Pa April 6, 2021, Khoti la Abinskiy ku Chigaŵa cha Krasnodar likati Mubali Aleksandr Shcherbina wali na mulandu ndipo wakagwire jele vyaka vitatu. Ŵati ŵamweruzga waka, ŵakaluta nayo ku jele nyengo yeneyiyo. Mubali Aleksandr wachitenge apilu.

Aleksandr Shcherbina

• Chaka cha kubabikira: 1976 (ku Kholmskaya, Chigaŵa cha Krasnodar)

• Mbiri yake: Ŵapapi ŵake wose ŵali kufwa. Wakagwirapo ntchito nga ni dilayivala wa thiraki, mekaniki, kweniso nga ni kalipentara.

• Apo wakaŵa mwana, wakatemwanga kuseŵera basketball na kutimba bola la malundi. Apo wakaŵa na vyaka vya m’ma 20, wakamba kusambira Baibolo na Ŵakaboni ŵa Yehova. Wati wasambira vya mauchimi agho ghali kufiskika, wakakhorwa kuti Baibolo ni Mazgu gha Chiuta nadi. Wakabatizika mu 1999

Ŵamazaza ŵa ku Chigaŵa cha Krasnodar ŵakasecha mu nyumba ya Mubali Aleksandr Shcherbina maulendo ghaŵiri mu April na December 2020. Pa maulendo ghose ghaŵiri, Aleksandr ŵakamufumba mafumbo ndipo ŵakamupoka Mabaibolo ghake na vinthu vinyake vyakugwiliskira ntchito nga ni foni na tabuleti.

Mulandu wa Mubali Aleksandr ŵakamba kuwutegherezga pa March 17, 2021, ku Khoti la Abinskiy. Nga umo viliri na milandu ya ŵabali ŵithu ŵanyake iyo yikeruzgikira mu khoti ili, mulandu wa Aleksandr nawo ukeruzgika mwaluŵiro chomene.

Apo wakaŵa mu khoti, Mubali Aleksandr wakayowoya mwachikanga kuti: “Unenesko ngwakuti mukunipa mulandu chifukwa chakuti nkhugomezga mwa Chiuta kweniso kuti nkhulutilira kuŵa yumoza wa Ŵakaboni ŵa Yehova. Ivi vikung’anamura kuti nkhweruzgika chifukwa cha kugwiliskira ntchito wanangwa wane uwo ukukolerana na Chigaŵa 28 cha kwendeskera Malango gha mu Charu cha Russia. Ivyo nkhugomezga pa nkhani ya chisopa chane vikukolerana na ivyo vili mu Baibolo. Ntheura vikupambana chomene na ivyo vikuchemeka vinthu vyakofya.”

Tikuwonga chomene Yehova chifukwa cha ŵabali na ŵadumbu ŵithu ku Russia awo ŵakulutilira kuŵa viyelezgero viwemi kwa ise pa nkhani ya chikanga na chipulikano. Ndipo tikumanya kuti Yehova waŵatumbikenge chomene chifukwa cha kuzizipizga kwawo pakuchita “khumbo la Chiuta.”—Ŵahebere 10:36.