Pa September 25, 2020, Khoti la Yelizovsky ilo lili ku Chigaŵa cha Kamchatka, likati Mubali Konstantin Bazhenov, muwoli wake Snezhana, na mudumbu Vera Zolotova, ŵali na mulandu. Pakwamba uyo wakwimira boma pa milandu wakapempha khoti kuti lilipiske Mubali na Mudumbu Bazhenov ndalama zakukwana madola 7,850 gha ku America ndipo Mudumbu Zolotova walipire ndalama zakukwana madola 5,195 gha ku America. Ndipouli, khoti lapeleka chilango chakuti wose ŵakhale vyaka viŵiri kwambura kusangikaso na mulandu, kufuma apo ŵazamukanizgika vinthu vinyake kwa myezi 6. Mubali na Mudumbu Bazhenov pamoza na mudumbu Zolotova, mbakukondwa kuti ŵalutenge ku jele yayi panji kulipira ndalama.