Pa March 23, 2020, ku Khabarovsk, Russia, ŵapolisi ŵa FSB ŵakachita chitima yayi apo ŵakasechanga na kunanga vinthu mu nyumba ya Mubali Igor Avramenko, pati pajumpha waka mazuŵa 6 kufuma apo mubali uyu wakafwira na nthenda ya mtima. Awo ŵakasechanga ŵakamulongora Mudumbu Avramenko, chikalata chakuŵazomerezga kusecha icho chikaŵa na zina la Mubali Avramenko. Ndipo Ŵapolisi aŵa ŵakatora kompyuta, kamera na katundu munyake munandi wa chokoro ichi.

Pambere ivi vindachitike, ŵa FSB ŵakamulonda Mudumbu Avramenko, uko wakugwira ntchito na kukamutora kuluta nayo ku nyumba kwake. Ŵati ŵafika ku nyumba, uyo wakadangiliranga kagulu ka ŵa FSB aŵa, Stanislav Grebenkin, wakamulongora Mudumbu Avramenko, chikalata chakuŵazomerezga kusecha. Mudumbu uyu wakamuphalira kuti mfumu wake wali kufwa. Kweni Stanislav Grebenkin wakati wakumanya kale kuti mfumu wake wali kufwa, kweni kuti waka apo chikalata ichi chikalembekanga mfumu wake wakaŵa kuti wachali wamoyo ntheura ŵangaleka yayi kusecha.

Stanislav Grebenkin, wakamusimikizgira mudumbu uyu kuti ŵasechenge patalipatali waka. Wakati chingaŵa makora kuti ŵaseche chifukwa viwovwirenge kuti “mulandu uwu ujalike mwaluŵiro ndipo wamuŵikika mu mafayelo ghakusungiramo vinthu vyakale.” Ndipouli, ŵanthu aŵa ŵakamba kusakaza vinthu mu nyumba.

Ku Khabarovsk, Ŵakaboni ŵa Yehova 10 ŵali kuŵajulira milandu yakuti ŵakuswa malango. Nangauli ŵamazaza ŵaŵikapo mtima kuti ŵaparanye chipulikano cha ŵabali na ŵadumbu ŵithu ku Russia, kweni tikumanya kuti ŵabali ŵithu aŵa, ‘ŵasangenge nkhongono chifukwa cha kukhala mwakufwasa na kugomezga,’ Yehova, Dada withu wachitemwa.—Yesaya 30:15.