Pa Monday, January 27, 2020 Khoti la Karpinsk lizamudumula mulandu wa ŵadumbu ŵaŵiri, Venera na Darya Dulova kweniso Mubali Aleksandr Prianikov. Loya wa boma wali kupempha khoti kuti lidumure kuti Mubali Prianikov na Mudumbu Venera Dulova ŵakagwire jele vyaka vitatu, ndipo Mudumbu Darya Dulova wakagwire jele vyaka viŵiri.

Pa April 19, 2016, Mubali Prianikov na Mudumbu Venera Dulova ŵakadumbiskana na munthu munyake fundo za mu Baibolo. Kweni ŵabali ŵa munthu uyu ŵakamupusikizgira Mubali Prianikov na Mudumbu Venera Dulova kuti mbankhungu ndipo ŵakachema ŵapolisi. Ŵakaŵatolera ku polisi, ndipo ŵati ŵafika ŵakaŵajambura minwe na kuŵapoka mabuku.

Pati pajumpha vyaka viŵiri, ŵakaŵakakaso kuti ŵakaŵafumbe za nkhani iyi. Ŵakaŵapoka mafoni na vimakalata vinyake. Mulara wa ŵapolisi wakatuma Purofesa kuti wafufuze ivyo vili mu foni ya Mubali Prianikov na Mudumbu Dulova. Lipoti la mapeji 15 ilo Purofesa uyu wakalemba kuumaliro likati mu mafoni agha muli visambizgo vya Ŵakaboni ŵa Yehova. Pa chifukwa ichi, ŵakati ŵali na mulandu. Khoti la Karpinsk likatuma ŵapolisi kuti ŵakaseche kunyumba kwa Prianikov na Mudumbu Dulova.

Apo ŵakasechanga kunyumba kwa Mudumbu Dulova, ŵakapoka mafoni, mabuku na vithuzi. Mwana msungwana wa vyaka 18 wa Mudumbu Dulova nayo wakafumbika na ŵapolisi. Kweniso ŵapolisi ŵakakasechaso kunyumba za ŵachibali ŵa Mudumbu Dulova na Mubali Prianikov.

Mulenji pa April 16, 2019, ŵapolisi 6 ŵakaluta kunyumba kwa Mubali Prianikov. Ŵapolisi aŵa ŵakatoraso mafoni na vinthu vinyake.

Pa July 23, 2019, Mudumbu Darya Dulova ŵakamukaka kuti ŵakamufumbe makora chifukwa nayo ŵakamughanaghaniranga kuti wakukhwaskika pa mulandu wa amama ŵake na Mubali Prianikov. Wose ŵatatu mulandu wawo ukamba kweruzgika mu September 2019.

Tikuŵalombera ŵadumbu ŵaŵiri aŵa na Mubali kweniso ŵabali na ŵadumbu pafupifupi 300 awo ŵakuti ŵali na mulandu kweniso awo ŵali mu jele ku Russia. Tikulomba na chigomezgo chose kuti: ‘Mphanyi Chiuta uyo wakupeleka chigomezgo waŵapa chimwemwe chikuru na mtende chifukwa ŵakumugomezga, mwakuti kwizira mu nkhongono ya mzimu utuŵa ŵaŵe na chigomezgo chikuru.’—Ŵaroma 15:13.