Pa September 16, 2020, * Khoti la Sverdlovskiy ilo lili mu Msumba wa Kostroma lizamweruzga mulandu wa Mubali Sergey Rayman na muwoli wake, Valeriya. Waliyose ŵangamupa chilango chakuti waleke kusangikaso na mulandu unyake mu vyaka 7.

Sergey Rayman

• Chaka cha kubabikira: 1996 (Kineshma, ku Chigaŵa cha Ivanovo)

• Mbiri yake: Wakasambira vyakuzengazenga ku koleji yinyake. Ni nkhwantha pa kunozga na kutoweska mukati mwa nyumba. Wakasambira Baibolo na abuya ŵake. Wakatorana na Valeriya mu 2015. Wakutemwa kuphika na kuseŵera mu chiwuvi

Valeriya Rayman

• Chaka cha kubabikira: 1993 (Sharya, Chigaŵa cha Kostroma)

• Mbiri yake: Adada ŵake ŵakafwa apo wakaŵa na vyaka 10. Wakasambira vya Yehova kufuma kwa amama ŵake. Wakugwira ntchito ya kunozga sisi

Mulenji wa pa July 25, 2018, ŵamazaza awo ŵakayegha futi ŵakagwiliskira ntchito visulo kuti ŵaswe chijaro cha nyumba ya Mubali na Mudumbu Rayman. Ŵamazaza aŵa ŵakalikaka banja ili. Mudumbu Rayman ŵakamujalira kwa mazuŵa ghaŵiri. Mubali Rayman ŵakamuŵika mu selo yayekha iyo wakakhalamo mazuŵa 59. Ŵamazaza aŵa ŵali kulikanizga banja la mubali na mudumbu Rayman kuti liyowoyeskanenge na Ŵakaboni ŵa Yehova ŵanyawo. Ŵakuzomerezgekaso yayi kuti ŵafumengepo pa nyumba pawo namise. Ivi vyakhwaska chomene umoyo wa banja ili.

Apo banja ili likulindilira kuti mulandu wawo weruzgike, tikulomba kuti mphanyi ŵalutilira kuŵa ŵachikanga kweniso ŵankhongono, na kugomezga kuti Yehova walekengepo yayi kuŵawovwira.—Joshuwa 1:9.