Kufuma waka mu April 2017, apo boma la Russia likakanizgira milimo ya Ŵakaboni ŵa Yehova, ŵabali na ŵadumbu ŵakujumpha 500 ŵali kukakika na kupika mulandu wakuti ŵakuchita vinthu vyakofya. Ŵanyake pafupifupi 40 ŵali kupika chilango cha kugwira jele, apo 15 ŵali kuŵalipiska. Ŵanyakeso ŵakujumpha 80 ŵakuti ŵali na mulandu ndipo ŵali kupika chilango chakuti ŵaleke kusangikaso na mulandu. Nangauli ŵamuŵajalira mu jele yayi pasono, kweni chilango icho ŵali kupika chakhwaska chomene umoyo wawo.

Kuyana na Malango gha boma la Russia, mweruzgi wali na mazaza gha kumupa munthu chilango chakuti waleke kusangikaso na mulandu m’malo mwa kukagwira jele. Para vyaŵa nthena, mweruzgi wakuŵikaso nyengo yakuti ŵamuwonelerepo munthu uyo wapika chilango na kumukanizga kuchitako vinthu vinyake. Para munthu waswa malango agho wapika, khoti lingadumura kuti wakagwire jele vyaka ivyo wakaphalirika kuti waleke kusangikaso na mulandu.

Kasi vinthu vili wuli kwa awo ŵali kupika chilango chakuti ŵaleke kusangikaso na mulandu? Ndipo kasi Yehova wakuŵawovwira wuli ŵabali na ŵadumbu aŵa? Tikachezgapo na ŵanyake awo ŵali kupika chilango chakuti ŵaleke kusangikaso na mulandu kwa vyaka vyakwambira viŵiri m’paka 6. Iwo ŵakulongosora masuzgo agho ŵakukumana nagho kweniso umo Yehova wakuŵawovwilira kuzizipizga.

Pakuti taŵa na mwaŵi wakupulika umo vinthu viliri kwa awo ŵali kupika chilango chakuti ŵaleke kusangikaso na mulandu, vitovwirenge kuti tilombenge chomene na kuŵazunura mu malurombo ghithu ŵabali aŵa kweniso mbumba zawo. Ivyo vikuŵachitikira vikupelekaso ukaboni wakuti Yehova wakuzgora malurombo ghanthena ndipo wakovwira ŵateŵeti ŵake ŵakugomezgeka mu viyezgo vyose.—2 Ŵakorinte 1:3, 4.