Pa December 18, 2020, Khoti la Khostinskiy ku Sochi likati Mubali Nikolay Kuzichkin na Vyacheslav Popov ŵali na mulandu. Khoti ili likagamura kuti Mubali Nikolay wagwire jele chaka na mwezi umoza, ndipo Mubali Vyacheslav wagwire jele chaka na myezi 10. Ndipouli, nyengo iyo ŵaŵasungiranga mu jele pambere mulandu wawo underuzgike, yakwaniska kale vyaka ivyo ŵangupika. Mubali Vyacheslav, uyo ŵachali kumusunga mu jele, ŵamufumiskenge para chigamuro ichi chamba waka kugwira ntchito. Mubali Nikolay ŵamufumiska pa jele la panyumba ilo wakaŵa.

Nikolay Kuzichkin

• Chaka cha kubabikira: 1951 (Chigaŵa cha Kostroma)

• Mbiri yake: Wati walizga kusambira vya sumu, wakamba ntchito ya kuchuna piano. Ngwakutora ndipo iyo na mwanakazi wake Olga, ŵali na ŵana ŵanalume ŵatatu. Wakuwumanya makora ulimi wa njuchi

  Wakamba kusambira Baibolo na Ŵakaboni ŵa Yehova kukwambilira kwa vyaka vya m’ma 1990. Wati wajiwonera yekha umo uchimi wa mu Baibolo ukufiskikira, mu 1993 wakaghanaghana vya kujipeleka kwa Yehova na kubatizika.

Vyacheslav Popov

• Chaka cha kubabikira: 1974 (Tomsk)

• Mbiri yake: Wakamba vyakudinda vithuzi wachali muchoko, ndipo wakumanyaso kunozga na kutoweska mukati mwa nyumba. Wakasangana na muwoli wake, Yuliya, apo ŵakaŵa ku koleji. Ŵakatorana mu 1998 ndipo ŵali na mwana msungwana yumoza na ŵasepuka ŵaŵiri. Ŵakasamira ku Sochi mu 2010. Mbumba yawo yikutemwa kuseŵera mu chiwuvi na kwenda mu mphepete mwa nyanja

  Yuliya ndiyo wakamba kusambira Baibolo na Ŵakaboni ŵa Yehova. Adada ŵa Vyacheslav ŵati watayika, unenesko wa mu Baibolo ukamupembuzga chomene. Wakabatizika mu 2004

Mise ya pa October 10, 2019, gulu la ŵamazaza ŵa boma ilo likaŵa na vilwero na ntcheŵe, likasecha mwakuchichizga mu nyumba 36 za Ŵakaboni ŵa Yehova ku Sochi, Russia.

Ŵalara na ŵana ŵakaphalirika kuti ŵagone pasi uku visko vyawo vyalazga pasi ndipo ŵakamba kusecha mu nyumba zawo. Ŵakaŵapoka vinthu nga ni mafoni, matabuleti, makompyuta, mabuku, manotibuku, na makadi wuwo. Mu nyumba zinyake ŵamazaza aŵa ŵakaŵikirangamo dala ŵekha mabuku ghithu agho ngakukanizgika na boma. Ivi vikapangiska kuti Mubali Nikolay Kuzichkin na Vyacheslav Popov ŵakakike. Zuŵa lakulondezgapo, ŵabali aŵa ŵakaŵasunga mu jele.

Mubali Kuzichkin wakulwara matenda ghakuru ghakupambanapambana. Ŵalara ŵa Khoti ŵakakana mwakuwerezgawerezga pempho lake lakuti wakapokere wovwiri wa chipatala, ŵakati umo waliri “ŵangamuŵika pa gulu la ŵanthu awo ŵakwenera kuleka kujalirika mu jele yayi.” Padera pa matenda agho wakulwara, Mubali Nikolay ŵakamuŵika mu selo iyo mukaŵa ŵakayidi ŵanandi chomene ndipo ŵanyake mwa ŵakayidi aŵa ŵakakhweŵanga hona. Ivi vikapangiska kuti suzgo la Mubali Nikolay liyire munthazi.

Nangauli kuŵa mu jele kukaŵikanga umoyo wa Mubali Nikolay pangozi, kweni iyo mwenecho wakuti : “Jele lili nga ni mashini gha X-ray agho ghakujambura mukati mwithu, ndipo likuvumbura usange tili nadi na makhaliro ghawemi panji yayi.” M’malo mwakujighanaghanira, Nikolay wakamanyikwanga kuti ngwamtende, munthu walusungu uyo wakuŵikapo mtima kovwira ŵakayidi ŵanyake awo ŵakusuzgika maghanoghano na awo ŵakukhumba kujikoma.

Pa April 22, 2020, ŵakamufumiska mu jele na kumutuma pa jele la panyumba, ŵati ŵasazgirako nyengo ya kumusungira mu jele maulendo 6. Wakaŵavyirathu nkhongono mwakuti wakatondekanga na kuwuka. Vyati vyaŵa nthena ndipo wakazomerezgekanga kuti wangakapokera wovwiri wa chipatala.

Vyacheslav ŵakamusazgirako nyengo yakukhalira mu jele maulendo 14, ivi vikapangiska kuti wakhale mwakutalikirana na mbumba yake kujumpha chaka chimoza.

Tikuwonga chomene Mubali Nikolay na Vyacheslav chifukwa cha chiyelezgero chawo chiwemi pa nkhani ya kuŵikapo mtima kukhozgera muwuso wa Yehova. Ŵakachita vinthu nga ngwamasalimo uyo wakalemba mazgu gha pa Salimo 16:8 ghakuti: “Nkhuŵika Yehova pamaso pane nyengo zose. Pakuti wali ku woko lane lamalyero, nisunkhunyikenge chara.”