Pa February 10, 2021, Khoti la ku Chigaŵa cha Kursk likakana pempho la Mubali Dennis Christensen lakuti ŵamufumiske mu jele pambere nyengo yake yindakwane. Mubali uyu wakapempha khoti kuti nyengo iyo yakhalako pa chilango icho wakapika walipire waka ndalama. Kufika pasono pajumpha chaka chimoza kufuma apo Mubali Dennis wakamba kuŵa na mwaŵi wakuti ŵangamufumiska mu jele pambere nyengo yake yindakwane, kweni khoti likulutilira kukana pempho lake.

Mwasonosono apa, Dennis wakalembera kalata muwoli wake, Irina. Wakamuphalira vya lemba la mu Baibolo ilo wakulitemwa chomene: “Ntheura, tileke kuvuka pakuchita icho ntchiwemi, chifukwa mu nyengo yake tizamuvuna usange tikuvuka yayi.” Ŵagalatiya 6:9 Wakati wali na chigomego chose kuti Yehova wazamuŵatumbika para ŵakulutilira kuchita uwemi, kovwira ŵanji, na kuleka kuthera. Wakatiso wakukhumba kuti pa nyengo iyo wazamufumiskikira mu jele wazakaŵe na chipulikano chakukhora chomene kuluska icho wakaŵa nacho apo wakajalirikanga waka.

Dennis wakhala mu jele na kutalikirana na muwoli wake kwamba mu May 2017, ndipo pasono wakwaniska vyaka pafupifupi vinayi. Dennis na Irina ŵakulutilira kuŵa chiyelezgero chiwemi kwa ise tose, apo ŵakulongora kuti ŵakugomezga Yehova, ŵali na mtende wa mumtima, ndipo ŵakuŵikapo mtima kulutilira kuŵa ŵakugomezgeka kwa Yehova.—Ŵafilipi 1:14.