Pa February 18, 2021, Khoti la Birobidzhanilo ilo lili ku Chigaŵa cha Jewish Autonomous likadumura kuti Mubali Konstantin Guzev waleke kusangikaso na mulandu unyake kwa vyaka viŵiri na hafu. Pasono ŵamujalirenge mu jele yayi.

Konstantin Guzev

• Chaka cha kubabikira: 1964 (ku Khabarovsk)

• Mbiri yake: Adada ŵake ŵakaŵa ŵankhaza kweniso ŵakaŵa ŵaloŵevu. Wakakhumbanga kumanya chilato cha umoyo. Wati wawona kuti mazgoro wakughasanga yayi, wakamba uloŵevu na kugwiliskira ntchito minkhwala yakutimbanizga wongo. Pamanyuma, wakamba kusambira Baibolo na Ŵakaboni ŵa Yehova. Ndipo wakasanga mazgoro ghakukhorweska gha mafumbo agho wakaŵa nagho. Ivi vikawovwira kuti wasinthe umoyo wake. Wakabatizika mu 2000. Wakatorana na Anastasiya mu 2001

Ŵamazaza ŵakasecha ku nyumba ya Mubali Konstantin mu May 2018. Pa nyengo iyi, ŵanthu 150 ndiwo ŵakasecha mu nyumba za ŵabali wose mu tawuni ya Birobidzhan. Pa July 29, 2019, ŵamazaza ŵakati Mubali Konstantin ŵamusanga na mulandu. Iwo ŵakati mubali uyu wali na mulandu “wakuchitako milimo ya gulu ilo likuchita vinthu mwakutalulira” chifukwa waka chakuti wakachitangako maungano gha mpingo.

Ŵakaboni ŵa Yehova 22, ŵali kuŵajulira milandu yakukwana 19 mu chigaŵa ichi, ndipo umoza wake ni mulandu wa Anastasiya, uyo ni muwoli wa Mubali Konstantin.

Chikanga cha ŵabali na ŵadumbu ŵanyake ku Russia chakhozga Mubali Konstantin na muwoli wake Anastasiya. Mubali Konstantin wakuti: “Najiwonera nekha na kupulika umo ŵadumbu ŵanyake ŵakayowoyeranga kuti ŵangakwaniska yayi kuyowoya mu khoti. . . . Kweni na wovwiri wa Yehova na malurombo gha ŵabali, ŵakakwaniska kuyowoya makora waka na kuvikilira chipulikano chawo.”

Tikuŵaghanaghanira na kuŵalombera ŵabali na ŵadumbu ŵithu ku Russia. Tili na chigomezgo chose kuti chiŵembu chilichose icho ŵanganozga kuti ŵanange chipulikano chawo chitimbanizgikenge chifukwa Yehova wali nawo.—Yesaya 8:10.