Ku Russia, wupu wa Federal Service for Financial Monitoring (Rosfinmonitoring) ni bungwe ilo boma likugwiliskira ntchito, ndipo lili na mazaza kulimbana na unkhungu pa nkhani za ndalama kweniso ŵanthu awo ŵakuti ŵakuchita vinthu mwakutalulira. Likuwoneseska kuti ŵanthu awo ŵakuchita vinthu mwakutalulira na vya uchigeŵenga ŵangapokangako yayi ndalama. Munthu ŵangamusanga na mulandu nangauli wangaŵa kuti wanderuzgike na khoti.

Kwambira waka mu 2017 apo Khoti Likuru Chomene ku Russia likakanizga milimo ya Ŵakaboni ŵa Yehova, mazina 525 gha ŵabali na ŵadumbu ŵithu ghali kusangika pa gulu la awo ŵali kuŵasanga na mulandu. a Chiŵelengero ichi chikusazgapo Ŵakaboni ŵachekuru ŵakujumpha 100.

Awo mazina ghawo ghali kulembeka kuti ŵali na mulandu ŵali kukanizgika vinthu vinyake pa nkhani ya umo ŵangagwiliskira ntchito ndalama. Mwachiyelezgero, maakaunti ghawo gha ku banki ghali kujalika, ndipo mbumba yiliyose pa mwezi yikuzomerezgeka kutorako waka ndalama pafupifupi 10,000 rubles (madora 137 gha ku America) kuti ŵagwiliskire ntchito pa vinthu vyakukhumbikwa pa umoyo. Kweniso ŵakukanizgika vinthu vinyake, ndipo ivi vikupangiska kuti umoyo wawo wa zuŵa na zuŵa uŵeso wakusuzga chomene. Mwachiyelezgero, ŵakusuzgika chomene kuti ŵagule panji kuguliska malo, nyumba panji galimoto, kusanga inshuwalansi, panji kupokera ndalama izo zikovwira awo ŵali pa ntchito yayi, panji kutora ngongoli ku banki. Ŵakaboni awo ŵali kupumura pa ntchito kweniso ŵakupendera ŵakusuzgikaso chomene chifukwa ŵakusuzgika kuti ŵalipire ndalama za chipatala kweniso ŵakuŵakanizga kukwera magalimoto ghanyake.

Mubali Anton Chermnykh wa ku Ussuriysk, uyo wakaŵikika pa gulu ili mu December 2019, wakayowoya kuti: “Kuti nipokere ndalama yane ya pamwezi, nkhwenera kupeleka ukaboni wakukwana wakulongora kuti ndalama izi nili kuzisanga mwa ukhuluku yayi. Nkhwenera kupeleka vimakalata ku awo ŵakugwira ntchito ku banki kuti ŵavijambure na kuvituma ku Moscow. Kuti vimakalata vyose ŵaviwone makora pakutoranga masabata ghaŵiri. Ndipo pa zuŵa ilo ŵasankha, nkhulutangaso ku banki ndipo ŵakuchita kunitolerako ndalama ku akaunti yane na kunipa, pamanyuma ŵakujaraso akaunti yane nyengo yeneyiyo. Kweniso ŵanthu ŵaphya awo ŵakugwira ntchito ku banki ŵakuchita nane wofi para ŵamanya kuti nili pa gulu la ŵanthu awo ŵali kulembeka kuti ni vigeŵenga.”

Nangauli ŵabali na ŵadumbu ŵithu ŵakusangana na masuzgo ghose agha, kweni ŵachali kuwona vinthu mwakwenelera. Mubali Yuriy Belosludtsev, zina lake likalembeka vyaka viŵiri na hafu pambere ŵandamupe chilango chakuti wagwire jele la pa nyumba kwa vyaka 6. Iyo wakati: “Maakaunti yane ŵakanijalira. Kweni ine na muwoli wane tikasanga wovwiri kufuma ku ŵabali na ŵadumbu ŵithu. Tikuwonga chomene Yehova chifukwa cha wovwiri uwo ŵakatipa.”

Tikumanya kuti Yehova wakuwona vinthu vyose vyambura urunji ivyo ŵabali na ŵadumbu ŵithu ŵakuzizipizga ku Russia. Tikulomba na chigomezgo chose kuti Yehova walutilirenge kovwira ŵabali ŵithu mu nyengo yakusuzga iyi.—Mateyu 6:33.