Khoti la Industrial ku Kursk lipelekenge chigamuro chake pa mulandu wa Mubali Andrey Andreyev, Mubali Artem Bagratyan na muwoli wake Alevtina, kweniso Mubali Andrey Ryshkov. a

Andrey Andreyev

• Chaka cha kubabikira: 1976 (Kursk)

• Mbiri yake: Wakatorana na Svetlana mu 1999. Ŵali na ŵana ŵaŵiri ŵasungwana. Wakamba kunweka na uthenga wa mu Baibolo wati wamanya umo mauchimi agho ghalimo ghakufiskikira. Wakabatizika mu 2002

Alevtina Bagratyan

• Chaka cha kubabikira: 1977 (Kursk)

• Mbiri yake: Wakatemwanga kudinda vithuzi apo wakaŵa muchoko. Wakamba kusambira Baibolo wachali muchoko. Wakabatizika mu 1997. Wakatengwa kwa Artem mu 2012. Wali kugwirapo ntchito ya kunozga sisi, kweniso wakapweleleranga amama ŵake

Artem Bagratyan

• Chaka cha kubabikira: 1972 (Abovyan, Armenia)

• Mbiri yake: Wakasama ku Armenia kuluta ku Russia. Wakasangana na muwoli wake Alevtina ku Kursk. Wose ŵakutemwa chilengiwa. Wakabatizika mu 2000

Andrey Ryshkov

• Chaka cha kubabikira: 1987 (Kursk)

• Mbiri yake: Adada ŵake ŵakafwa apo wakaŵa musepuka. Kanandi wakakhalanga na asekuru ŵake, ndipo amama ŵake ŵakagwiranga ntchito kuŵiri. Wakamba kunweka na uthenga wa mu Baibolo wati wasanga mazgoro gha mafumbo agho ghakamusuzga kwa vyaka vinandi. Wakabatizika mu 2011. Wakatorana na muwoli wake Marina mu 2016. Wakagwiranga ntchito yakunozga nyumba izo zanangika

Pa October 16, 2019, ŵa Federal Security Service (FSB) ŵakasecha nyumba zinandi za Ŵakaboni ŵa Yehova ku Kursk na kuŵafumba mafumbo. Ivi vikapangiska kuti Mubali Andrey Andreyev na banja la Bagratyan, ŵakakike. Ŵamazaza aŵa ŵakakakaso Mubali Ryshkov pa January 21, 2020. Alevtina Bagratyan wakafumiskika pa December 17, 2020, wati wasungika mu jele kwa myezi yakujumpha 13. Pasono wali pa jele la panyumba. Ŵabali ŵatatu ŵachali kusungika mu jele.

Artem Bagratyan wakulwara nthenda ya shuga. Para wakukumbuka umo vikaŵira apo iyo na mfumu wake ŵakajalirika mu maselo ghakupambana, Alevtina wakuti: “Kwa nyengo yitali nkhamanyanga yayi umo mfumu wane waliri, kweniso usange vinthu vikahenipirangathu chifukwa cha suzgo lake. Nkhamusoŵanga chomene.”

Alevtina wakuti wakaŵa na chigomezgo chose kuti Yehova wamupwelelerenge iyo kweniso na ŵabali wose awo ŵakaŵa mu jele. Iyo wakuti: “Nyengo zose [Yehova] wakunipa nkhongono. Nkhumanya kuti walutilirenge kuchita nthena. Nakuti nkhukayika yayi.”

Tikugomezga kuti Yehova walutilirenge kuŵa chigongwe chakukhora ku ŵabali ŵithu ŵatatu na mudumbu, apo ŵakulindilira ivyo khoti lidumurenge pa mulandu wawo.—Zintharika 18:10.