Pa October 28, 2020, Khoti ilo lili ku Chigaŵa cha Bryansk, likakolerana na ivyo khoti lakwamba likadumura pa mulandu wa Mubali Vladimir Khokhlov na Eduard Zhinzhikov kweniso Mudumbu Tatyana Shamsheva na Olga Silaeva. Khoti lakwamba likadumura kuti ŵabali na ŵadumbu aŵa ŵakagwire jele ŵanyake chaka chimoza, ŵanyake chaka na myezi yitatu. Kweni pakuti pambere milandu yawo yinderuzgike ŵakaŵasunganga kale mu jele, vyaka ivyo ŵakapika vikakwana kale, ndipo ŵakakhumbikwangaso kugwira vyaka vinyake yayi. Chifukwa cha ivyo khoti ladumura muhanya uno, ŵabali na ŵadumbu aŵa ŵalutilirenge kuwoneka kuti ŵakapalamurapo mulandu. Ndipouli, iwo mbakukondwa kuti sono mbanangwa. Palije dango lakuzomerezga awo ŵakwimira boma pa milandu kuti ŵachite apilu na kupempha kuti ŵabali aŵa ŵapike chilango chikuru chomene.

Apo khoti lakwamba likaŵa lindapereke chigamuro chake pa mulandu wawo, ŵabali aŵa ŵakakhala mu jele mazuŵa 316 ndipo ŵadumbu ŵakakhalamo mazuŵa 245. Ŵati ŵafumiskika, ŵabali ŵakachezga na ŵadumbu aŵa mu Lipoti Lakufuma ku Wupu Wakulongozga la 2020 #5. Ŵadumbu aŵa ŵakayowoya kuti kulomba, kuŵazga Baibolo, na kulutilira kuŵa na mtima wakuwonga ndivyo vikaŵawovwira kuzizipizga mwachimwemwe.