Pa November 24, 2020, * Khoti la mu msumba wa Petropavlovsk-Kamchatskiy ilo lili mu chigaŵa cha Kamchatka lizamupeleka chigamuro chake pa mulandu wa Mubali Sergey Ledenyov. Nyengo zinyake khoti lingazakadumura kuti mubali withu wakagwire jele vyaka 6.

Sergey Ledenyov

• Chaka cha kubabikira: 1974 (Ossora, Chigaŵa cha Kamchatka)

• Mbiri yake: Kwawo ŵali kubabika ŵana 6. Wakutemwa kujambura vithuzi na mawoko kweniso kamera. Wakugwira ntchito ya vyakuzenga. Pambere wandambe kusambira Baibolo na Ŵakaboni ŵa Yehova, wakawonanga kuti Baibolo likukolerana yayi na sayansi. Wali kutorana na Anna, mu 2017. Anna wakuti fundo za mu Baibolo zamovwira chomene mfumu wake Sergey kuŵa wakuzika na wachitemwa

Pa December 2, 2018, ŵapolisi awo ŵakavwara vinthu vyakujara kumaso ndipo ŵakayegha futi, ŵakasecha mu nyumba ya Mubali Ledenyov ku Petropavlovsk-Kamchatskiy. Ŵakamukaka ndipo ŵakati wali na mulandu kuyana na Dango 282.2 la Boma la Russia. Khoti likamba kupulikizga mulandu wake pa November 28, 2019.

Pa December 12, 2019, Khoti la Msumba wa Petropavlovsk-Kamchatskiy ilo lili mu chigaŵa cha Kamchatka, likawezgera mulandu wa mubali uyu kwa wakwimira boma pa milandu. Ivi vikuchitika para khoti likuwona kuti mulandu wa munthu ulije vinthu vinyake vyakuzirwa nga ukaboni wakukwana. Kweni pa February 4, 2020, khoti ili likasintha ivyo likayowoya pakwamba, ndipo likamba kupulikizgaso mulandu wa mubali withu. Ivi vikati vyachitika, ŵapolisi ŵakamba kufumba mafumbo muwoli wa Mubali Ledenyov pamoza na mudumbu munyake, ndipo ŵakaŵachichizga kuti ŵapeleke ukaboni wautesi pa mulandu wa Mubali Ledenyov. Kweni Mudumbu Ledenyov pamoza na mudumbu munyake uyu, ŵakakana kuchita ivi.

Ŵabali ŵake ŵa Ledenyov awo Mbakaboni yayi ŵakupulikiska yayi chifukwa icho mubali withu wakutambuzgikira.

Tikulombera Mubali Ledenyov na muwoli wake apo ŵakulindilira zuŵa la mulandu wawo. Tikugomezga kuti mzimu utuŵa wa Yehova uli pa iwo.—1 Petrosi 4:14.