Pa November 17, 2020, Khoti la mu Chigaŵa cha Kamchatka likakana apilu ya mulandu wa Mubali Konstantin Bazhenov, muwoli wake, Snezhana, na Mudumbu Vera Zolotova. Apa ndikuti chigamuro icho khoti likapeleka chakuti ŵakhale vyaka viŵiri kwambura kusangikaso na mulandu chambenge kugwira ntchito. Pasono ŵalutengeso ku jele yayi. Wose ŵatatu ŵachali ŵakukhora kweniso ŵachimwemwe.

Apo khoti likategherezganga mulandu wawo kakwamba pa September 25, 2020, Mubali Bazhenov wakamuphalira mwachikanga mweruzgi kuti wakopa yayi kujalirika mu jele. Iyo wakatiso ni mwaŵi ukuru kuti nayo wakufiskako ivyo vikuyowoyeka pa Yohane 15:20, apo Yesu wakayowoyerathu kuti ŵasambiri ŵake ŵazamutambuzgika.

Mubali Bazhenov wakalutizga kukumbuska khoti fundo ya pa Mateyu 28:19, 20, iyo yikuti Yesu wakatuma ŵasambiri ŵake kuti ŵakapharazge. Kufuma apo, Mubali Bazhenov wakaŵafumba fumbo lakuzirwa chomene lakuti: “Ni njani wali na mazaza kulekeska panji kukanizga ntchito iyo Yesu wakatituma?” Wakatiso: “Ine ningafiska yayi kukhala chete kwambura kuchitako ntchito iyi. . . . Nilutilirenge kupharazga makani ghawemi gha mu Baibolo.”