Pa October 26, 2020, Khoti la Lgov likakanaso kuti Mubali Dennis Christensen uyo wakhala mu jele vyaka vyakujumpha vitatu, wafumiskike pambere nyengo yake yindakwane. Mubali withu uyu wali na mazuŵa 10 ghakuchitira apilu chigamuro ichi. Mubali Christensen wakeruzgika kuti wakhale mu jele m’paka mu May 2022. Vyaka ivi vikusazgapo nyengo iyo ŵakamusungiranga mu jele. Ndipouli, mwezi wamara ŵalaraŵalara ŵa jele ŵakati “waswa malango ghakurughakuru” gha jele. Ivi vingapangiska kuti ŵaleke kupenderako mazuŵa agho ŵakamusungiranga mu jele, ndipo wangakhala mu jele kujumpha mu May 2022.

Mubali Christensen na muwoli wake, Irina, ŵazizipizga masuzgo ghakupambanapambana kufuma waka apo ŵakamukakira pa May 25, 2017. Ndipouli, wose ŵakulutilira kuŵa ŵakukondwa na kuŵikapo mtima kulimbana na chiyezgo ichi. Tikuwonga chomene chifukwa cha malurombo gha ŵabali mamiliyoni ghanandi pa charu chose.