Ŵajalirika mu Jele Chifukwa cha Chipulikano Chawo
Ŵalaraŵalara ŵa boma la Russia ŵachali kulimbana na Ŵakaboni ŵa Yehova, ndipo ŵakuŵachitira vinthu vyankhaza vyakuyana waka na ivyo ŵakaŵachitiranga mu muwuso wa Soviet. Kufika pa April 19, 2021, Ŵakaboni 61 ŵakaŵa kuti ŵajalirika mu jele kulindilira kuti ŵeruzgike, 33 ŵakaŵa pa jele la panyumba ndipo 218 ŵakuzomerezgeka yayi kufumako ku chigaŵa icho ŵakukhala. Ŵakuŵapa milandu nga yakuti ŵakuchita vinthu vyakofya, kupeleka ndalama ku gulu ilo likuchita vinthu vyakofya, panji kulongozga gulu ilo likuchita vinthu vyakofya. Pasono, Ŵakaboni pafupifupi 416, awo ŵali na vyaka vya pakati pa 20 mpaka 90, ŵakuŵafufuza kuti ŵawone usange ŵali na mulandu.
Ŵalaraŵalara ŵa boma ŵakuti ŵakuchita ivi chifukwa cha ivyo khoti likadumura mu April 2017, kuti mawupu ghose gha Ŵakaboni ŵa Yehova ngambura kuzomerezgeka. Kweniso ŵanthu aŵa ŵakubisamira ku Dango nambara 282 la Russian Federation Criminal Code (RFCC) lakukhwaskana na kuchita vinthu vyakofya. Kweni unenesko ngwakuti boma ili likupa mulandu Ŵakaboni ŵa Yehova chifukwa cha kusopa Chiuta mwamtende. Para ŵangasangika na mulandu, ŵanyake mwa iwo ŵangakhala mu jele m’paka vyaka 10.
Ivyo Ŵamazaza ku Russia Ŵakuchita Pakukaka, Kusunga, Kweniso Kujalira mu Jele Ŵakaboni ŵa Yehova
Kufuma waka mu February 2018, ŵamazaza ŵa boma la Russia ŵakuchita vinthu vyakuyana waka para ŵakukaka na kujalira Ŵakaboni ŵa Yehova. Ŵapolisi ŵa futi ŵakunjira mwakuchichizga mu nyumba za Ŵakaboni, uku ŵalazgiska futi zawo pa mitu ya ŵanthu awo ŵali mu nyumba—kusazgapo ŵana na ŵachekuru, na kuŵachichizga kuti ŵagone pasi. Ŵapolisi ŵakwamba kusecha nyumba yose, kutora katundu wa ŵanthu aŵa na kukora ŵanyake kuluta nawo ku polisi kuti ŵakaŵafumbe mafumbo. Ŵakufufuza milandu ŵakuyowoya kuti Ŵakaboni ŵanyake ŵali na mulandu wa kuchita vinthu vyakofya na kuphalira makhoti kuti ghaŵasunge mu jele kulindilira kweruzgika. Para ŵaŵajalira mu jele, mbwenu ŵakwimira boma pa milandu ŵakupempha makhoti kuti ghasazgirengeko utali wa nyengo ya kuŵasungira. Makhoti agha ghakuzomera na kuchita waka ivyo ghaphalirika. Musi umu muli vinthu ivyo vikachitikira Ŵakaboni 11 awo ŵakati ŵali na mulandu wa kuchita vinthu vyakofya ndipo ŵakaŵeruzga kuti ŵagwire jele. *
Valentina Baranovskaya wakakakika pa April 10, 2019, ŵapolisi awo ŵakayegha futi ku Abakan ŵati ŵasecha nyumba zinayi za Ŵakaboni ŵa Yehova, kusazgapo na nyumba yake. Mwana wake, Roman Baranovskiy, nayo wakakakika. Ŵapolisi aŵa ŵakapoka vinthu nga Mabaibolo, mafoni na vinthu vinyake vyakukhumbikwa. Kufuma apo, ŵakaŵajulira mulandu. Pa February 24, 2021, Khoti la mu Msumba wa Abakan ku Republic of Khakassia likadumura kuti Mudumbu Baranovskaya wakagwire jele vyaka viŵiri. Aka nkhakwamba kuti Kaboni mwanakazi wapike chilango chakuti wakagwire jele chifukwa cha chipulikano chake. Mudumbu Baranovskaya wali na vyaka 70 ndipo mu July 2020 wakakoleka na sitiroku. Khoti likadumuraso kuti Mubali Baranovskiy wakagwire jele vyaka 6.
Aleksandr Ivshin wali na vyaka 63 ndipo wakapika mulandu pa April 23, 2020. Ŵakuti wali na “milandu” ya kuchitiska maungano gha chisopa kwizira pa videoconference na kwimba sumu za chisopa. Apo ŵamazaza ŵakasechanga nyumba ya Mubali Ivshin, vikapangiska kuti wasuzgike chomene maghanoghano ndipo BP yake yikakwera chomene. Pati pajumpha myezi kufuma apo ŵakasechera nyumba yake, ŵakamupoka galimoto yake. Pa February 10, 2021, Khoti la Abinskiy ilo lili ku Chigaŵa cha Krasnodar likati Ivshin wali na mulandu. Wakapika chilango chakuti wagwire jele vyaka 7 na hafu, icho ntchilango chikuru chomene pa vilango vyose ivyo vyapika ku Ŵakaboni ŵa Yehova kufuma apo Khoti Likuru likakanizgira milimo yithu mu 2017.
Dennis Christensen ŵakamuzomerezga kufuma luŵiro mu jele, wati wagwira vyaka vyakujumpha vitatu pa vyaka 6 ivyo wakapika. Pa June 23, 2020, Khoti la ku Lgovskiy ilo lili ku Kursk, likagamura kuti Dennis Christensen wafumiskike mu jele ndipo vyaka ivyo vyakhalako walipire ndalama zakukwana madola 5,759 gha ku America. Ndipouli, Aleksei Shatunov uyo ngwakwimira boma pa milandu ku Chigaŵa cha Kursk wakachita apilu ivyo khoti likadumura. Iyo wakachita apilu chifukwa cha malipoti ghaheni agho wakapokera kufuma ku ŵalinda ŵa jele ghakukhwaskana na Christensen. Kufika sono, Christensen wachali mu jele apo wakulindilira ivyo khoti lizamudumura ulendo uwu, ndipo deti lakudumulira mulandu uwu lichali lindamanyikwe. Pasono, ŵalaraŵalara ŵa jele ŵali kumuŵika mu selo yakuyuzgiramo ŵanthu iyo wakhalengemo mazuŵa 10, nangauli wali makora viŵi yayi mu thupi. Ŵakamuŵika mu selo iyi chifukwa ŵakuti wali kuswa malango ghachokoghachoko gha jele.
Christensen wali na vyaka 46 ndipo ngwa ku Denmark. Wakakakika ku Oryol pa May 25, 2017, apo ŵapolisi ŵa futi kweniso ŵamazaza ŵanyake ŵakufuma ku Federal Security Services ŵakatimbanizga maungano ghamtende gha Ŵakaboni ŵa Yehova agho nayo wakaŵapo. Pati pajumpha chaka kweniso wati wawonekera mu khoti kwa maulendo ghakujumpha 50, khoti likadumura kuti Christensen wagwire jele vyaka 6 chifukwa waka chakuti wakachitako vinthu vyakukhwaskana na kusopa pakuŵa Kaboni wa Yehova. Pa February 6, 2019, Mweruzgi Aleksey Rudnev wa Khoti la Zheleznodorozhniy ku Oryol ndiyo wakaŵerenga chigamuro cha mulandu uwo ŵakamupusikizgira Christensen wakuti ‘wakovwira gulu ilo likuchita vinthu mwakutalulira,’ kuyana na dango 282.2(1) la RFCC. Pa May 23, 2019, ŵeruzgi ŵatatu ku Khoti la Chigaŵa cha Oryol ŵakakana apilu iyo Christensen wakachita ndipo ŵakakhozgera vyakuti wakakhale mu jele vyaka 6.
Sergey Klimov ŵakamukaka pa June 3, 2018, ŵapolisi kweniso ŵamazaza ŵanyake ŵati ŵasecha mwakuchichizga nyumba za Ŵakaboni ŵa Yehova ziŵiri. Ŵakaboni ŵanyake 30, kusazgapo na mwanakazi wa vyaka 83, ŵakaŵatora kuti ŵakaŵafumbe mafumbo. Wose ŵakaŵafumiska kuwuskako waka Klimov. Ŵamazaza ŵakamupusikizgira kuti wali na mulandu ndipo ŵakamusunga mu jele vyaka viŵiri. Nyengo yakumusungira mu jele ŵakasazgirako maulendo 7, ivyo vikapangiska kuti waŵe kutali na mwanakazi wake kweniso ŵachibali ŵake kwa chaka chimoza na myezi 5 pambere ŵandamweruzge na kumujalira mu jele. Pa November 5, 2019, Khoti la Oktyabrsky ku Tomsk likadumura kuti Klimov wagwire jele vyaka 6 chifukwa cha mulandu wakuti ‘wakuchita vinthu mwakutalulira.’ Klimov wazamufumiskika mu July 2023.
Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, na Aleksey Miretskiy ŵakaŵapa mulandu pamanyuma pakuti ŵamazaza ŵa boma ku Russia ŵasecha mwakuchichizga nyumba 7 za Ŵakaboni ŵa Yehova ku Saratov pa June 12, 2018. Zuŵa linyake, ŵapolisi ŵakaswa vijaro vya nyumba za Ŵakaboni, kuŵapoka vinthu vyawo ndipo mu nyumba zinyake ŵakaŵikirangamo dala mabuku ghakukanizgika gha Ŵakaboni ŵa Yehova. Ŵapolisi aŵa ŵakatora Ŵakaboni 10 na kuluta nawo kuti ŵakaŵafumbe mafumbo ndipo ŵakaŵasunga m’paka cha usiku pakati. Ŵakaboni ŵatatu ŵakaluta nawo ku jele uko ŵakaŵasunga pafupifupi chaka chimoza.
Pa September 19, 2019, Mweruzgi Dmitry Larin wa khoti la Leninskiy ku Saratov wakadumura kuti Ŵakaboni 6 aŵa ŵakakhale mu jele vyaka vinandi chifukwa chakuti ŵati ‘ŵakawovwira gulu ilo likuchita vinthu mwakutalulira.’ Ŵaŵiri ŵakapika vyaka vitatu na hafu, yumoza wakapika vyaka vitatu ndipo ŵanyake ŵatatu ŵakapika vyaka viŵiri. Kusazgirapo apa, ŵakaphalirikaso kuti para ŵafuma mu jele ŵakwenera kukhala vyaka 5, kwambura kuŵa ŵalongozgi pa ntchito yiliyose. Ŵanalume aŵa ŵakaŵachitiraso nkhaza ku jele. Pa February 6, 2020, ŵalinda ŵa jele la Penal Colony No. 1 ŵakatimba uheni chomene na zinthonga Aleksey Budenchuk, Gennadiy German, Roman Gridasov, Feliks Makhammadiyev, na Aleksey Miretskiy. Makhammadiyev ndiyo wakapwetekeka chomene ndipo ŵakamugoneka mu chipatala chifukwa wakaphyoka mbambo, wakapwetekeka maphapu na ziso.
Nyumba Zinandi Zikasecheka mu July 2020
Pa July 12, 2020, ŵa FSB ŵakasecha mwakuchichizga nyumba za Ŵakaboni ŵatatu ku Prokopievsk, ku chigaŵa cha Kemerovo. Ŵakaboni ŵa Yehova ŵanandi ŵakaŵatolera ku maofesi gha ŵa FSB kuti ŵakaŵafumbe mafumbo ndipo pamanyuma ŵakaŵafumiska. Ndipouli, Andrey Vlasov, uyo ngwakupendera ndipo wakwendera ndodo, ŵakamusunga dankha kwa mazuŵa ghaŵiri. Ŵakati wali na mulandu ndipo pa July 14 wakeruzgika kuti wakakhale pa jele la panyumba myezi yiŵiri.
Pa July 13, nyumba zakujumpha 100 za Ŵakaboni ŵa Yehova mu mizi yakupambanapambana ku chigaŵa cha Voronezh na mu msumba wa Stariy Oskol, ku Chigaŵa cha Belgorod. Ŵakaboni ŵanalume 10 ŵakati ŵali na mulandu ndipo ŵakaŵasunga mu jele, ŵakhalengemo m’paka pa September 3. Ŵakaboni ŵaŵiri ŵakatimbika chomene na Ŵapolisi awo ŵakanjira mu nyumba ya Alexander Bokov, mwakuchita kuchichizga. Bokov ŵakamutimba munthumbo, ku mutu, ndipo kufuma apo ŵakamuchichizga kuti wanyang’amale apo ŵapolisi ŵakamufumbanga mafumbo. Dmitry Katirov nayo ŵakamudidimizgira pasi, na kumutimba chomene m’paka wakalira chifukwa cha vyakuŵinya.
Kuyowoyapo Kuti Ŵakaboni Ŵaleke Kujalirika mu Jele Kwambura Chifukwa
Awo ŵakwimira Ŵakaboni awo ŵali mu jele pa milandu ŵapeleka madandauro ghawo ku wupu wa UN Human Rights Committee na wupu wa UN Working Group on Arbitrary Detention (WGAD). Ŵali kulembaso vikalata vinyake 57, na kupeleka ku Khoti la Kuwona vya Wanangwa wa Ŵanthu ku Europe. Nangauli ŵayezgayezga kuchita vyose ivi, kweni nipera Ŵakaboni aŵa ŵandafumiskike.
Mawupu ghanyake ghasuska pakweru ivyo boma la Russia likuchita pa kutambuzga Ŵakaboni ŵa Yehova. Mwachiyelezgero, pa April 26, 2019, wupu wa WGAD ukasuska boma la Russia chifukwa cha kutambuzga Ŵakaboni ŵa Yehova apo ukayowoyangapo pa mulandu wa Dmitriy Mikhailov wa mu msumba wa Shuya. Wupu wa WGAD ukayowoyaso kuti boma ili likakaka na kujalira Mikhailov chifukwa cha sankho pa nkhani ya chisopa ndipo nayo njumoza mwa “Ŵakaboni ŵa Yehova ŵanandi chomene ku Russia awo ŵakukakika, kujalirika mu jele na kupika milandu chifukwa chakuti waka ŵakachitako vinthu vyakukhwaskana na kusopa, uwo ni wanangwa wawo.”
Pa March 12, 2020, wupu wa OSCE Permanent Council na European Union ukakolerana pa kususka ivyo boma la Russia likuchita pa kutambuzga Ŵakaboni ŵa Yehova. Mawupu agha ghakati: “Wupu wa European Union ngwakukhwaskika chomene na ivyo vikuchitikira Ŵakaboni ŵa Yehova ku Russia. Ŵakaboni ŵa Yehova ŵakulutilira kutambuzgika . . . Kweniso tili na chitima chomene na malipoti agho tapokera mwasonosono apa ghakukhwaskana na nkhaza izo ŵakuŵachitira para ŵakuŵasunga mu jele kulindilira kuti ŵeruzgike.” Ŵakatiso: “Kutambuzga munthu nkhuswa malango gha mawupu gha kuwona vya wanangwa wa ŵanthu pa charu chose, chomene Phangano ilo vyaru vikakolerana pa nkhani ya wanangwa wa munthu. Nkhuswa malango gha Ungano Ukuru uwo wupu wa UN ukachitiska pa nkhani ya Kutambuzga Munthu na Nkhaza Zinyake Zakofya, Zauchinyama, panji Kulanga Munthu Mwankhaza. Kweniso nkhuswa malango gha Ungano Ukuru uwo wupu wa EU ukachitiska pa nkhani ya Wanangwa wa Munthu. Ndipo pa maungano ghose agha, Boma la Russia likazomera kuti lilondezgenge ivyo ŵakolerana.”
Nyengo
April 19, 2021
Ŵakaboni 61 ŵajalirika mu jele.
February 24, 2021
Khoti la Abakan ku Republic of Khakassia ladumura kuti Valentina Baranovskaya wagwire jele vyaka viŵiri ndipo mwana wake Roman Baranovskiy, wagwire jele vyaka 6
February 10, 2021
Khoti la Abinskiy ku Chigaŵa cha Krasnodar ladumura kuti Aleksandr Ivshin wagwire jele vyaka 7 na hafu.
September 2, 2020
Khoti la Berezovsky ku Chigaŵa cha Kemerovo ladumura kuti Sergey Britvin na Vadim Levchuk ŵagwire jele vyaka vinayi.
August 3, 2020
Khoti la ku Chigaŵa cha Pskov lati Gennady Shpakovskiy wafumiskike mu jele. Likuzomerezga vyakuti wali na mulandu kweni lasintha chilango chakuti wagwire jele vyaka 6 na hafu, na kuyowoya kuti limuwonerengepo usange wali na nkharo yiwemi kwa vyaka vyakuyana waka.
July 13, 2020
Ŵamazaza ŵasecha nyumba za Ŵakaboni pafupifupi 100 ku Vigaŵa vya Voronezh na Belgorod.
June 9, 2020
Khoti la mu Msumba wa Pskov lati Gennady Shpakovskiy wa vyaka 61 wali na mulandu ndipo wagwire jele vyaka 6 na hafu.
February 6, 2020
Pa Ŵakaboni 6 awo ŵakajalirika mu jele pa September 19, 2019, 5 ŵakaŵasamuskira ku jele la Penal Colony No. 1 ku Orenburg. Ŵati ŵafika uku, ŵalinda ŵa jele ŵakaŵatimba chomene—ŵakaŵatimba na vibakera kweniso na nthonga. Makhammadiyev wakaphyoka mbambo, kupwetekeka maphapu, kweniso ziso.
September 19, 2019
Mweruzgi Dmitry Larin wa Khoti la Leninskiy ku Saratov wapeleka cheruzgo chakuti Ŵakaboni ŵanalume 6 ŵakhale mu jele—Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, na Aleksey Miretskiy—chifukwa cha kuŵasanga na mulandu wa ‘kuchita vinthu vyakofya.’
May 23, 2019
Khoti la ku Chigaŵa cha Oryol lakana apilu ya Dennis Christensen ndipo lazomerezga vyakuti wakakhale mu jele vyaka 6.
April 26, 2019
Wupu wa UN Working Group on Arbitrary Detention wasanga kuti boma la Russia laswa wanangwa wa Dimtriy Mikhailov ndipo wasuska boma ili chifukwa cha kutambuzga Ŵakaboni ŵa Yehova.
February 6, 2019
Khoti la Zheleznodorozhniy lati Dennis Christensen wali na mulandu ndipo lati wakakhale mu jele vyaka 6.
October 9, 2018
Ŵapolisi na ŵamazaza ŵanyake ŵasecha nyumba za Ŵakaboni ku Kirov. Ŵakaboni ŵanalume ŵanandi pamoza na Andrzej Oniszczuk, uyo kwake nkhu Poland, ŵakakika na kusungika mu jele.
July 15, 2018
Ŵapolisi ŵasecha nyumba za Ŵakaboni ŵanandi ku Penza. Vladimir Alushkin ŵamukaka na kumusunga mu jele.
July 4, 2018
Ŵapolisi ŵasecha nyumba za Ŵakaboni ku Omsk. Sergey na Anastasiya Polyakov ŵakakika na kuŵikika mu jele. Polyakova ni mwanakazi wakwamba pa Ŵakaboni ŵa Yehova ku Russia kujalirika mu jele pa mulandu wa kuchita vinthu vyakofya.
June 12, 2018
Khoti la Sovietskiy ku Oryol lati Dennis Christensen wasungike mu jele myezi yiŵiri.
June 3, 2018
Ŵapolisi ŵasecha nyumba za Ŵakaboni ku Tomsk na Pskov. Sergey Klimov wakakika na kusungika mu jele.
February 19, 2018
Mulandu wa Dennis Christensen wamba kweruzgika mu Khoti la Zheleznodorozhniy, na Mweruzgi Aleksey Rudnev.
July 20, 2017–November 2018
Khoti la Sovietskiy lasazgirako nyengo yakusungira mu jele Dennis Christensen maulendo ghanandi, kufuma apo Khoti la Zheleznodorozhniy nalo lachita mwakuyana waka.
May 26, 2017
Khoti la Sovietskiy ku Oryol lati Dennis Christensen wasungike mu jele myezi yiŵiri.
May 25, 2017
Ŵapolisi ŵatimbanizga maungano gha Ŵakaboni ku Oryol na kukaka Dennis Christensen.
April 20, 2017
Khoti Likuru ku Russia lati ofesi ya Ŵakaboni ŵa Yehova yijarike ku Russia kweniso mawupu ghanyake 395 gha Ŵakabon
^ ndime 5 Kuti mumanye vinandi vyakukhwaskana na Ŵakaboni ŵa Yehova awo ŵakutambuzgika chifukwa cha chipulikano chawo ku Russia.
Panji Mungatemwa Kuŵerengaso Nkhani Izi
NKHANI
Palije Chifukwa Chakuwopera Kutambuzgika
Pa ungano wapachaka wa 2019, Mubali Mark Sanderson wa mu Wupu Wakulongozga, wakayowoya nkhani ya mutu wakuti “Kasi Tikwenera Kopa Vichi?” Mu nkhani yake mukaŵa vidiyo iyo yikulongora ivyo ŵakayowoya ŵabali na ŵadumbu ŵanyake awo ŵakutambuzgika ku Russia.