Mwahuno, Mubali Dennis Christensen wakwaniska vyaka vitatu wali mu jele Russia, nangauli ŵali kumujalira pa vifukwa vyambura kupulikikwa. Kufuma waka apo ŵakamukakira pa May 25, 2017, ŵabwezi ŵake ŵanyake ŵamufumbapo mubali uyu umo chiyezgo ichi chakhwaskira chipulikano chake. Iyo wakuŵazgora na mazgu ghamozamoza ghakuti: “Chipulikano chane chaŵa chakukhora chomene kuluska kumanyuma kose.”

Mubali Christensen wakuti: “Najiwonera nekha kuti mazgu gha mu Baibolo agho ghali pa Yakobe chaputara 1, vesi 2 na 3 ngaunenesko nadi. Pa lemba ili pakuti : ‘Mukondwenge ŵabali ŵane para mukukumana na viyezgo vyakupambanapambana. Pakuti mukumanya kuti para chipulikano chinu chayezgeka chikubaba kuzizipizga’”

Ntchakukondweska chomene kuti chipulikano na chimwemwe cha Mubali Christensen, vyasazgikira chomene nangauli wakusangana na masuzgo kweniso vikhuŵazgo.

Ŵati ŵamukaka waka, Mubali Christensen ŵakamuŵika mu jele lakufupi na kwawo ku Oryol. Panyengo iyi muwoli wake Irina, wakazomerezgekanga, kukamuwona. Mubali Christensen wakakhala mu jele ili kwa vyaka viŵiri pambere mulandu wake underuzgike. Mu February 2019, Mubali Christensen wakeruzgika kuti wakagwire jele vyaka 6. Pamanyuma pa myezi yitatu, khoti likakana apilu iyo mubali uyu wakapanga. Pamanyuma ŵakamusamuska mu jele ilo wakaŵa na kukamuŵika mu jele ilo lili pa mtunda wa makilomita 200 kufuma kukwake ku Oryol, ivi vili kupangiska kuti watalikirane na muwoli wake Irina.

Pafupifupi chaka chimoza sono, Mubali Christensen wakuŵanga na mwaŵi wakuti wangapempha kuti ŵamufumiske mu jele pambere vyaka ivyo ŵali kumweruzga kuti wagwire jele vindakwane. Kweni kwa maulendo ghatatu ŵali kumukanira. Nangauli pali vinthu vyakukhuŵazga ivi, Mubali Christensen wachali wakukhora.

Mwakujiyuyura Mubali Christensen wakuti: “Ine na Irina ndise ŵambura kufikapo, kweni tasambira kuzizipizga na chimwemwe mu nyengo ya chiyezgo. Ndipo chakuzirwa chomene ntchakuti pasono tasendelera chomene kwa Dada withu Yehova.”

Tikulomba ndipo tili na chigomezgo chose kuti Yehova walutilirenge kovwira ŵabali na ŵadumbu ŵithu wose ku Russia kuti ŵalutilire kuzizipizga nthambuzgo na chimwemwe.—Mateyu 5:11, 12.