Pa January 20, 2021, Khoti la Birobidzhan ilo lili ku chigaŵa cha Jewish Autonomous likati Mubali Yevgeniy Golik wali na mulandu. Mubali uyu wakapika chilango chakuti waleke kusangikaso na mulandu unyake kwa vyaka viŵiri na hafu. Pasono wagwirenge jele la panyumba. Mubali uyu wapangenge apilu chigamuro ichi.

Yevgeniy Golik

• Chaka chakubabikira: 1975 (ku Birobidzhan, ku chigaŵa cha Jewish Autonomous)

• Mbiri yake: Wakasambira sukulu yakotchelera vinthu. Wakugwira ntchito pa kampani yinyake. Ndipo pambere wandaŵe Kaboni wa Yehova, wakaŵa msilikari

  Iyo wakasambira unenesko wa mu Baibolo kwa amama ŵake. Ndipo pamanyuma wakasanga mazgoro gha mafumbo agho wakajifumbanga ghakukhwaskana na umoyo. Ivyo wakasambira mu Baibolo vikamovwira kuti waghanaghanirenge chomene ŵanyake

Mulenji, pa May 17, 2019, ŵa Federal Security Service (FSB) awo ŵakaŵapo 150, ŵakasecha mu nyumba za Ŵakaboni ŵa Yehova mwakuchita kuchichizga mu msumba wa Birobidzhan uwo uli ku manjiliro gha dazi ku Russia. Ntchito yakusecha iyi ŵayipa zina lakuti, “Zuŵa Lacheruzgo.” Ŵalara ŵa boma ŵakamupa mulandu Mubali Yevgeniy Golik pamoza na ŵabali na ŵadumbu ŵanyake 21 ku chigaŵa cha Jewish Autonomous. Khoti likamba kutegherezga mulandu wa Mubali Yevgeniy Golik pa January 29, 2020.

Pakutegherezga mulandu uwu pakapelekeka ukaboni wa mavidiyo ghakulongora Mubali Yevgeniy wakuŵerenga Baibolo na mabuku ghanyake ghakulongosora Baibolo.

Chikuŵa chipusu yayi para vinthu vyambura urunji vikukuchitikira, ndipouli Mubali Yevgeniy wakuti: “Kuŵerenga Baibolo nyengo zose na kulomba kwa Yehova, kwanovwira chomene kuti nighanaghanirenge chomene za Yehova m’malo mwakughanaghanira za masuzgo ghane. Fundo za mu Mazgu gha Chiuta zanovwira chomene kuti niŵe wakukondwa na kuphalirako ŵanyake fundo izi.”

Kughanaghanira fundo ya pa Salimo 23:4 kwamovwiraso chomene. Iyo kuti: “Lemba Salimo lanovwira chomene kuti niŵe wachikanga na kuzizipizga mwachimwemwe. “Nanga umoyo withu ungaŵa pangozi, kweni tikumanya kuti nyengo zose Yehova wali nase.”

Ŵabali na ŵadumbu ŵakumukhozga chomene Mubali withu Yevgeniy. Iyo wakuti: “Ŵabali na ŵadumbu ŵakiza ku khoti kuzakategherezga mulandu wane, ndipo ichi chikanikhozga chomene. Kweniso Yehova wakanipa movwiri muwemi, muwoli wane, uyo wakanovwiraso chomene pa nyengo yakusuzga iyi. Nyengo zose nkhuŵa wakukondwa. Nili na Mazgu gha Chiuta, chakurya chakukwana chakuthupi, kweniso na wovwiri unandi wakufuma ku ŵabali.”

Mubali Yevgeniy waŵikapo mtima kulutilira kukhozga ubwezi wake na Yehova. Iyo wakuchiska ŵabali na ŵadumbu awo pasono ŵandasangane na chiyezgo nga ntchake kuti: “Sambirani sumu za Ufumu, sambirani kutemwa ŵalwani ŵinu, kweniso sambirani kuŵa muteŵeti wa Chiuta wakukondwa nyengo zose, kwali vinthu viŵe wuli pa umoyo winu.”

Mphanyi tose talutilira tasambirako kanthu ku ŵabali na ŵadumbu ŵithu ŵa ku Russia. Nga umo Yehova wakuŵakhozgera pa nyengo yakusuzga iyi, nase wazamutikhozga.—Salimo 29:11.