MAY 18, 2022
RUSSIA

Inver Siyukhov Wakusanga Nkhongono

JULANI

Khoti la Maykopskiy ilo lili ku Republic of Adygeya lipelekenge chigamuro chake sonosono apa pa mulandu wa Mubali Inver Siyukhov. Wakwimira boma pa milandu wachali wandapemphe chilango icho wangapika.

Nyengo

April 15, 2021

Wapika mulandu chifukwa cha kuchitako maungano gha mpingo kwizira pa videoconference
April 16, 2021

Ŵamazaza ŵakasecha nyumba ya Inver pamoza na nyumba zinayi za Ŵakaboni ŵa Yehova. Ŵakamufumba mafumbo na kumusunga dankha mu jele
April 17, 2021

Watumika ku jele lakusungirako awo milandu yawo yinderuzgike
August 15, 2021

Wasamuskikira ku jele la chivikiliro chikuru pa mtunda wa makilomita 110 kufuma ku Maykop
September 13, 2021

Khoti likamba kutegherezga mulandu wake

Vyakukhwaskana na munthu uyu

Inver Siyukhov

Chaka cha kubabikira:1974 (Maykop)

Mbiri yake: Wakasambira vya ukauntati. Wali kugwirapo ku banki

Wakamba kusambira Baibolo na Ŵakaboni ŵa Yehova mu 1989. Wakakhorwa kuwona umo ŵakuchitira vinthu mwaunenesko. Wakabatizika pa September 9, 1990. Wakasambizgako mudumbu wake unenesko wa mu Baibolo ndipo nayo wakabatizika mu 1992. Mudumbu wake pamoza na mfumu wake ndiwo mbachibali ŵekha awo Mbakaboni ŵa Yehova

Ivyo Wakayowoya Mudumbu wa Inver, Zarieta Churda a

Ntchivichi chikumovwira Inver kuzizipizga apo wakusungika mu jele?

Ulendo wakwamba apo tikakumana ku jele uko ŵakumusunga, nkhamufumba umo wakujipulikira chifukwa cha kutalikirana na ŵabwezi kweniso mbumba yake. Mwakukondwa wakazgora kuti apo ŵamazaza ŵakambanga waka kusecha nyumba yake, wakajipulika kuti Yehova wakumupa nkhongono zinandi chomene, nga umo munthu wangaphutira mvuchi mu chibaluni.

Chinyake ntchakuti, wakulutilira kulondezga ndondomeko yiwemi ya kuchitira vinthu vyauzimu, zuŵa lililose wakuŵerenga machaputara ghatatu mu Malemba Ghachihebere na chaputara chimoza mu Malemba Ghachigiriki. Wakuŵikaposo mtima kovwira awo ŵali lumoza mu jele pakuŵapa wovwiri uwo ŵakukhumbikwira. Mu myezi yiŵiri yakwambilira, wakawovwira ŵanyake ŵaŵiri kumarana na suzgo la kukhweŵa.

Kasi mwanozgekera wuli, pakumanya kuti namweso na mfumu winu mungakakika?

Para ŵanthu ŵakukhumba kuluta kukawona charu chinyake, ŵangapokera dankha katemera wa matenda agho ghangakaŵika umoyo wawo pangozi mu charu icho ŵakuluta. Ntheura ningati “katemera” wane ni mavesi gha mu Baibolo, sumu zithu, na vyakuchitika vyakukhozga. Apo milimo ya Ŵakaboni ŵa Yehova yikakanizgikanga ku Russia mu 2017, nkhaŵazga mwakuwerezgawerezga malipoti agho ghakusangika mu Buku Lapachaka ghakuyowoya vya umo ŵabali ŵakuchitira kuti ŵalutilire kupharazga mu vyaru ivyo milimo yithu njakukanizgika. Nkhakhozgeka chomene kuwona kuti ŵabali na ŵadumbu ŵakalutiliranga kukhozga chipulikano chawo na kuchita ntchito yakupharazga, nangauli kuchita nthena kukaŵa kwakofya.

Tili kusimikizga mtima kuti nanga tingakakika, tijilengerenge lusungu yayi. Nangauli ntchipusu yayi kuzizipizga nthambuzgo, kweni tizamuyiwona kuti mbuteŵeti wapadera uwo Yehova wakutipa. Vizamuŵa nga wakuti: “Mwambukire mu Makedoniya.”—Milimo 16:9.

Tili na chigomezgo chose kuti ŵabali na ŵadumbu ŵithu ku Russia ŵalutilirenge “kupokera nkhongono kwa Fumu kwizira mu nkhongono zake zikuru.”—Ŵaefeso 6:10.

a Pakuti pasono Mubali Siyukhov wachali kusungika mu jele, tikatondeka kupulika kwa mwenecho.