Khoti Lakuwona vya Wanangwa wa Ŵanthu ku Europe likapeleka vigamuro viŵiri pa February 22, 2022, ivyo vikaŵikiranga kumanyuma Ŵakaboni ŵa Yehova 15. Milandu yake yikakhwaskananga na ivyo vikachitika apo ŵamazaza ŵakachitira nkhaza ŵabali ŵithu pa nyengo iyo ŵakasechanga nyumba zawo pakati pa chaka cha 2010 na 2012. Khoti ili likadumura kuti boma la Russia likaswa wanangwa wa ŵabali na ŵadumbu ŵithu wa kusopa kweniso wakuchita ivyo ŵakhumba. Boma la Russia laphalirika kuti lilipire ndalama zakujumpha madola 112,323 gha ku America. Vigamuro ivi ni vyaumaliro ndipo ni vyakuti munthu wangachitaso apilu yayi.

Vigamuro viŵiri ivi vikapelekeka pa milandu yakukwana 6. a Ŵabali awo ŵakaŵa mu milandu iyi ŵakati ŵamazaza ŵa boma la Russia ŵakagwiliskira ntchito vikalata vyambura kuzomerezgeka kuti ŵaseche nyumba zawo na Nyumba ya Ufumu yimoza, kweniso kuvura na kusecha ŵadumbu ŵithu ŵaŵiri chifukwa chakuti ŵakapharazganga, na kuŵapoka vinthu vyawo. Nyengo zinyake, ŵa FSB awo ŵakavwaranga vyakujijara kumaso kweniso ŵakayeghanga futi ndiwo ŵakasechanga nyumba za ŵabali na ŵakuchitira nkhaza.

Ulendo unyake, awo ŵali mu dipatimenti ya vya malango ŵakakakumana na loya André Carbonneau uyo wakuwona vya wanangwa wa ŵanthu pa charu chose, ndipo loya uyu wakati chigamuro cha khoti ichi chiwovwirenge chomene chifukwa charu ichi chikusecha nyumba zinandi za Ŵakaboni ŵa Yehova kusazgapo na nyumba 1,700 izo zasecheka kwamba mu 2017 apo milimo ya Ŵakaboni ŵa Yehova yikakanizgika. Pasono usange nyumba ya Kaboni wa Yehova ŵayisechengeso chifukwa waka cha chisopa chawo mbwenu ndikuti ŵaswa malango gha wupu wa European Convention.” Wakasazgiraposo kuti: “Nakuti Khoti laŵasuskaso ŵamazaza ŵa boma la Russia chifukwa cha kukanizga Ŵakaboni kupharazga nyumba na nyumba. Ivi vikulongora waka kuti Khoti Lakuwona vya Wanangwa wa Ŵanthu ku Europe likuwona kuti ntchito ya kupharazga ntchigaŵa cha kusopa ndipo ŵamazaza ŵanganjilirangapo yayi.”

Nangauli vigamuro viŵiri ivi vilekeskenge nthambuzgo iyo Ŵakaboni ŵa Yehova ŵakukumana nayo ku Russia yayi, kweni viwovwirenge waka kuti kunthazi khoti lizakawoneposo makora pa nkhani ya kukanizgika kwa milimo yithu. Pachali milandu yakujumpha 60 ya Ŵakaboni ŵa Yehova ku Russia iyo yikulindilira kuti yeruzgike na Khoti Lakuwona vya Wanangwa wa Ŵanthu ku Europe. Tili na chigomezgo kuti khoti ili lizamudumuraso mwakuyana waka pa milandu yinyake iyo yakhalako.

Tikukondwa kuwona kuti awo ŵakuwona vya wanangwa wa ŵanthu ŵakuwona kugomezgeka kwa ŵabali na ŵadumbu ŵithu ku Russia. Vigamuro ivi vikupeleka waka ukaboni wakuti Yehova wakuŵatumbika chifukwa cha kuŵikapo mtima kukhozgera zina lake kweniso muwuso wake.—Salimo 26:11.