŵadumbu ŵanyake pafupifupi 300 ŵakaluta ku khoti kuti ŵakakhozgere mwamtende Ŵakhristu ŵanyawo awo ŵakasangana na vinthu vyambura urunji ivi.

Ku ŵabali na ŵadumbu ŵithu wose ŵakutemweka ku Russia, nase tikuyowoya mazgu nga agho Paulosi wakaphalira Ŵatesalonika kuti: “Tikunotha mwa imwe pakati pa mipingo ya Chiuta, chifukwa cha kuzizipizga kwinu na chipulikano mu nthambuzgo zinu zose na visuzgo ivyo mukukumana navyo.”—2 Ŵatesalonika 1:4.