Usange ŵabali ŵithu ku Russia, awo mbafumu kweniso ŵali na ŵana ŵajalirika chifukwa cha chipulikano chawo, pakuŵa masuzgo ghanandi chomene. Ŵawoli ŵawo na ŵana ŵakwenera kuzizipizga masuzgo nga nkhusuzgika maghanoghano. Ŵadumbu 10 awo ŵafumu ŵawo ŵali kujalirika mu jele ŵakalembera kalata ŵamazaza ŵa ku Russia, kulongosora umo ŵakujipulikira. Kalata iyi yili na mazgu ghakuti: “Talemba kalata iyi chifukwa tikukhumba mupulike kulira kwithu. Ŵanthu awo ise tikuŵatemwa chomene . . . ŵali kujalirika mu jele chifukwa waka cha kuŵaghanaghanira kuti iwo pamoza na ise kweniso ŵana ŵithu, na ŵabwezi ŵithu, tikaŵazganga Baibolo na kulomba kwa Chiuta.”

Ŵanandi mwa ŵadumbu ŵithu ŵakulongosora masuzgo agho ŵakusangana nagho kweniso umo Yehova wakuŵawovwilira kuzizipizga apo ŵafumu ŵawo ŵali mu jele.

Ŵanandi mwa ŵadumbu aŵa ŵakutondeka kuyowoyeskana na ŵafumu ŵawo pa foni chifukwa cha masuzgo ghanyake gha tekinoloje. Chinyake ntchakuti, makalata agho ŵakulembera ŵafumu ŵawo ghakutora nyengo yitali kuti ghakafike ku jele, ndipo nyengo zinyake ghakufika yayi.

Mudumbu Yevgeniya Lagunova, ni muwoli wa Mubali Feliks Makhammadiyev, uyo wagwira jele kwa vyaka vyakujumpha pa viŵiri. Wakatondekanga kuyowoyeskana na mfumu wake kwa nyengo yitali. Vikamusuzganga kumanya usange mfumu wake wali makora kweniso usange wakajipulikanga kuti wali yekha para wandapokere makalata agho wakamulemberanga.

Ŵanandi mwa ŵanakazi aŵa ŵakwenda mitunda yitali kuti ŵakawone ŵafumu ŵawo. (Wonani tchati chakuti, “Mitunda iyo Ŵawoli Ŵakwenda Kuti Ŵakawone Ŵafumu Ŵawo.”) Mwachiyelezgero, Mudumbu Yevgeniya wakulongosora kuti: “Nkhwenda mtunda wa makilomita 800 pa galimoto kuti nkhawone mfumu wane ku jele.” Pa avereji wakwenda mazuŵa ghatatu panji ghanayi kuluta na kuwera kukawona mfumu wake. Ŵadumbu ŵanyake ŵakwenda pa galimoto m’paka mtunda wa makilomita 1,000. Para ŵadumbu aŵa ŵafika ku jele, ŵakulindilira dankha kuwaro kwa jele uko kukuŵa mizere yitaliyitali ya ŵanthu.

Mudumbu Irina Christensen, ni muwoli wa Mubali Dennis, uyo wakaŵa Kaboni wa Yehova wakwamba kujalirika mu jele ku Russia milimo yithu yati yakanizgika waka mu 2017. Mudumbu uyu wakwenda mtunda wa makilomita 200 kufuma ku nyumba kwake ku Oryol kuluta ku Lgov kukawona mfumu wake ku jele. Iyo wakuti: “Ntchakusuzga kuluta ku jele, wamunthu ukuvuka kweniso ukusuzgika maghanoghano. Nkhunyamuka hafu 3 mulenji, kuti para yikuti 8 koloko mulenji nkhaŵe kuti nkhupeleka vikalata vyakukhumbikwa ku awo ŵakulaŵilira jele. Kufuma apo nkhwenera kulindilira m’paka 11 koloko mulenji iyo ni nyengo iyo ŵanthu ŵakuzomerezgekera kukawona awo ŵali mu jele.” Para mudumbu uyu wafumbika icho chikumovwira kuzizipizga, iyo wakuti: “Nkhulomba chomene kwa Yehova, ndipo nkhumupempha kuti wanovwire pamoza na ŵasopi ŵanyane awo ŵali kufupi na ine, awo ŵali mu jele, na wose pa charu chose.”

Phukwa

Mudumbu Nadezhda German wakhala kwambura mfumu wake Gennadiy, kwa vyaka vyakujumpha viŵiri. Nga umo viliri na ŵadumbu awo ŵakusanga na masuzgo ghanthena ghake, nayo wakuchita phukwa chifukwa chakuti wali kutalikirana na mfumu wake. Ndipouli, Mudumbu Nadezhda wakulongosora kuti: “Mpingo wane waŵa nga kuti ndiwo ni mbumba yane waka. Chitemwa chawo chakufumira mu mtima chikulongora pakweru kuti ŵakutighanaghanira ine na mfumu wane.”

Mudumbu Yuliya Miretskaya, uyo mfumu wake, Aleksey, wali ku jele pamoza na Gennadiy, wakusazgirapo kuti: “Ŵabali na ŵadumbu ŵakunovwirako tumilimo tunyake twa pa nyumba. Ntchakupembuzga chomene kumanya kuti ŵabwezi mbakovwira nadi.

Kulera Ŵana

Mudumbu Tatyana Budenchuk wakupwelera yekha ŵana ŵaŵiri, mfumu wake Aleksey, ŵakamujalira mu jele kwamba mu September 2019. Iyo wakuti: “Ŵana ŵakulaŵiska pa vitumbiko ivyo tasanga, pa ivyo Yehova watipa, nakuti nyengo zose wakutovwira. Ŵakumanya kuti chiyezgo ichi ntchakanyengo ndipo sono ndiyo ni nyengo yiwemi yakulongolera chipulikano na kugomezgeka kwa Yehova.”

Mudumbu Natalya Filatova, uyo mfumu wake, Sergey Filatov, wakeruzgika kuti wakagwire jele vyaka 6 mu March 2020, pasono wakulera yekha ŵana ŵanayi. Pakuwona waka umo ŵana ŵake ŵakuchitira vinthu iyo wakuti: “Nkhuwona kuti ŵakuŵasoŵa chomene adada ŵawo ndipo ŵakufipa mtima usange ŵali makora. Ŵakuŵazunuranga adada ŵawo mu malurombo ghawo. Mwana msungwana uyo ni muchoko chomene, wakalembera adada ŵake, kuŵaphalira kuti tili makora kweniso kuti ŵangafipanga mtima yayi. Kweni vizamuŵa makora chomene para ŵafuma na kuzakaŵaso panyumba lumoza na mbumba.”

Mbumba iyi yikuŵikapo mtima kulondezga ulongozgi wa mu Baibolo wakukhala umoyo wambura kukhumba vinandi. Mudumbu Natalya wakuti: “Tasambira kukhala umoyo wambura kukhumba vinandi. Tili na ndalama zakukwana zakuti zingatovwira kusanga vyakukhumbikwa pa umoyo kweniso kugulira tunthu tunyake twakukhumbikwa.”

Nangauli ŵakusangana na masuzgo ghose agha, ŵadumbu ŵithu ŵali na chipulikano chakukhora kweniso ŵakulutilira kuchita vinthu vyauzimu. Mudumbu Yuliya wakulongosora kuti: “Nkhuyezga kuŵazga magazini na vinyake vyose ivyo tapokera. Vili nga kuti nkhusambira vinthu vya ŵanthu ŵaŵiri, chifukwa para nkhuyowoya na mfumu wane Aleksey, nkhuyezgayezga kukumbuka fundo zikuru izo nasambira na kumuphalirako.” Mudumbu Nadezhda wakuti: “Palije suzgo ilo linganitonda na wovwiri wa Yehova. Nili pa ubwezi wakukhora chomene na Chiuta. Nkhujipulika nga kuti ndine kamwana kasungwana ako kali mu mawoko gha adada ŵake awo mbankhongono chomene. Ndipo para nkhuwovwira ŵanji, nkhujiwovwiraso nekha.”

Mudumbu Natalya wakuti: “Nkhukumbuka mazgu ghanyake agho mudumbu munyake wakayowoya, wakati: ‘Pa ŵanthu ŵa Chiuta palije uyo wakukhumba yayi kupembuzgika, ndipo palijeso pakati pa ŵanthu ŵa Chiuta uyo wangatondeka kupembuzga ŵanyake.’ Nane nkhujipulika makora para nkhupembuzga panji kukhozga munthu munyake.” Natalya wakulutizga kuyowoya kuti: “Nkhuyezgayezga kuti nileke kujilengera chitima panji kwenjerwa chomene nangauli mbunenesko kuti vinthu vili makora yayi kwa ine kukhala nekha kwambura mfumu wane. Satana nkhumupa mwaŵi yayi wakuti wanigongoweske!”

Ŵabali na ŵadumbu pa charu chose ŵakukhozgeka chomene na chiyelezgero cha kuzizipizga icho ŵakulongora awo ŵachibali wawo ŵali kujalirika mu jele ku Russia na mu vyaru vinyake. Tikumanya makora kuti Yehova wakuŵazirwiska chomene ŵabali na ŵadumbu ŵithu aŵa awo ‘mbakuzirwa mu maso ghake.’—Yesaya 43:4a.