Awo ŵakuwona vya wanangwa wa ŵanthu mu wupu wa United Nations (UN) ŵalemba kalata ya mapeji 15 iyo yikuyowoya kuti boma la Russia laswa dango ilo vyaru vili kukolerana pakujalira Ŵakaboni ŵa Yehova 18 mu misumba yakupambanapambana mu charu ichi kufuma mu May 2018 mpaka mu July 2019. Ŵanthu aŵa ŵakupempha boma la Russia kuti lifumiske mwaluŵiro Ŵakaboni wose awo ŵachali mu jele.

Kalata iyo ŵakalemba pakwamba yikafumiskika pa May 15, 2020. Ndipo kalata yakunozgekaso makora yiŵikikenge pa webusayiti ya wupu wa UN sonosono apa.

Aka nkhachitatu kuti gulu lakuwona vya wanangwa wa ŵanthu liŵikire kumanyuma ŵabali na ŵadumbu ŵithu. Mu kalata ya sono iyi, gulu ili lasuska boma la Russia chifukwa cha kuchitira nkhaza ŵabali na ŵadumbu ŵithu.

Pa nkhani ya nkhaza izo ŵamazaza ŵakachitanga pakukora na kujalira Ŵakaboni, gulu ili likati, palije vifukwa vyakupulikikwa ivyo ŵapolisi ŵakeneranga kuchitira nthena. Likatiso pakaŵavya chifukwa chakuti Ŵakaboni ŵajalirike mu jele panji kweruzgika sono panji munthazi.

Ŵanthu aŵa ŵakatiso ŵakukolerana navyo yayi vyakuti Ŵakaboni ŵakuchita vinthu mwakutalulira. Ndipo ŵabali na ŵadumbu ŵithu palije icho ŵali kunanga. Iwo ŵakugwiliskira waka ntchito wanangwa wawo wa kusopa na kulondezga ivyo ŵakugomezga mwamtende.

Mu kalata iyi, gulu ili likasuskaso ivyo makhoti ghakuchita pakweruzga ŵabali na ŵadumbu ŵithu. Mwachiyelezgero, apo ŵakeruzganga mulandu unyake, ŵadumbu ŵithu ŵaŵiri ŵakaŵikika mu selo. Nga umo gulu ili likuyowoyera,“munthu wakusangika wakwananga pekha para khoti lamweruzga na kumusanga na mulandu.” Pa chifukwa ichi, chikaŵa chambura kwenelera kuti ŵadumbu ŵithu ŵaŵakake na simbi panji kuŵasunga mu selo pambere ŵandaŵeruzge kweniso kuluta nawo ku khoti mwankhaza nga ni para mbanthu awo ŵapalamura milandu yakofya.”

Gulu ili likuti boma la Russia likwenera kumazgirathu milandu ya Ŵakaboni 18 na kuŵalipira kuyana na ivyo vili mu dango ilo vyaru vikasayinirana. Kweniso gulu ili likuchiska charu ichi kuti chichite kafukufuku mwakukwana, na kuwona vinthu ivyo vikapangiska kuti Ŵakaboni ŵambe kuŵachitira nkhaza, na kuchitapo kanthu kuti wose awo ŵakambiska vinthu ivi ŵasangike na kupika chilango.”

Kalata iyi yikutiso Ŵakaboni 18 aŵa “mbachoko waka mwa Ŵakaboni ŵanandi awo ŵali kujalirika mu jele ku Russia ndipo ŵali kupika mulandu wakuti ŵakuchita vinthu mwakutalulira. Vyose ivi ntchifukwa chakuti ŵakulondezga wanangwa wawo wakusopa.” Wanangwa uwu ndiwo charu cha Russia pamoza na vyaru vinyake vikakolerana kuti viwuvikilirenge. Nangauli kalata iyi yikuzunura waka Ŵakaboni 18, kweni gulu ili likalongosora kuti fundo izi “zikukhwaskaso na wose awo ŵakukumana na suzgo lakuyana waka.”

Ndipouli, kalata iyo gulu ili lili kulemba yikutisimikizgira kuti ŵabali na ŵadumbu ŵithu ku Russia ŵafumiskike yayi, kweni tikugomezga kuti yiwovwirenge kuti vinthu visintheko. Tikulindilira ivyo boma la Russia lizgorenge pa nkhani iyi. Pasono, apo ŵabali na ŵadumbu ŵithu ŵakulutilira kulongora chikanga na kuzizipizga nthambuzgo zose izo ŵakukumana nazo, tikumanya kuti Adada ŵithu ŵachitemwa, Yehova, ŵalutilirenge kuŵapa chimwemwe na mtende chifukwa chakuti ŵakuŵagomezga.—Ŵaroma 15:13.