Pa February 2, 2021, Khoti la Birobidzhan ilo lili ku Chigaŵa cha Jewish Autonomous likati Mubali Artur Lokhvitskiy wa vyaka 35, wali na mulandu. Khoti likeruzga kuti mubali uyu waleke kusangikaso na mulandu kwa vyaka viŵiri na myezi 6, ndipo para chilango ichi chazakamara ŵazamumuwoneraposo kwa vyaka vinyake vitatu usange wali na nkharo yiwemi. Mubali Artur pasono ŵamumujalira mu jele yayi.

Mu mazgu ghake ghaumaliro agho wakaphalira khoti, Mubali Artur wakati: “Ni mwaŵi ukuru kuti mwahuno nayimilira panthazi pa khoti ili, vilije kanthu kuti mulandu wenda uli. Apa nawonaso kufiskika kwa mazgu gha Yesu Khristu. Mazgu agha ghakusangika mu buku la mu Baibolo la Mariko chaputara 13, vesi 9 na 10: ‘Kweni imwe, muchenjere. Ŵanthu ŵazamumupelekani ku makhoti, . . . kuti uŵe ukaboni kwa iwo. Kweniso makani ghawemi ghakwenera kupharazgika dankha mu mitundu yose.’ . . . Kumanya fundo iyi kukunovwira kuti niphalirengeko ŵanyane vya khumbo la Chiuta. Nkhuwona kuti ni mwaŵi ukuru chomene kumuphaliraniko vinthu ivi.”