Mubali Konstantin Bazhenov wakafumiskika mu jele ku Russia pa May 5, 2021. a Ŵati ŵamusunga kwa tumazuŵa ku malo agho ŵakusungirako ŵanthu awo ŵaŵatumizgenge kwawo, ŵakamutumizga ku Ukraine pa May 19, 2021. Muwoli wake Irina, wakadangirako kuti wakamupokelere para wafika. Konstantin ŵakamutumizga ku kwawo chifukwa boma la Russia likamupoka wenekaya wake mu May 2020.

Konstantin wakababika mu 1975 mu mbumba iyo yikasopanga yayi iyo yikakhalanga kumanjiliro gha dazi kwa msumba wa Veliky Novgorod, Russia. Apo wakaŵa muchoko iyo pamoza na mbumba yakwake ŵakasamira ku Ukraine. Konstantin wakamba kutemwa maseŵero gha gymnastics na sumu apo wakaŵa muwukirano. Wakamalizga masambiro ghake pa sukulu yakusambizga vyakwimba ndipo wakaŵa mulongozgi wa gulu lakwimba sumu za ving’wenyeng’wenye.

Nanga ni apo wakaŵa kuti wandambe kusambira Baibolo, Konstantin wakagomezganga kuti mbuheni kuchita vyachiwawa na nkhondo. Ndicho chifukwa wati wachemeka kuti wakanjire usilikari ku Ukraine, wakakana. Apo wakaŵa ku koleji, wakaŵa na mafumbo ghanandi ghakukhwaskana na umoyo kweniso chisopa. Wakapenjanga mazgoro gha mafumbo agha mu visopa vyakupambanapambana, ndipo wakaghasanga wati wamba kusambira Baibolo na Ŵakaboni ŵa Yehova. Wakabatizika mu 1996.

Konstantin wakatorana na Irina mu 2001. Kuti wasange ndalama za kovwilira iyo na muwoli wake, wakamba ntchito yakuzenga, chomene kuzenga mvuno na malo agho ŵakupembangamo moto. Ŵakasamira ku Russia mu 2009.

Pa June 12, 2018, ŵapolisi awo ŵakaŵa na futi wakasecha nyumba 7 za Ŵakaboni ŵa Yehova ku Saratov, kusazgapo nyumba ya Konstantin na Irina. Iyo pamoza na ŵabali ŵanyake ku Saratov ŵakakakika ndipo pamanyuma ŵakaŵasunga mu jele.

Konstantin wati wafika waka ku jele, wakamanya kuti wakhumbikwirenge kupembuzgika na Mazgu gha Chiuta, ndipouli wakaŵavye Baibolo. Iyo wakuti “Muwoli wane wakanitumira notibuku, ndipo zuŵa lililose nkhalembangamo mavesi agho nkhaghakumbukanga.” Yehova wakamovwira kukumbuka mavesi 500 mu myezi yiŵiri pera! Wati walisanga Baibolo wakaŵikapo mtima kuliŵazga lose ndipo wakamalizga mu myezi yinayi pera. Malemba ghakamukhozga chomene, wakakondwaso chomene kulemberako muwoli wake na ŵanji fundo za mu Baibolo izo zikumupa chimwemwe.

Konstantin kanandi waka wakalombanga kufumira pasi pamtima kwa Yehova kuti wazizipizge apo ŵakamusunganga mu jele, chomenechomene apo wakachitanga phukwa ndipo wakamusoŵa chomene muwoli wake. Iyo wakuti: “Nkhajikamanga pasi na kwamba kulira uku nkhulomba kwa Yehova. Nkhawona kuti chingaŵa chiwemi kulemba pa pepara ivyo nkhukhumba kwa Chiuta, ndipo usange wanizgora nkhachonganga. Nkhakhorwa kuti Yehova wakaŵa nane pafupi.” Konstantin wakafumiskika mu jele ilo ŵakamusunganga pa May 20, 2019. Ndipouli masuzgo ghake ghakamalira papo yayi.

Konstantin pamoza na ŵabali ŵanyake 5, ku Saratov wakaŵasanga na mulandu ndipo ŵakaŵatuma ku jele pa September 19, 2019. Pati pajumpha myezi yichoko waka, khoti lati lakana apilu yawo, ŵabali 5 ŵakaŵasamuskira ku jele la ku Orenburg. Konstantin ŵakamusamuskira ku jele la Dimitrovgrad, makilomita ghakujumpha 500 kufuma ku Saratov uko kukaŵa muwoli wake.

Apo Irina wakaŵa kutali na mfumu wake, wakakhozgekanga chomene na chigaŵa cha Nkhani za pa JW, izo zikulongosora umo ŵabali na ŵadumbu ŵakuzizipizgira nthambuzgo mwachimwemwe. Irina wakakhozgekangaso chomene chifukwa mfumu wake mtima ukaŵa waka m’malo. Apo mfumu wake wakafumbikanga mafumbo panyengo iyo wakaŵa wachali mu jele, iyo wakuti: “Wakazgoranga makora waka nyengo zose!” Wati wazomerezgeka kuti wangamwimbira foni mfumu wake, ŵakimbiranga lumoza sumu, kulomba, na kusambira lumoza Baibolo. Iyo wakuti ivyo ŵakadumbiskananga vikakhozganga chomene chipulikano chake mwa Yehova na kumovwira kulutilira kuŵa wakukondwa mulimose umo vinthu vingaŵira.

Konstantin ŵakamusunga mu jele myezi yakujumpha 14 ndipo wakagwira jele kujumpha chaka chimoza na hafu chifukwa cha chipulikano chake. Wakafumiskika mu jele kwati kwakhala myezi 9 kuti wamalizge chilango icho wakapika chakuti wagwire jele vyaka vitatu na hafu. Vili nthena chifukwa chakuti para munthu weruzgika uku ŵakamusunganga kale mu jele ŵakumuwuskirako mazuŵa ghanyake. Chinyake icho wakalekera kumalizga myezi yiŵiri iyo yikakhalako ntchakuti, wakapika mwaŵi wakuti wafumiskike mu jele pambere nyengo yake yindakwane.

Tikukondwa kuti Konstantin wafumiskika mu jele ndipo waliso pamoza na muwoli wake Irina. Ŵabali na ŵadumbu ŵithu wose awo ŵakuzizipizga masuzgo ŵakulongora kuti mazgu gha Themba Davide ngaunenesko nadi, agho ghakuti: “Nkhubisama mu mfwiri wa mapapindo ghinu m’paka visuzgo vijumphe.”—Salimo 57:1.