Pa January 25, 2022, Khoti la Trusovskiy ilo lili ku Chigaŵa cha Astrakhan likati Mudumbu Anna Safronova wa vyaka 56 wali na mulandu ndipo wakagwire jele vyaka 6. Khoti likati lapeleka waka chigamuro ichi, nyengo yeneyiyo ŵakaluta nayo kukamujalira.

1. May 28, 2021

   Ŵamujulira mulandu

2. June 2, 2021

   Ŵamazaza ŵasecha nyumba iyo wakakhalanga lumoza na amama ŵake ŵa vyaka 81. Anna wakasungika dankha mu jele kulindilira kuti mulandu wake weruzgike

3. June 3, 2021

   Wafumiskika mu jele umo wakasungikanga na kutumika pa jele la panyumba. Wakanizgika kwenda kufumapo pa nyumba pake, ndipo wakazomerezgekanga kwenda waka kwa ora limoza pera zuŵa lililose kwamba 9 koloko mulenji m’paka 10:00.

4. June 10, 2021

   Waŵikika mu gulu la ŵanthu ŵakofya ndipo maakaunti ghake gha ku banki ghakajarika

5. January 24, 2022

   Mu mazgu ghake ghaumaliro mu khoti wakati: “Pa Mateyu 5:44 Yesu wakaphalira ŵalondezgi ŵake kuti: ‘Lutilirani kutemwa ŵalwani ŵinu na kulombera awo ŵakumutambuzgani.’ Chifukwa wuli? Chifukwa pali viyelezgero vinandi vyakulongora ŵanandi awo ŵakatambuzganga ŵanyawo awo pasono ŵakusopa Yehova.

   “Nkhukhumbisiska chomene kuti zuŵa linyake yumoza wa ŵa FSB, awo ŵakufufuza mulandu, ŵalinda ŵa jele, maloya, na ŵanyake awo ŵakunipulika na kuwona makhaliro ghane, wazakasinthe umo wakuŵawonera Ŵakaboni ŵa Yehova . . . Kuti panji nanga wangaŵa munthu yumoza pera wakhumbe kwamba kuŵazga Baibolo, kusanga mazgoro gha mafumbo ghake, kuŵa na khumbo la kumumanya makora Chiuta, panji kufika na pakuŵa muteŵeti wake.”

6. January 25, 2022

   Weruzgika kuti wali na mulandu ndipo wakagwire jele vyaka 6

Tikukhozgeka chomene na chiyelezgero chiwemi icho ŵakulongora ŵabali na ŵadumbu ŵithu ŵakugomezgeka ku Russia na Crimea apo tikulaŵiska kwa Adada ŵithu ŵakuchanya kuti ŵatipe nkhongono zakuzizipizgira.—2 Ŵatesalonika 1:4.