Pa February 12, 2021, Khoti la Birobidzhan, ilo lili ku Chigaŵa cha Jewish Autonomous likati Mubali Igor Tsarev wali na mulandu. Khoti likeruzga kuti Mubali uyu waleke kusangikaso na mulandu kwa vyaka viŵiri na hafu. Pasono Mubali Igor ŵamumujalira mu jele yayi.

Mubali Igor wakalutilira kuŵa wakukhora panyengo yose ya mulandu wake uwu. Mu mazgu ghake ghaumaliro agho wakaphalira khoti pa February 11, 2021, wakati: “Naghanaghaniranga umo ningambira kuyowoya mazgu ghane ghaumaliro agha, ndipo nanguwona kuti chingaŵa chiwemi kuti niyambe na ulongozgi wa mpositole Paulosi uwo wakawupeleka ku mipingo yose ya Chikhristu. Mu kalata iyo wakalembera Ŵakolose, wakaŵachiska kuti : ‘Longorani kuti muli ŵakuwonga.’

“Ntheura, nkhukhumba kumuwongani, Mwaŵakuchindikika, chifukwa cha mtende uwo wanguŵapo panyengo yose iyo mulandu wane weruzgikanga, kweniso mwatitegherezganga makora chomene. . . . Kweni nkhumuwonga chomene Mulengi na Chiuta withu, Yehova, chifukwa wanovwira panyengo yose iyi apo khoti lategherezganga mulandu wane. Wanipa mtende wa mu mtima.”—Ŵakolose 3:15.