Pa October 28, 2021, Khoti Likuru ku Russia likaŵika dango liphya pa nkhani ya kuchita vinthu vyakofya. Dango liphya ili likulongora kuti para munthu panji gulu la ŵanthu likuchita vyakukhwaskana na kusopa kwawo, ŵakwenera yayi kuŵikika mu gulu la ŵanthu awo ŵakuchita milimo ya gulu la chisopa ilo ndakukanizgika. Ndipouli, dango ili lindawovwire kuti Ŵakaboni ŵa Yehova ŵaleke kutambuzgika chifukwa ŵamazaza ŵa ku Russia ŵamba kale kuligwiliskira ntchito mu nthowa zakupambanapambana, kweni palije kusintha.

Mwachiyelezgero, kwamba pa October 28 apo dango ili likaŵikikira, ŵamazaza ŵasecha nyumba pafupifupi 13 za Ŵakaboni, ŵakamukanira apilu Mudumbu Irina Lokhvitskaya, na kumupa mulandu Mudumbu Yelena Savelyeva uyo wali na vyaka 80. Mwakupambanako na ivi, pa November 22, 2021, khoti linyake ku Vladivostok likati Mubali Dmitriy Barmakin walije mulandu ndipo likajara milandu yose iyo ŵakamupa.

Tikumanya yayi usange dango ili liwovwirenge kuti ŵabali ŵithu ŵaleke kutambuzgika panji lipangiskenge kuti ŵambe kupika vyaka vinandi vya kugwira jele. Mulimose umo viŵirenge, tikulutilira kuthemba Yehova kuti waŵawovwire ŵabali na ŵadumbu kuti ŵazizipizge na chimwemwe m’paka apo ŵazamusangira chiponosko chanadi.—Salimo 146:3-5.