APRIL 8, 2022
RUSSIA

Dada Uyo Wali mu Jele Wakovwira Mbumba Yake Kulutilira Kuŵa Paubwezi Wakukhora na Yehova

JULANI

Khoti la Sovetskiy ilo lili ku Kazan lipelekenge chigamuro chake sonosono apa pa mulandu wa Mubali Konstantin Sannikov. Wakwimira boma pa milandu wachali wandapemphe chilango icho wangapika.

Nyengo

August 25, 2020

Ŵakamba kumupa mulandu pamanyuma pakuti ŵakufufuza mulandu ŵaŵika vyakujambulira mazgu mwakubisilizga mu nyumba ya Konstantin. Ŵamazaza ŵakati wali na mulandu wakuchita vinthu vyakofya chifukwa ŵanthu ŵakizanga kunyumba kwake kuzakadumbiskana Baibolo
August 27, 2020

Wakakakika na kusungika mu jele kulindilira kuti mulandu wake weruzgike
May 26, 2021

Khoti likamukanira muwoli wake kuti wakamuwonenge ndipo lichali m’paka sono
August 20, 2021

Khoti likamba kutegherezga mulandu wake

Vyakukhwaskana na munthu uyu

Konstantin Sannikov

Chaka cha kubabikira: 1970 (Kazan, Republic of Tatarstan)

Mbiri yake: Wakagwiranga ntchito ya udokotala pambere wandakakike. Wakatorana na muwoli wake Irina mu 1992. Ŵali na ŵana ŵanayi

Wakamba kusambira Baibolo na Ŵakaboni ŵa Yehova ndipo wakabatizika mu 1994

Ivyo Wakayowoya Muwoli wa Konstantin, Irina a

Kasi mfumu winu wakuchita wuli kuti wapwelelere mbumba uku wali ku jele?

Nangauli wali kukakika, Konstantin wakulutilira kutipwelelera mwauzimu. [Kwizira mu makalata,] wakutiphalirako fundo izo wasanga pakufufuza, kutitumira vyakuchitika vyakukhozga, na kutiphalirako ivyo wadumbiskana na awo ŵali mu selo yimoza. Wakutiphaliraso umo Yehova wakuzgolera malurombo ghake.

[Ine na ŵana] tikulutilira kuchita kusopa kwa mbumba Chinkhondi chilichose, nga umo tikachitiranga pambere ŵandamukake mfumu wane. Kufuma apo, tikumulembera makalata mfumu wane Konstantin na kumuphalirako ivyo tasambira. Nayo wakutizgora na kutiphalirako maghanoghano ghake [pa ivyo tasambira]. Nyengo zinyake wakutipa vyakuti tichite, nga nkhwimba sumu panji kufufuza mitu yinyake ya nkhani.

Apo Konstantin wakupwelelera mbumba yake mwauzimu uku wali mu jele, tikugomezga kuti Yehova walekengepo yayi kupwelelera ‘awo mbake.’—1 Timote 5:8.

a Pakuti Mubali Sannikov wachali kusungika mu jele, tikatondeka kuyowoya na mweneko.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI