Pa May 25, ku Oryol, Russia, ŵapolisi ŵafuti na ŵa Federal Security Service (FSB) ŵakatimbanizga Ŵakaboni ŵa Yehova apo ŵakasopanga. Ŵapolisi aŵa ŵakati Ŵakaboni ŵa Yehova ŵali na mulandu chifukwa ŵakulutilira kuchita vinthu mwakutalulira. Mu February 2016, wupu wa Ŵakaboni ŵa Yehova wa Oryol uli kumara chifukwa cha mulandu wakuchita vinthu mwakutalulira. Ŵapolisi aŵa ŵakalemba vyose vyakukhwaskana na waliyose uyo wakaŵapo pa nyengo yakusopa iyi, ŵakaŵapoka mafoni na matabuleti, ndipo pamanyuma ŵakachita chipikisheni mu nyumba za Ŵakaboni ŵa Yehova ku Oryol.

Ŵapolisi aŵa ŵakatora ŵanalume ŵa mu mpingo wa Ŵakaboni ŵa Yehova ku Oryol na kuluta nawo ku maofesi gha FSB. Mwanalume munyake uyo ni mulara wa mpingo, zina lake Dennis Christensen wa ku Denmark ŵali kumujalira dankha. Ŵapolisi ŵakapempha khoti la Sovietsky District kuti ŵamusunge dankha Dada Christensen kuti ŵa FSB ŵaŵe na nyengo yakukwana yakusangira ukaboni na ŵakaboni awo ŵangaŵawovwira pa nkhani iyi. Jaji Svetlana Naumova wakazomerezga kuti Dada Christensen wasungike dankha myezi yiŵiri. Ŵakaboni ŵa Yehova ŵamupeleka dandawuro lawo muhanya uno kuti ivi vileke kuchitika. Usange Dada uyu wangasangika na mulandu ndikuti wagwirenge jele vyaka 6 panji 10 kuyana na Article 282.2, chigaŵa 1, mu Criminal Code.

Ŵakaboni ŵa Yehova aŵa ŵakasopanga pamoza ku Oryol, kweni ŵakawungana nga ni wupu wakumanyikwa na boma yayi. Ivyo ŵapolisi ŵa ku Russia ŵachita vikulongora kuti ŵakulonda chomene Ŵakaboni ŵa Yehova para ŵakusopa. Ŵakulonda mawupu ghawo ghakumanyikwa na boma pera yayi. Ivi vikuyana na ivyo vikachitikira Ŵakaboni ŵa Yehova mu msumba wa Taganrog. Mu msumba uwu ŵalara ŵa boma ŵali kumazga wupu wa Ŵakaboni ŵa Yehova. Kweni pamanyuma, Ŵakaboni ŵa Yehova 16 awo ŵakasangika ŵakusopa mwamtende ŵakaŵapa mulandu wakuchita vinthu mwakutalulira. Mu November 2015, khoti likadumura kuti wose 16 ŵakaŵa na mulandu kweni ŵakaŵagwiliska yayi jele panji kuŵalipiliska. Sono mulandu uwu uli ku khoti lakuvikilira wanangwa wa ŵanthu ku Europe (European Court of Human Rights).